Jueses 6 - Biblia ande chib Romani

O Del ikharel e Gedeone

¹ A e israelitura cherde o bilachipe angla e akha e Devleke. Goleke o Del ande efta burs cherda te dobin len e madianitura.

² Ta e madianitura sea but bilache e israelitonenchar goleke e israelitura guruduna pe burdura ande pechine ta ande thana kai saia trudno te aven.

³ Kana e israelitura thovena simiche ande phuv avena e madianitura ta e amalekitura ta marenape lenchar.

⁴ Thovena lengo pero ande phuv katar o Israel ta zatrina e septelie llik e Gaza ta ni mukena niso e israelitonenge. Lena lendar e bakre e guruva ta e magarche.

⁵ Dena ande phuv ta zatrina sa. Avena pe deve, ta gachin avena kai sea sargo zatrania katar langoste.

⁶ Pala e madianitura e israelitura cherdile but chorre. Ondaka ikharde e Devle te braduil len.

⁷ Kana e israelitura ikharde e Devle te braduil len katar e madianitura,

⁸ o Del bichalda lenge iekhe profeta ta phenda lenge: Gia phenel o Del e Israeleko: Me ikandem tumen katar o Ejipto kai sena sluge,

⁹ me braduisarden tumen katar e ejipsiura ta katar sa gola kai patina tumen.

¹⁰ Ta phendem tumenge kai me sem tumaro Del, te na daran katar e dela amorreura kai ande lengi phuv tumen zivin akana. A tumen ni kandie man.

¹¹ Ondaka avilo o suecho e Devleko ta beslo telal tala e ensina kai saia ande Ofra, ande phuv e Joaseki kai saia katar e familia katar o Abiezer. Ta leko chavo o Gedeon ikanela o lliu te guruvel le katar e madianitura.

¹² Ta o suecho e Devleko sikadilo leke ta phenda: ¡O Del si tuia murus tromano ta zuralo!

¹³ Ta o Gedeon phenda: Te si kai o Gazda si amenchar, ¿soke nakhen amenge sa gala ezgode? ¿Kai talen sa e bare ezgode Devlikane kai phenen amenge e purane kana o Del ikanda len katar o Ejipto? O Del mukla amen ta dia amen ande va katar e madianitura.

¹⁴ Ta o Del dikhla le ta phenda leke: Lla che zoriaia te bradui e Israele katar e madianitura. ¿Ni sem me kai bichalav tut?

¹⁵ A o Gedeon phenda: ¿Sar ka braduiv e Israele? Murni familia si e mai chorri katar e vicha e Manaseki ta me sem o mai terno.

¹⁶ Ta o Del phenda leke: Sai cherele soke me ka avav tuia. Tu ka dobi e madianitonen sargo iekhe llene.

¹⁷ Ondaka o Gedeon phenda: Te si kai sem lacho chuke, cher te dikhav kai dian orba manchar.

¹⁸ Na llatar katar lligo ni ka avav iekhe ezgodaia dini kai mangav sikavav chuke. Ta vou phenda leke: Ka aduricharav tut lligo ni ka ave.

¹⁹ Kana o Gedeon chirada iekhe busno, lia bis kile arina ta cherda marrne kai inai len levadura. Thoda o mas ando iek bardako ta o kaldo ande iek kavi ta inllarda le kai e ensina.

²⁰ Ondaka o suecho e Devleko phenda leke te thovel o mas ta o marrno pe iek pechina ta te chudel pe lende o kaldo. Kana o Gedeon cherda so phenda leke,

²¹ o suecho dodisarda pe rovliaia o mas ta e marrne ta katar e pechina likisto iag ta phabarda o mas ta marrne. Mapalal o suecho e Devleko sumbisailo.

²² Ta kana o Gedeon acharda kai saia o suecho e Devleko, phenda: ¡Tesko mange Devla! ¡Dikhlem o mui katar o suecho e Devleko!

²³ Ta o Del phenda leke: Na dara, ni ka mere. Salami chuke.

²⁴ Ondaka o Gedeon vazdia iek altar e Devleke ta ikharda le O Del si e pas kai llik akana si ande Ofra katar e familia e Abiezereki.

²⁵ Ta orachaia o Del phenda e Gedeoneke: Le chuke iek guruv katar cho dad, aver guruv efta bursenge ta zatrisar o altar e Baaleke kai si le cho dad ta chin e slika katar e Asera kai si pasa le,

²⁶ vazde iek altar e Devleke cho Del upral pe gaia pechina. Cher iag e kastenchar katar e slika e Aseraki kai chindan ta de kurbano o duito guruv.

²⁷ Ondaka o Gedeon lia des katar leke sluge ta cherda sa so phendaia leke o Del. Samo kai ni cherda le ollivesea, cherda le orachaia soke darala katar po dad ta e llene katar o foro.

²⁸ Thiarinako kana e llene katar o foro ustile, dikhle kai o altar e Baaleko ta e slika e Aseraki kai saia pasa le sea peradine, ta i kai iek guruv diea le kurbano ando nevo altar.

²⁹ Nesave puchena: ¿Ko cherda gava? Rodie ta puchle but ko saia kai cherda gaia ezgoda, ta phende lenge kai saia o Gedeon chavo katar o Joas. Ta llele kai o Joas ta phende leke:

³⁰ Ikan avri che chave soke ka mundara le. ¡Perada o altar telal tala e ensina ta chinda e slika e Aseraki!

³¹ A o Joas phenda lenge: ¿Tumen ka arakhen e Baale ta ka maren tumen pala le? ¡Te merel oma te pharron e zore suako lleno kai mangel te arakhel e Baale! Te si kai vou si o Del te arakhelpe isto vou pe! soke o altar saia leke.

³² Sar kotar ikharde e Gedeone Jerubaal ta phenena: Te marelpe lea o Baal, soke o Gedeon peradaia o altar e Baaleke.

³³ Ondaka e madianitura ta e amalekitura ta e llene katar o oriente chidinaile, nakhle o Jordan ta logle ande bari umal katar o Jezreel.

³⁴ Ta o duo e Devleko avilo po Gedeon, ondaka o Gedeon basalda e tuturuga ta e abiezeritura avile te chidiniaon lea.

³⁵ Ta o Gedeon bichalda llenen te ikharen sa e vicha e Manaseki te chidiniaon lenchar. Ta i bichalda llenen te ikharen e viche e Asereki, e Zabulonoki ta e Neftalieki kai likiste te chidiniaon lea.

³⁶ Ta o Gedeon phenda e Devleke: Te si kai de istina ka bradui e Israele cheres mo va sar phendan le,

³⁷ me ka thovav iek morchi balali katar iek bakri po than kai ikanen o lliu. Te si chingi thiarinako e morchi katar o bursin kai perel katar o miloso a e phuv suki, ka llanav kai cheres mo va ka bradui e Israele sar phendan le.

³⁸ Ta gia saia. Kana o Gedeon ustilo thiarinako chedosarda e morchi ta ikanda letar taso pherdo pai.

³⁹ A o Gedeon phenda: Na joliao pe ma te puchav tut pale. Mangav te dikhav samo iek drom ios. Cher akana te achel suki e morchi ta e phuv chingi.

⁴⁰ Gaia riat o Del cherda le gia. Thiarinako e morchi saia suki ta e phuv chingi katar o bursin kai perel katar o miloso.