Jueses 9 - Biblia ande chib Romani

O Abimelek

¹ O Abimelek chavo katar o Jerubaal llelo ando Sikem te del orba e familiaia katar leki dei ta phenda lenge:

² Me moliv man tumenge te phenen e llenenge katar o Sikem kai si mai lache te gazdaril pe tumende samo iek lleno a na sa e eftavardes chave katar o Jerubaal.

³ Ta sa leke phlal katar leki dei phende e llenenge katar o Sikem so phenela o Abimelek te pomozin le.

⁴ Ta lie eftavardes tolaria rupune katar o cher e deleke Baal Berit ta dielen e Abimeleke. Gale lovenchar o Abimelek pochinda murusenge kai ni radina ta lleletar lea.

⁵ Ta avile ando Ofra, o foro kai zivisardaia pe dadea o Jerubaal. Ta mundarde e eftavardesen phlalen katar o Abimelek. Samo o Jotam, o phlal mai terno gurudilo te na merel.

⁶ Ondaka chidinaile sa e llene katar o Sikem ta katar o Bet Milo. Chidinaile pasa e ensina ta e pechina kai sea ando Sikem ta kote thode e Abimeleke te charoil pe lende.

⁷ Kana llanglale o Jotam llelo po burdo o Gerizim ta kotar urkisarda zurale te sai asunen le sa: ¡Asunen man llene katar o Sikem! ¡Ta gia te asunel tumen o Del!

⁸ Iek drom e kasta mangena iek charo ta mangle katar o kas maslinkengo te charoil pe lende.

⁹ A o kas maslinkengo phenda lenge iok soke te sai charoil morabi te mukel te del zeitino kai si te den liubao e llenenge ta e Devleke.

¹⁰ Ondaka e kasta mangle katar e simochina te charoil pe lende.

¹¹ A e simochina phenda lenge iok, soke te sai charoil morabi te mukel te del lake septelie sukar ta gugle.

¹² Ondaka e kasta mangle katar o kas drakhako te charoil pe lende.

¹³ A o kas drakhako phenda lenge iok, soke te sai charoil morabi te mukel te del o pipe kai del veselia e llenenge ta e Devleke.

¹⁴ Ondaka e kasta mangle katar o kas karrnengo te charoil pe lende.

¹⁵ Ta o kas karrnengo phenda lenge kai de istina mangena te charoil vou pe lende, sea lenge te thovenpe telal tala leke senka. A te na, ka likel letar iag te phabarel e sedrura katar o Libano.

¹⁶ Akana me puchav: ¿Tumen cherden so si orta kana thoden e Abimeleke te avel o charo? ¿Tumen sena pachivale e familiaia katar o Jerubaal isto gia sar von sea tumenchar?

¹⁷ Soke mo dad thoda po zivoto ande bari dar pala tumen kana mardape e madianitonenchar te braduil tumen lendar,

¹⁸ a tumen vazdinailen pe me dadeki familia ta mundarden leke eftavardesen chaven pe iek pechina. Ta i thoden te charoil pe tumen e Abimeleke, o chavo katar e konkubina katar o Jerubaal samo soke vou si tumaro phlal.

¹⁹ A me phenav tumenge allive: Te si kai sena chache ta pachivale e Jerubaalea ta leki familiaia, te llal tumenge sukar e Abimelekea ta i leke,

²⁰ a te na, ¡te likel katar o Abimelek iag te phabarel saurren ando Sikem ta Bet Milo, ta katar o Sikem ta o Bet Milo te likel iag te phabarel le!

²¹ Mapalal o Jotam naslo ando Beer ta kote gurudilo soke darala katar leko phlal o Abimelek.

²² O Abimelek gazdarisarda e israelen trin burs.

²³ A o Del bichalda iek duo bilacho maskar Abimelek ta e llene katar o Sikem te vazden pe lete

²⁴ ta gia te pochinel o mundaripe kai cherdaia e eftavardese chavenge katar o Jerubaal ta te pochinen e llene katar o Sikem soke pomozisardea e Abimeleke.

²⁵ Ta ando Sikem sea kochkaria kai guruduna ta perena pe llenen kai nakhena po drom. Ta llanglale o Abimelek.

²⁶ Iek llive o Gaal chavo katar o Ebed nakhlo pe phlalenchar ando Sikem, ta e llene katar o foro thode ande le lengi vera.

²⁷ Ta likiste ando vos, ustade e drakha, cherde mol ta cherde iek slava. Die ando cher katar lenge dela, jale, pile ta die armaia e Abimeleke.

²⁸ Ta o Gaal phenela: ¿So mislilpe gava Abimelek? Vou si samo iek chavo katar o Jerubaal ta o Zebul si leko sluga. A amen e llene katar o Sikem, ¿so sam amen te ava lenge sluge? Aide te radi e Jamoreke o dad katar o Sikem.

