Jueses 5 - Biblia ande chib Romani

E llili katar e Debora ta o Barak

¹ Gua llive e Debora ta o Barak chavo katar o Abinoam llilabie gia:

² Blagosin e Devle, soke ando Israel si llene kai si lacharde te marenpe, soke ando foro si murusa kai kanden te llan po maripe.

³ ¡Asunen man tumen e charura! ¡Asunen man tumen e gazda! ¡Me ka llilabav e Devleke! ¡ka llilabav e Devleke e Israeleko!

⁴ Kana tu Devla likistan katar o Seir, kana llelan ande vostanura katar o Edom, e phuv dermosaili ta katar e oblakura perade po bursin.

⁵ Angla tu Devla, angla tu Devla e Israeleko e burdura dermosaile, o Sinai dermosailo.

⁶ Ande llivesa katar o Samgar chavo katar o Anat, ande llivesa katar o Jael, achile chudine po drom, ta gola kai llana pe lache droma, lleletar pe droma darane.

⁷ E forichura katar o Israel achile mukle. Ondaka saia kana me ustilem, ¡me, Debora, iek dei e Israeleki!

⁸ Kana esvirina neve delen o maripe saia po udar e foroko, a ni dikhola ni iek eskudo ta ni iek jarni maskar saranda milie israelitura.

⁹ ¡Me dav mo lio pala e mai preche gazda katar o Israel, pala e llene katar mo foro kai kandie te llan po maripe! ¡Blagosin e Devle!

¹⁰ Phenen le tumen kai llan pe magarche parrne, tumen kai gazdarin ande krisa, ta tumen kai llan ande aver phuvia,

¹¹ ¡incha maskar e bunaria kana asundon e kasta po pai Phenen kai o Del dobisarda. Dobisarde e forichura katar o Israel.

¹² ¡Uste Debora, uste, uste ta llilabe iek llili. Uste Barak chavo katar o Abinoam, ta inllar che phanglen!

¹³ Ondaka fuliste e israelitura te marenpe e llenenchar zurale, pala ma fuliste e boñikura katar o Del te marenpe e murusenchar marimake

¹⁴ Nesave llene katar o Efrain avile ande bari umal ta palal lendar e boñikura katar o Benjamin. Katar o Makir fuliste e gazda, ta katar o Zabulon gola kai gazdarina.

¹⁵ Ta i avile e Deboraia e gazda katar o Isakar o Isakar pomozisarda e Barake, soke llelo palal letar ande bari umal. Te si kai maskar e boñikura katar o Ruben si murusa tromane,

¹⁶ ¿soke achile maskar e stoke, te asunen sar e chobanura ikharen pe bakren? ¡Maskar e boñikura katar o Ruben si murusa darane!

¹⁷ O Galaad achilo ando pero pe ogoia rig katar o Jordan. O Dan achilo maskar e llimie, ta o Aser pasa e mora ta ni miskosailo katar e forura kai si pasa e mora,

¹⁸ a ande vostanura kai si upre, o Zabulon ta o Neftali thode lengo zivoto ande bari dar.

¹⁹ Ondaka avile e charura ando Taanak pasa e paia katar o Megido e charura kananeura avile te marenpe ta ni lie rup ta barvalipe.

²⁰ Katar o miloso e cheraia mardepe e Sisarea,

²¹ o paiorro, o phuro paiorro, o paiorro katar o Kison inllarda len sa. ¡Tu ka rrani e kor katar e zurale!

²² ¡Asundol e challia katar e gra! ¡Prasten, prasten e gra katar e tromane!

²³ Ta o suecho e Devleko phenel: ¡Te perel iek bari prokestia po Meroz ta leke llene! soke ni llele sargo e tromane, te pomozin e Devle.

²⁴ ¡Te avel blagosime e Devletar e Jael, rromi katar o Jeber kenita! ¡Blagosime te avel maskar e diskinie katar o pero!

²⁵ O Sisara mangla pai, ta e Jael dia le thud. ¡Thulo thud dia le ando iek taso sukar!

²⁶ Ta lia o chilo pe vastea stingo ta lia o chokano pe vastea chachi ta dia ando soro katar o Sisara pharrada ta ranisarda leko chikat.

²⁷ O Sisara dermolape pe porrne katar e Jael, dukhatar pelo pe phuv, ta kote kai pelo, kote achilo mulo.

²⁸ E dei katar o Sisara brigime dikhela katar e penllerava ta phenela: ¿Soke ni avel leko bordon? ¿Soke ni avel oma leko bordon marimako?

²⁹ Ta nesave bizai diskinie phenena lake ta i von phenena peke:

³⁰ Sai te avel kai fulavel so lie ando maripe. Iek slugicha o dui slugiche suakone boñikoke, e Sisarake chitura sukar, iek chiti, dui chitura, kai suven len but sukar e gazdenge kai dobisarde.

³¹ ¡Gia te meren che dusmanura Devla, a gola kai volin tut te aven sargo o kham kana kletosarel zurale! Mapalal katar gale ezgode saia pas ande phuv saranda bursa.