Jueses 18 - Biblia ande chib Romani

O Mikaias ta e llene katar e vicha e Daneki

¹ Ande gua vreme ni saia charo ando Israel. Ta e llene katar e vicha e Daneki rodena phuv te sai zivin soke ni diea len phuvia maskar e viche katar o Israel.

² Ta e llene katar o Dan bichalde panlle katar lenge murusa, murusa tromane katar e Zora ta o Estaol te sai dikhen e phuv. Gala panch murusa avile po burdo katar Efrain llik kai o cher e Mikaiaseko ta racharde kote.

³ Kana sea ando cher katar o Mikaias llangle katar saia o levita prema sar dela orba, ta puchle le: ¿Ko anda tut karinga? ¿Soke san kate? ¿So rode kate?

⁴ Ta o levita phenda leke e orba kai achiloia lea o Mikaias ta sar thodaia le te avel leko popo.

⁵ Ondaka von phende leke: Puch e Devle te llana sar ka llal amenge.

⁶ Ta o popo levita phenda lenge: Llan esmiro soke o Del ka arakhel tumen kaigo llana.

⁷ Kotar e murusa likiste ta llele ando Lais, ta dikhle kai ando foro ni radina ta ni darana, sar cherenale e sidoniura. Niko ni dela len joli ta sea dur katar e sidoniura, ta ni chinena ni bichinena nikatar.

⁸ Ondaka e panch murusa irisaile ando Zora ta Estaol kai sea lengi familia, ta puchle len: ¿Sar llela tumenge? A von phende:

⁹ Dikhlam goia phuv kai si but sukar. ¡Aide te da pe lende! ¡Na achen kote ta niso ni cheren! ¡Si te lla te la e phuv!

¹⁰ Kana ka aven incha ka dikhen kai e llene si lenge esmiro, si len bari phuv ta ni trubul lenge niso. O Del ka del tumen goia phuv.

¹¹ Ondaka sov stotine murusa e ezgodenchar marimake likiste katar e Sora ta o Estaol,

¹² ta avile ande Juda ta logle pe rig kai perel o kham katar o Kiriat Jearim, goleke llik akana ikharen gua than o pero katar o Dan.

¹³ Kotar llele pe burdura katar o Efrain ta avile kai o cher katar o Mikaias.

¹⁴ Ondaka e panch murusa kai llelea te dikhen e phuv phende pe phlalenge: ¿Llanen kai ande gava cher si iek efod, si terafinura ta iek slik a mardi ando rup? ¿So mislin te cheren?

¹⁵ Ta e panch murusa llele kai o cher katar o levita terno ta puchle le, sar san.

¹⁶ Ta e sov stotine boñikura aduricharena po udar.

¹⁷ E panch murusa die ando cher ta lie e slik a mardi ando rup, o efod ta e terafinura. Ta o popo levita saia po udar e sov stotine boñikonenchar.

¹⁸ Kana o popo dikhla e panlle llenen kai dena ando cher katar o Mikaias ta lena e slik a o efod ta e terafinura, phenda lenge: ¿So cheren?

¹⁹ Ta von phende leke: ¡Tu, na de orba ta aide amenchar! ¡Amen manga te ave amaro popo ta i te ave sargo amaro dad! ¿Inai mai sukar te ave o popo katar iek vicha katar o Israel neko katar samo iek lleno?

²⁰ Ta o popo beselisailo, lia e slik a o efod e terafinura ta llelotar e danitonenchar.

²¹ Ta e danitura pale lleletar po drom e minonenchar e zivirinienchar ta lenge ezgode angle.

²² Kana phirde but o Mikaias ta e llene katar leko cher likiste te roden len.

²³ Kana e danitura asunde o urkipe katar e llene kai rodena len, boldinaile ta dikhle pala pete, ta puchle e Mikaiase: ¿So si chuke? ¿Soke urki gachin?

²⁴ Ta o Mikaias phenda lenge: Tumen lien murne delen kai cherdem, lien mo popo, ni muken man niso ta i puchen man, ¿so si chuke?

²⁵ A e danitura puchle le: Na urkisar pe amende, soke fiko amendar sai te del pe tu ta ka mere tu ta chi familia.

²⁶ Ta kana o Mikaias dikhla kai von sea mai but, irisailo kai po cher ta e danitura llele po drom

²⁷ e ezgodenchar kai liea katar o Mikaias ta e popoia ta avile ando Lais. Kote o foro saia esmiro ta e danitura e jarnienchar mundarde saurren ta phabarde e foro.

²⁸ Ta niko ni likisto te marelpe pala len soke o Lais saia dur katar o Sidon, ta ni sea len niso nikaia. Ta o foro saia ande bari umal kai si pasa o Bet Rejob. Mapalal e danitura pale vazdie e foro ta zivisarde ande le.

²⁹ Ta ikharde e foro Dan, sargo ikharena lenge dade chavo katar o Israel, makar omanglal ikharena gale foro Lais.

³⁰ Ta e danitura thode e slik a te blagosin la. Ta o Jonatan chavo katar o Gerson ta unuko katar o Moises, vou ta leke chave sea popura katar e vicha e Daneki llik kana inllarde len phangle.

³¹ Gia achili e slik a katar o Mikaias sa o vreme kana o cher e Devleko saia ando Silo.