²⁹ ¡Te avava me tumaro gazda, oma tradiava e Abimeleke! Ta i phenda: ¡Aide Abimelek, chide che boñikonen ta ave po maripe!

³⁰ Kana o Zebul o gazda katar o foro, asunda so phenela o Gaal, jolailo but,

³¹ ta bichalda te phenen e Abimeleke kai saia ando Aruma: O Gaal chavo katar o Ebed avilo pe phlalenchar ando Sikem ta cherel te joliaon pe tu e llene katar o foro.

³² Goleke like gaia riat che boñikonenchar ta gurudo ando umal.

³³ Thiara kana ka likel o kham de pe foro, ta kana ka likel o Gaal ta leke boñikura te marenpe tuia, cher lea sogo kamea.

³⁴ Ondaka o Abimelek ta leke llene likiste orachaia ta gurudile truial katar o Sikem fulade ande star kotora.

³⁵ Ta kana o Gaal likisto ta thodape po udar e forotar, o Abimelek ta leke boñikura likiste katar e riga kai guruduna.

³⁶ Kana dikhla len o Gaal phenda e Zebuleke: ¡Dik, katar e burdura aven boñikura! O Zebul phenda: Iok, gala si e senka katar e burdura kai tu dikhe len sargo llenen.

³⁷ A o Gaal phenela: ¡Katar o burdo kai ikharen le bureko e phuviako aven boñikura! ¡Aver boñikura aven po drom katar Ensina katar e llene kai apogodin!

³⁸ Ta o Zebul phenda leke: ¡De orba akana, tu kai phenea kai o Abimelek ni saia niko te ava leke sluge! ¡Lla akana te mareto lenchar!

³⁹ Ondaka o Gaal likisto angla e llene katar o Sikem te marelpe e Abimelekea.

⁴⁰ A o Abimelek rodia le ta o Gaal naslo letar. Ta ando udar e foroko mule but llene.

⁴¹ O Abimelek achilo ando Aruma ta o Zebul chudia katar o Sikem e Gaale ta leke phlalen.

⁴² Thiarinako e llene katar o Sikem llele pe umal, ta kana llanglale o Abimelek,

⁴³ fulada e boñikonen ande trin kotora ta gurudilo ando vos. Ta kana dikhla kai e llene katar o Sikem likena katar o foro, likisto katar o vos kai gurudilo ta dia pe lende.

⁴⁴ Vou ta leke boñikura die te len o udar e foroko, ta ogola boñikura dena pe llenen ta mundarena len,

⁴⁵ sorro llive o Abimelek dia po Sikem lligo ni lia le. Ondaka zatrisarda e foro ta mundarda saurren ande le, ta pe foro thoda lon.

⁴⁶ Kana e llene katar o Migdal Sikem llangle so cherdaia o Abimelek, llele te gurudon ando cher katar o del El Berit.

⁴⁷ Ta kana o Abimelek llangla kai sa sea chidine kote,

⁴⁸ llele pe boñikonenchar po burdo o Salmon ta iekhe toverea chinda iek krango thoda le pe po dumo ta phenda pe boñikonenge te cheren sargo vou.

⁴⁹ Ta sa chinde krangura ta llele e Abimelekea llik kai o cher katar o del El Berit. Thode sa e krangura pasa o cher ta phabarde le. Gia mule sa e llene katar o Migdal Sikem kai sea milia murusa ta diskinie.

⁵⁰ Mapalal o Abimelek llelo ando Tebes te del pe foro ta lia le.

⁵¹ Po maskaral katar o foro saia iek cher ta andre guruduna sa e llene katar o foro. Phangle zurale o udar ta likiste upral katar o cher,

⁵² a o Abimelek avilo po udar katar o cher ta dia pe le. Ta kana thodape te phabarel o cher,

⁵³ iek diskinia chudia iek baro barr kai pelo pe leko soro ta phagla leki kokala.

⁵⁴ Ondaka o Abimelek ikharda leke sluga ta phenda leke: Ikan cho jarni ta mundar man, te na phenen kai iek diskinia mundarda man. Ta o sluga ranisarda le ta o Abimelek mulo.

⁵⁵ Kana e israelitura dikhle kai o Abimelek muloa lleletar chere.

⁵⁶ Gia o Del cherda te pochinel o Abimelek o mundaripe kai cherdaia pe dadeke kana mundarda leke eftavardese phlalen.

⁵⁷ Gia o Del cherda te pochinen e llene katar o Sikem o mundaripe kai cherde. Ta gia cherdili e armaia kai diaia o Jotam chavo katar o Jerubaal.