Jueses 14 - Biblia ande chib Romani

O Sanson zinilpe

¹ Iek drom o Sanson fulisto ando Timna ta dikhla iekhe chorra katar e filisteura,

² ta kana irisailo chere phenda le pe dadenge: Me moliv man tumenge te den man goia chorri katar o Timna te ziniuman laia.

³ A leke dada phende lenge: ¿Soke mange te zinito iekhe chorraia katar gola filisteura kai blagosin avere delen? ¿Inai chorra ando amaro foro kai lla maskar e filisteura te rode chuke chorri te zinito? Ta o Sanson phenda lenge: Mange drago goia chorri te ziniuman laia.

⁴ Ta leke dada ni llanena kai o Del cherela sa gala ezgode te sai del pe filisteonen, soke ande gua vreme e filisteura gazdarina pe phuv.

⁵ Goleke o Sanson ta leke dada llele ando Timna. Ta kana o Sanson avilo ande vostanura drakhake likisto iek liono terno ta dia pe lete.

⁶ Ondaka o duo e Devleko avilo po Sanson ta zatrisarda e liono sargo kana o liono saia iek busno. Ta ni phenda pe dadenge so nakhla.

⁷ Mapalal llelo te dia orba e chorraia kai saia drago leke.

⁸ Nesave llivesa mapalal o Sanson irisailo te zinilpe e chorraia, ta durisailo katar o drom te dikhel e liono kai mundardaia, ta dikhla kai pe esnaga e lionoki sea bindiorura ta aullin.

⁹ Ta o Sanson ikanda aullin ta jalale po drom. Kana avilo kai pe dada dia len katar o aullin te jan i von, ta ni phenda lenge kai ikandaiale katar o liono mulo.

¹⁰ Ondaka o dad e Sansoneko llelo te del orba e chorraia, ta o Sanson cherda iek jape sar cherenale e chaurre.

¹¹ Ta kana dikhle e Sansone lie tranda amalen te aven lea.

¹² Ta o Sanson phenda lenge: Te apogodina ande efta llivesa so ka puchav tumen, me ka dav tumen tranda gertacha katar o lino ta tranda patave sukar te thovenpe po jape.

¹³ A te na apogodin suako iek tumendar ka del man iek gertachi katar o lino ta patave sukar te thovenpe po jape. A von phende leke: Phen amenge so mange te puche amen.

¹⁴ Ta o Sanson puchla len: Katar o gua kai jala likisto jape, ta katar o zuralo likisto guglipe. Kana nakhle trin llivesa von ni llanena so puchela len.

¹⁵ Kana nakhle efta llivesa phende e rromiake katar o Sanson: Phen che rromeke te phenel amenge so saia so puchela amen soke te na, amen ka phabara tut ta chi familia. ¡Tumen ikharden amen po jape samo te len amare ezgode!

¹⁶ Ondaka voi lleli kai o Sanson ta rovindo phenda leke: ¡Tu ni voli man! ¡Tu murzi pe ma! Puchlan e chaurren ta ni kame te phene mange so si so puchlan. Ta o Sanson phenda lake: Ni phendem le me dake ta ni me dadeke, ¿sar ka phenav le chuke?

¹⁷ Ta voi rovela pasa le e efta llivesa katar o jape ta gachin droma voi puchla le kai o Sanson ando eftato llive phenda lake so saia so puchla e chaurren. Ondaka voi lleli ta phenda lenge.

¹⁸ Ando eftato llive omanglal te perel o kham, e filisteura llele te phenel e Sansoneke: Niso inai mai guglo neko o aullin, ta niso si mai zuralo neko o liono. O Sanson phenda lenge: Samo soke radisarden e phuv me telchaia, llanglen so puchava tumen.

¹⁹ Ta o duo e Devleko avilo po Sanson. Ondaka o Sanson llelotar ando Askalon ta mundarda tranda llene ta lia lendar lenge patave kai dialen e llenen kai llangle so puchela, ta joliariko irisailo kai pe dadeko cher

²⁰ Ta leki rromi diela te zinilpe pala iek katar leke amal.