Jueses 8 - Biblia ande chib Romani

O Gedeon phandel e charonen katar o Madian

¹ Ta e llene katar e vicha e Efraineki jolaile soke ni ikharde len te aven po maripe e madianitonenchar. Ta die pe lete zurale.

² A o Gedeon phenda lenge: ¿Ni dikhen tumen kai cherden mai but neko me? So cherden tumen mol le mai but neko so amen cherdam. So chidia o Efrain si mai sukar neko e drakha kai chidia o Abiezer.

³ O Del thoda ande tumare va e Orebe ta e Zeebe, e mai preche llene katar o Madian. ¿So cherdem me prema so cherden tumen? Kana e efrainitura asunde e alava katar o Gedeon liape lendar e joli.

⁴ O Gedeon ta leke trin stotine murusa avile ando Jordan ta nakhlele, a sea but chinie soke rodie e dusmanonen.

⁵ Ta mangla e llenendar katar o Sukot: Den fiso te jan e llenenge kai aven manchar soke si but chinie. Amen roda e charonen madianitura o Zebaj ta o Salmuna.

⁶ A e gazda katar o Sukot phende leke: ¿Phanglan e Zebaje ta e Salmune te sai da jape che llenenge?

⁷ Ta o Gedeon phenda lenge: ¡Mapalal kana o Del ka del man e Zebaje ta e Salmune, ka iriv tumenge ta ka chinav tumaro mas e karrnenchar ta e fafurrukenchar katar o pusto!

⁸ Kotar llelotar ando Penuel ta mangla lendar isto so manglaia ando Sukot. A e llene katar o Penuel phende leke sargo ando Sukot.

⁹ Ta o Gedeon phenda lenge: ¡Kana ka dobiv me dusmanonen, ka zatriv gava cher marimako!

¹⁰ O Zebaj ta o Salmuna sea ando Karkor ta lenge boñikura sea desupanch milie kai achena katar e boñikura katar o oriente, soke ando maripe mulea stotina ta bis milie lendar.

¹¹ O Gedeon llelo po drom katar e llene kai zivina ande chare ando oriente katar o Noba ta Jogbea. Dia po pero soke e boñikura ni sea lacharde po maripe.

¹² O Zebaj ta o Salmuna nasle a o Gedeon rodia len ta phangla len ta sa e boñikura daraile but.

¹³ Kana o Gedeon irilape katar o maripe ta nakhela ando Jeres,

¹⁴ phangla iekhe llene terno katar o Sukot ta puchla le. Ta o lleno terno pisisarda leke e anava katar e gazda ta katar e phure katar o Sukot kai sea eftavardes ta efta llene.

¹⁵ Ondaka o Gedeon llelo ando Sukot ta phenda e foroke: ¿Den tumen golli sar tumen marden espurnia mandar katar o Zebaj ta o Salmuna? ¿Den tumen golli kai tumen ni dien marrno me murusen kai sea chinie soke ni phanglea e Zebaje ta e Salmune? ¡Dikhen len etalen kate!

¹⁶ Ondaka o Gedeon lia karrne ta fafurruke kai barion po pusto ta golenchar dukhada e phuren katar o Sukot.

¹⁷ Ta perada o cher marimako katar o Penuel ta mundarda e llenen katar o foro.

¹⁸ Mapalal puchla e Zebaje ta e Salmuna: ¿Sar sea e llene kai tumen mundarden po Tabor? Ta von phende leke: Sargo tu. Dikhona sargo iek glamno lleno.

¹⁹ Ondaka o Gedeon urkisarda: ¡Me phlal! ¡Mundarde me phlalen! ¡Angla o Del o llundo phenav le, te na mundarena len me ni mundarava tumen!

²⁰ Ta phenda pe chave mai purano, o Jeter: ¡Uste ta mundar len! A o Jeter ni ikanda leki jarni soke saia but terno ta darailo te mundarel len.

²¹ Ondaka o Zebaj ta o Salmuna phende e Gedeoneke: ¡Tu mundar amen! ¡O chachuno murus pinllardol andar leki zor! O Gedeon ustilo ta mundarda len. Mapalal lia e ezgode sukar kai sea pe devenge korra katar o Zebaj ta o Salmuna.

²² Ondaka e israelitura vacharde e Gedeoneke: Amen manga te gazdari pe amende tu ta chi familia soke braduisardan amen katar e madianitura.

²³ A o Gedeon phenda lenge: Me ta mo chavo ni ka gazdari. O Del ka gazdaril pe tumende.

²⁴ So me mangav tumendar si te den man e angrusta sunakune kai lien. Gala angrusta anda len e dusmanura soke sea ismaelitura.

²⁵ E israelitura thode pe phuv iek chiti ta suako lleno thoda ande le e angrusta kai liaia, ta phende e Gedeoneke: Etalen kate.

²⁶ Sa e angrusta phariavena desunia kile bi te llindol o sunakai ta e chitura but sukar kai thovenape e charura katar o Madian, ta e klea katar lenge deve.

²⁷ Ta o Gedeon cherda katar o sunakai iek efod ta thoda le ande Ofra. Ta sa o Israel ni saia orta angla o Del pala o gua efod, ta cherda te perel e Gedeone ta leki familia.

²⁸ Gia e madianitura achile tala o gazdaripe katar o Israel ta nikada ios vazdie o soro. Kana zivisarda o Gedeon saranda burs saia e pas ande phuv.

O meripe katar o Gedeon

²⁹ O Gedeon kai ikharena le Jerubaal, llelo te zivil kai po cher,

³⁰ ta avile leke eftavardes chave soke sea le but rromia.

³¹ Ta leki konkubina kai zivila ando Sikem malada lake iek minono ta thoda leko anav Abimelek.

³² O Gedeon mulo kana saia phuro ta prajosarde le ando limori katar leko dad o Joas ando Ofra katar e abiezeritura.

³³ Mapalal kana mulo o Gedeon e israelitura pale mukle e Devle te sai blagosin e Baale. Ta esvirisarde e Baal Berite te avel lengo del.

³⁴ Bristardepe e Devletar kai braduisarda len katar lenge dusmanura kai sea truial lendar,

³⁵ ta ni sea lache e familiaia katar o Gedeon prema sa o lachipe kai cherdea e Israeleke.