Jueses 4 - Biblia ande chib Romani

E Debora ta o Barak dobin e Sisara

¹ Mapalal kana mulo o Ejud, e israelitura pale cherde o bilachipe angla e akha e Devleke,

² goleke o Del cherda te dobil len o Jabin charo katar e Kanaan ando Jasor, kai o gazda katar leke boñikura saia o Sisara kai zivila ando Jaroset Goim.

³ Ondaka e israelitura ikharde e Devle soke e Jabine sea inia stotine bordona sastrune ta ande bis burs o Jabin saia but bilacho lenchar.

⁴ Ande gua vreme gazdarila ando Israel iek porauka katar o Lapidot kai ikhardola Debora.

⁵ E Debora suako drom besela telal iek palmera ando Rama ta Bet El, po burdo katar o Efrain. Ta e israelitura avena late te krisil len.

⁶ Iek drom e Debora ikharda iekhe llene kai ikardola Barak chavo katar Abinoam kai zivila ando Kedes, iek foro katar e vicha e Neftalieki, ta phenda: O Del e Israeleko phenel chuke gia: Lla po burdo o Tabor ta chide kote des milie murusa katar e vicha e Neftalieki ta e vicha e Zabulonoki,

⁷ ta me ka cherav e Sisara gazda e boñikonengo katar o Jabin, te avel ando paiorro katar o Kison te marelpe tuia pe bordonenchar ta pe boñikonenchar, a me ka dav le ande che va.

⁸ Ta o Barak phenda lake: Ka llav samo te ave tu manchar, soke te na me ni ka llav.

⁹ Ta e Debora phenda: Ka llav tuia samo kai o baripe ni ka avel chiri soke o Del ka del tut e Sisara ande che va cheres iek diskinia.

¹⁰ Kote o Barak ikharda e llenen katar e vicha e Zabulonoki ta e Neftalieki ta chidia tala po gazdaripe des milie murusa. E Debora llala lea.

¹¹ Pasa e ensina katar o Saanaim ando Kedes saia o pero katar o Jeber kenita. O Jeber fuladilo katar ogola kenitura kai sargo vou, sea chave katar o Jobab o sastro e Moiseko.

¹² Kana o Sisara llangla kai o Barak likisto po burdo o Tabor,

¹³ chidia inia stotine bordona sastrune ta sa leke boñikura, ta llelo lenchar katar o Jaroset Goim llik o paiorro katar o Kison.

¹⁴ Ondaka e Debora phenda e Barakeke: ¡Lla angle! ¡Akana si kana o Del ka del tut ande che va e Sisara! ¡O Del llal angla che boñikura! Ta o Barak fulisto katar o Tabor dese milienchar boñikura,

¹⁵ ta o Del zatrisarda e Sisara sa leke bordonen ta leke boñikonen kana mardepe e Barakea. Ta o Sisara fulisto katar po bordon ta naslo.

¹⁶ Ondaka o Barak rodia e boñikonen ta e bordonen llik o Jaroset Goim. Gua llive ni achilo llundo ni iek boñiko katar o Sisara, sa mule.

¹⁷ Ta o Sisara naslo peske kai e chara katar e Jael e rromi katar o Jeber kenita, soke saia pas maskar o Jabin o charo katar o Jazor ta e familia katar o Jeber kenita,

¹⁸ ta e Jael likisto te lel le, ta phenda leke: Katar mo gazda, nak andre, na dara. O Sisara dia andre. E Jael guruda le ta ucharda le iekhe chitea,

¹⁹ ondaka o Sisara mangla latar pai soke saia but trusalo. E Jael putarda iek morchi kai ande la voi guruvela thud, dia le te piel ta pale ucharda la.

²⁰ Ta o Sisara phenda lake: Achi po udar katar e chara, te si kai fiko avel ta puchel dal sem andre, phen leke kai iok.

²¹ O Sisara saia but chinio ta thodape te sovel. Ondaka e Jael lia iek chokano ta iek chilo katar e chara, avili polokorre kai saia o Sisara ta ranisarda le e chiloa po chikat, ta o chilo dia ande phuv. Gia mulo o Sisara.

²² Kana o Barak avilo kai o Sisara, e Jael likisti te lel le ta phenda leke: Aide, me ka sikavav tut e llene kai rode. O Barak dia andre ande chara ta dikhla e Sisara inzardo pe phuv, mulo ta o chilo thodo po chikat.

²³ Gia o Del thoda ando lallao angla e israelitura e Jabine, o charo katar o Kanaan.

²⁴ Sar kotar e israelitura cherdile suako drom mai zurale lligo ni zatrisarde e Jabine.