Jueses 2 - Biblia ande chib Romani

O suecho e Devleko ando Bokim

¹ O suecho e Devleko llelo katar o Gilgal llik o Bokim ta phenda e israelitonenge: Me ikandem tumen katar o Ejipto ta andem tumen ande e phuv kai jalem sovel kai ka dav la tumare daden kana phendem lenge: Nikada ni ka phagav mo alav kai diem tumen,

² samo te na achen po alav e llenenchar kai zivin ande phuv, ta zatrisaren lenge thana kurbanoke. A tumen ni kandien, ¡dikhen so cherden!

³ Goleke akana phenav tumenge kai ni ka tradav gale llenen angla tumen. Von ta lenge delen ka cheren tumen te peren.

⁴ Kana o suecho e Devleko dia gaia orba, sa e israelitura thodepe te roven.

⁵ Goleke thode o anav katar gua than Bokim, ta kote die kurbanura e Devleke.

O meripe katar o Josue

⁶ Kana o Josue bichalda e israelen te llantar, suako lleno llelo kai pi phuv te zivil ande la.

⁷ E israelitura radisarde e Devleke ando sa o vreme kana zivila o Josue. Ta sa o vreme kai zivisarde e purane kai llanena so cherdaia o Del e israelitonenge.

⁸ Ta o Josue mulo kana sea leke stotina ta des burs.

⁹ Ta prajosarde le ande pi phuv Timnat Seraj kai si po burdo Gaas ando Efrain.

¹⁰ Ta mule sa e israelitura kai zivina ando vreme katar o Josue. Ta gola kai biandile mapalal ni pinllarena e Devle ta e bare ezgode kai o Del cherdaia e Israeleke.

E israelitura muken e Devle

¹¹ A e ezgode kai cherde e israelitura sea bilache angla o Del soke thodepe te blagosin e Baale.

¹² Ta mukle e Devle, o Del lenge puranengo kai ikanela len katar o Ejipto ta thodepe te blagosin delen katar e llene kai zivina truial. Goleke jolailo o Del.

¹³ Mukle e Devle te sai blagosin e Baale ta e Astarote,

¹⁴ goleke jolailo o Del po Israel ta cherda te aven chorane te vazden len so sea len, ta i cherda te dobin len lenge dusmanura kai sea truial lendar ta nasti mardepe lenchar.

¹⁵ Suako drom kana e israelitura llana po maripe o Del cherela te na dobin, sar phendaia le o Del.

¹⁶ Ondaka o Del vazdia krisarien te bradui len katar e kochkaria kai chorena len.

¹⁷ Ta ni asunde e krisarien soke blagosisarde avere delen. Lenge dada sea orta angla o Del ta kandie o zakono e Devleko, a von ni cherde gia.

¹⁸ Suako drom kana o Del vazdela iek krisari, o Del pomozila le ta braduila len katar lenge dusmanura ando sa o vreme katar gua krisari. Soke avela zao e Devleke kana asunela lengo roipe ta urkipe kana patina len lenge dusmanura.

¹⁹ Ta kana merela o krisari, von pale cherena o bilachipe ios mai gore neko lenge dada ta blagosina avere delen. Nikada ni mukle te cheren e ezgode bilache ta te llan po lengo bilacho drom.

²⁰ Goleke o Del jolailo po Israel, ta phenda: Gala llene phagen o alav kai achilem pe dadenchar ta ni kamen te kanden man.

²¹ Goleke me ni ka tradav pale e foronen kai o Josue tradia omanglal te merel.

²² O Del mangel te dikhel dal e israelitura ka llan po drom e Devleko sar llelea lenge dada.

²³ Goleke ni tradia sa gola foronen kai ni dialen ande va e Josueke, ta mukla len te achen ande phuv.