Kantares 2 - Biblia ande chib Romani

Voi

¹ Me sem e lulunllin katar o Saron, ta lulunllin katar e umalia.

Vou

² E diskinia kai voliu, si maskar e diskinie sargo iek lulunllin maskar e karrne.

Voi

³ O manus kai voliu, si maskar e murusa terne sargo iek kas phabaiengo maskar e kasta katar o vos. ¡Gia sukar si te besav tala leko lado! ¡Ta gia gugli si leki septelia!

⁴ Inllarda man kai o cher kai saia e sinia, ta leko volipe pe mande saia sargo iek bariako.

⁵ De man te jav e drak suki, de man zor e phabaienchar, soke nasuali sem katar o volipe.

⁶ Leko va o stingo te avel telal katar mo soro, a leko va o chacho te lipil man pe pete.

Vou

⁷ Jan mange sovel chea katar o Jerusalem ando anav katar e zivirinie kai prasten ando vos, kai ka muken la te sovel, voi si mo volipe. Muken la te sovel lligo ni ka mangel te ustel.

O duito llilabipe Voi

⁸ ¡Avel o lleno kai voliu le, asunav leko avazi! Avel ta jutel upral pe burdura, jutel upral pe umalia.

⁹ Gole kai voliu si sargo iek bakro katar e burdura, ¡Avilo, vou si pala o zido ta dikhel katar e penllerava, prezol maskar o putardipe katar e kastorra!

¹⁰ Gole kai voliu phenda mange gia: Uste, mi amal, tu san sukar, aide.

¹¹ Soke o viend nakhlo ta o bursin llelotar,

¹² sikadile e lulunlla pe phuv, ta avilo o vreme katar o llilabipe, ta ande amari phuv asundilo o avazi katar e chiriklia.

¹³ O kas dia e simochine, ta e drakha khanden sukar. Tu san mi amal, tu san sukar, Uste, mi amal, ta aide.

¹⁴ Tu san mo gulubo, san gurudini maskar e pechine, pe thana kai si chak upre kai nasti reselpe. Muk te dikhav cho mui, cher te asunav cho avazi, soke cho avazi si guglo, ta san sukar.

E dui

¹⁵ Istaren e lisichen, e minone lisichen, kai murin amare drakha, amare drakha kai akana si lulunlla.

Voi

¹⁶ O lleno kai voliu si murno, ta me sem leki. Vou pravarel pe bakren maskar e lulunlla.

¹⁷ Lligo ni ka likel o kham ta ka nasel o truniariko, irisao manusea kai voliu tut, ta cherdo sargo iek venado, sargo iek siervo minono pe burdura katar o Beter.