Kantares 1 - Biblia ande chib Romani

O purvo llilabipe

¹ E mai sukar katar e llilia katar o Salomon.

Voi

² ¡Ioi, te chumiden man che us! Soke mai lacho si cho volipe neko e mol.

³ ¡Gia sukar khandel o meriso kai si pe tute! Cho anav si sargo meriso kai chordol, goleke e chea volin tut.

⁴ ¡Inllar man tute, sigar! ¡Charo, inllar man ande chi soba! ¡Ka dragosti amen ta ka veseli amen cheres tu! ¡Ka da amen golli katar cho volipe mai but neko katar e mol! Goleke volin tut.

Llilaben sa Voi

⁵ Diskinie katar o Jerusalem, sem kali, a sem sukar, sem kali sargo e chare katar o Kedar, sem sukar sargo e chitura katar o Salomon.

⁶ Na dik kai sem kali, ni soke o kham dikhla pe mande, me phlal jolaile pe mande, ta thode man te arakhav e drakha, ¡a murne drakha ni arakhlem!

⁷ Tu san o lleno kai voliu, phen mange ¿kai arakhe chi stoka? ¿Kai inllare len te soven po dopas e lliveseko? ¿Soke ka phirav sargo iek chudini pasa e stoka katar che amal?

Llilaben sa

⁸ Te na llanele tu, sukar maskar e diskinie, lla pala e estope katar e stoka ta arak che busnorren pasa e cherorra katar e chobanura.

Vou

⁹ Tu kai san mo volipe, san mange sargo iek sukar grasni kai chirdel o bordon katar o Faraon.

¹⁰ ¡Gia sukar si che chama maskar che chea! ¡Gia sukar si chi korr maskar e klea!

¹¹ ¡Ka chera chuke chea sunakune, marde ando rup!

Voi

¹² Kana o charo besel pe sinia, mi lulunllin chudel petar o meriso.

¹³ Mo rrom si mange sargo e mirra ande ambavicha kai si maskar me kolina.

¹⁴ Vou si mange sargo lulunlla ande umalia e drakhenge katar o En Gadi.

Vou

¹⁵ ¡Gia sukar san, mi amal, gia sukar san! ¡Che akha si sargo dui gulubura!

Voi

¹⁶ Tu san sukar, tu san mo volipe, ta san guglo. E char si amaro than.

Vou

¹⁷ E direkura katar amaro cher si e sedrura, ta upral ucharen amen e krangura katar o sipres.