Jueses 7 - Biblia ande chib Romani

O Gedeon dobil e madianitonen

¹ O Gedeon kai akana ikharenale Jerubaal ta sa e llene kai sea lea, ustile thiarinako rano ta logle pasa o paiorro katar o Jarod. Ta o pero katar e madianitura saia ando norte telal katar o burdo More, ande bari umal.

² Ta o Del phenda e Gedeoneke: O foro kai si tuia si but te dav tut ande che va e madianitonen. Sai te avel kai ka mislin ta ka phenen: Mo va braduisarda man.

³ Goleke phen e foroke kai te si vareko kai daral, te irilpe chere. Gia o Gedeon zumada len ta lleletar bis ta dui milie murusa, ta achile des milie.

⁴ A o Del phenda: Si but. Inllar len te pien pai, kote me ka zumavav len ta ka phenav chuke ko ka llal ta ko ni ka llal.

⁵ Ondaka o Gedeon inllarda len te pien pai, ta o Del phenda leke: Thou pe iek rig golen kai pien o pai pe vastenchar ta pien le sargo e llukela. Ta pe aver rig thov ogolen kai den changenchar te pien.

⁶ Ta e llene kai pile o pai pe vastenchar ta pile sargo pien e llukela sea trin stotine. Sa ogola die changenchar te pien.

⁷ Ondaka o Del phenda e Gedeoneke: Gale trine stotinenchar murusa me ka bradui tumen ta ka dobiv e madianitonen. Sa ogola sai te llantar chere.

⁸ O Gedeon phenda te irinpe chere sa ogola. A oma te llantar lia lendar lenge bardakuria ta lenge tuturuge cherde katar sing e busneki. Samo achilo e trine stotinenchar murusa esvirime. Ta sea logle upral pe madianitura kai sea ande bari umal.

⁹ Gaia riat o Del phenda e Gedeoneke: Uste te de pe madianitonen, soke me ka dav len ande che va.

¹⁰ A te si kai dara te de pe len, fulie oma ando pero che slugaia o Pura,

¹¹ ta asun so phenen. Ondaka ka ave tromano te de pe lende. Ta o Gedeon fulisto pe slugaia o Pura llik kai o pero katar e madianitura.

¹² E madianitura, e amalekitura ta e llene katar o oriente sea ande bari umal, gachin sargo e langoste. Sea len gachin deve sargo e chisai e moraki.

¹³ Kana avilo o Gedeon, saia iek lleno kai phenela pe amaleke iek suno kai dikhlaia ta phenela leke gia: Dikhlem kai iek marrno sebadako perela ando amaro pero ta dia pe iek chara ta perada la.

¹⁴ Ta leko amal phenda leke: Gaia si e jarni katar o Gedeon chavo katar o Joas israelita. O Del ka cherel te dobil o Gedeon e madianitonen ta sa lengo pero.

¹⁵ Kana o Gedeon asunda katar o suno ta so sikavela, o Gedeon blagosisarda e Devle. Mapalal irisailo ando pero katar e israelitura ta phenda: ¡Aide, soke o Del ka del amen o pero katar e madianitura!

¹⁶ Ta fulada e trin stotine murusen ande trin kotora, ta dia suakoneke lendar tuturuge ande lenge va ta bardakuria kai ande len sea kasta kai phabona.

¹⁷ Ta phenda lenge: Kana me ka avav pe ogoia rig katar o pero e dusmanonengo dikhen pe ma ta cheren so ka cherav.

¹⁸ Kana me ta e llene kai llan manchar ka basala e tuturuga, basalen i tumen e tuturuge truial o pero ta urkisaren: ¡Pala o Del ta pala o Gedeon!

¹⁹ Ta o Gedeon ta leke stotina murusa avile pe ogoia rig katar o pero kana thovena aver boñikonen te arakhen ande desudui e rachako. Ta basalde e tuturuge ta phagle e bardakuria kai inllarena.

²⁰ Ondaka e trin kotora basalde e tuturuge ta phagle e bardakuria. Po va stingo inllarena e kasta kai phabona ta e tuturuge po va chachi, ta urkina: ¡Maripe! ¡Pala o Del ta pala o Gedeon!

²¹ Ta suako lleno achilo pe po than truial katar o pero. Ondaka sa e boñikura thodape te prasten daratar ta nasena,

²² ta e trin stotine israelitura ni mukena te basalen ande tuturuge, ta o Del cherda te marenpe e madianitura iek averea. Ta nasle llik o Bet Sita po drom katar o Serera pasa o Abel Mejola ando Tabat.

²³ Ta ikharde e llenen katar o Israel, katar o Neftali, katar o Aser ta katar sa o Manases te roden e madianitonen.

²⁴ O Gedeon bichalda llenen po burdo katar o Efrain te ikharen e murusen te avena po maripe e madianitonenchar ta te len e thana kai nakhen o pai ande Bet Bara ta ando Jordan oma te avena ogola. Ta gia cherde e llene katar o Efrain.

²⁵ Ta phangle duie gazden katar e madianitura, e Orebe ta e Zeebe. Ta mundarde e Orebe pe pechina katar Oreb, ta e Zeebe mundarde po than kai ustaven e drak ta kai ikharen le Zeeb sargo leko anav. Mapalal kana rodie e madianitonen inllarde e Gedeoneke e sore katar o Oreb ta o Zeeb pe ogoia rig katar o Jordan.