Jueses 17 - Biblia ande chib Romani

E slike ta o popo katar o Mikaias

¹ Po burdo katar o Efrain saia iek lleno kai ikhardola Mikaias.

² Ta phenda pe dake: E milia ta stotina tolaria rupune kai vazdie tutar ta kai proketisardan e chorano, mande si. Me vazdiamlen tutar, a akana me iriulen chuke. Ondaka leki dei phenda leke: ¡Te ave blagosime e Devletar chavo murno!

³ Ta vou irisarda lake e milia ta stotine tolaria rupune, ta leki dei phenda leke: Me diem e love dine e Devleke pala mo chavo te cherav iek slik a mardi ande rup.

⁴ Kana vou irisarda e love, leki dei lia dui stotine tolaria ta dialen e lleneke kai bilavel o rup ta cherda lenchar iek slik a ta thodela ando cher katar o Mikaias.

⁵ E Mikaiase sea ande po cher delen, ta cherda iek efod ta terafinura ta thoda iekhe katar leke chave te avel leko popo.

⁶ Ande gua vreme ni saia charo ando Israel goleke suako lleno cherela po piro.

⁷ Ta ando Belen saia iek lleno terno katar e vicha e Judaeki kai saia levita ta zivila kote.

⁸ Gava lleno terno likisto katar o Belen katar o Juda te sai zivil kai malavela than. Ta avilo ando burdo katar o Efrain kai o cher katar o Mikaias.

⁹ Ta o Mikaias puchla le: ¿Katar ave? Ta o lleno terno phenda leke: Avav katar o Belen, sem levita ta rodav mange kai te ziviv.

¹⁰ Ondaka o Mikaias phenda leke: Achi mande te ave mo popo ta mo dad. Ta me ka dav tut suako burs des tolaria rupune, patave ta jape.

¹¹ Ta o levita achilo te zivil e Mikaiasea ta cherdilo sargo iek katar e chave katar o Mikaias.

¹² O Mikaias thoda le leko popo, ta achilo te zivil kote.

¹³ Ondaka o Mikaias mislisailo kai pala gua o Del ka blagosil le, soke lete saia iek levita.