Jueses 19 - Biblia ande chib Romani

O levita ta e konkubina

¹ Ande llivesa kana ni saia charo ando Israel, iek levita kai zivila pe rig mai dur katar o burdo o Efrain lia iekhe konkubinaia katar o Belen katar o Juda.

² A e konkubina jolaili lea ta llelitar kai po dadeko cher ando Belen katar o Juda ta achili incha star chon.

³ Ta lako rrom llelo pala la, te irilpe laia. Inllarda pea dui sluge ta dui magarchura, ta voi lia le ando dadeko cher.

⁴ Ta i lako dad lia le veselimaia ta mangla letar te achen lete. Ondaka o levita ta leke sluge achile lete trin llivesa, jana, piena ta racharena.

⁵ Ando starto llive ustile thiarinako rano te llantar, o sastro katar o levita phenda leke: Ja kotor marrno oma te llantar te le chuke zor.

⁶ Ta e dui besle te jan ta te pien, ta o sastro katar o levita mangla letar te achel ios aver riat.

⁷ Ta kana o levita ustilo te llaltar, leko sastro pe gachin mangla letar ta achel kai o levita pale achilo te racharel.

⁸ Ando panchto llive o levita ustilo rano te llaltar, ta pale o dad katar e konkubina mangle letar te jal fiso oma te llantar te sai len zor. Gia jale e dui.

⁹ Ta kana o levita llalatar pe konkubinaia, leko sastro cherda le te irilpe soke perela e riat ta phenda leke te racharel ios aver riat te sai llaltar thiarinako rano.

¹⁰ A o levita ni kamla te achel ios aver riat ta llelotar, ta pe konkubinaia ta leke dui magarche avilo ando Jebus kai si o Jerusalem.

¹¹ Ta o sluga phenda e leviteke: ¿Soke ni rachara ande gava foro katar e jebuseura?

¹² Ta o levita phenda leke: Ni ka nakha pe ni iek foro kai inai katar o Israel, soke ka lla ande Gibea

¹³ ta kote ka rachara, ande Gibea o ande Rama.

¹⁴ Ta llele po drom ta kana perela e riat avile ande Gibea, iek foro katar e vicha e Benjamineki.

¹⁵ Ondaka die ande Gibea te racharen, ta o levita llelo te besel pe plasa katar o foro soke niko ni dela le iek soba te sai racharel.

¹⁶ Kana peli e riat nakhlo iek phuro kai avela katar po rado ando vos. Gava phuro saia katar e burdura Efrain ta zivila ando Gibea makar ni saia katar gua foro, soke e llene kai zivina ande Gibea sea katar e vicha e Benjamineki.

¹⁷ Ta kana o phuro dikhla pe plasa e levita, puchla le: ¿Katar ave ta kai lla?

¹⁸ Ta o levita phenda leke: Amen sam kate te rachara. Ava katar o Belen katar o Juda ta lla pe rig mai dur katar o burdo Efrain, kotar sem. Llav karing o cher e Devleko ta niko ni dia man kate iek soba te racharav.

¹⁹ Si amen te da te ja e magarchonenge, marrno ta mol me rromiake, me slugake ta mange. Niso ni trubul amenge.

²⁰ A o phuro phenda leke: Te avel pas ande tute. Me ka dav tut sa so trubul chuke. Ni ka mukav tut te rachare pe plasa.

²¹ Ta o phuro inllarda le kai po cher ta dia e magarchonenge te jan. Jaladepe e porrne, jale ta pile.

²² Ondaka kana sea vesele, avile bilache llene katar o foro, truisarde o cher, marde po udar ta phende e phureke: ¡Ikan avri e llene kai si tute! ¡Amen manga te sova lea!

²³ A o phuro likisto katar o cher ta molisailo lenge: ¡Na cheren gia phlalalen! ¡Na cheren gaia ezgoda bilachi, vou racharel mande!

²⁴ Kate si murni chorri kai nikada ni sovti ni iekhe murusea, ta e konkubina katar o lleno kai si mande. Cheren lenchar sogo kamena, ta na cher lea gaia ezgoda gia bilachi.

²⁵ A e bilache llene ni kam le te asunel e phure, goleke o levita lia e konkubina ta tradia la avri. Ta e bilache llene mukle la ando lallao sorro riat ta mukle la kana pharrona e zore.

²⁶ Kana pharrona e zore e konkubina irisaile karing o cher e phureko kote kai saia lako rrom, ta muli po udar.

²⁷ Kana lako rrom ta putarda o udar te llaltar po drom, malada e konkubina inzardi ta lake va po udar e chereko.

²⁸ Ta phenda lake: Uste aide. A voi niso ni phenda. Ondaka vou thoda laki esnaga po magarcho ta llelotar po drom kai po cher.

²⁹ Ta kana avilo chere, lie iek churi ta chinda e esnaga e konkubinaki ande desudui kotora, ta bichalda len pe sa e phuv katar o Israel.

³⁰ Ta suako lleno kai dikhela gava, phenela: Sar kana e israelitura likiste katar o Ejipto nikada ni dikhola iek ezgoda sargo gaia. Morabi te misli amen so ka chera.