Jueses 13 - Biblia ande chib Romani

O Sanson

¹ A e israelitura pale cherde o bilachipe angla e akha e Devleke, goleke o Del dialen ande va katar e filisteura saranda burs.

² Ta saia iek lleno ando Zora katar e vicha e Daneki kai ikhardola Manoa. Leki rromi nasti achela phari ta ni sea la minone.

³ Ondaka o suecho e Devleko sikadilo lake ta phenda lake: Tu kai nikada ni avile chuke minone, ka ache phari ta ka maladol chuke iek chaurro.

⁴ Na pi mol ni rachia ta na ja niso pogano,

⁵ soke ka maladol chuke iek chaurro kai ni ka chine letar leke bal, soke gua chaurro ka avel nazareo, dino e Devleke, ta ka braduil e Israele katar e filisteura.

⁶ Ondaka e diskinia lleli te phenel pe rromeke so nakhlaia, ta phenda leke: Iek lleno e Devleko avilo mande, ta dikhola sargo suecho e Devleko. Ni puchlem le ko saia ta vou ni phenda le mange.

⁷ Ta phenda mange kai ka maladol mange iek chaurro, goleke morabi te na piav mol ni rachia ta te na jav niso pogano, soke o minono ka avel dino e Devleke sargo nazareo omanglal te biandol.

⁸ Ondaka o Manoa molisailo e Devleke ta phenda: Me moliv man chuke Devla te bichale pale gole llene te sai phenel amenge so morabi te chera e minonea kai ka biandol.

⁹ Ta o Del pale bichalda e suecho e diskiniake kana voi saia ando vos, a lako rrom o Manoa ni saia kote,

¹⁰ ta voi prastia te phenel leke: ¡Asun, o lleno kai sikadilo mange o gua llive, pale dikhlem le!

¹¹ Ondaka o Manoa ustilo ta llelo laia kai saia o lleno, ta o Manoa puchla le: ¿Tu san o lleno kai dia orba me rromiake o gua llive? Ta o lleno phenda: Ea, me sem.

¹² Ondaka o Manoa phenda leke: Kana ka cherdol so phendam amenge, ¿sar morabi te bariara e minone? ¿So morabi te chera lea?

¹³ Ta o suecho e Devleko phenda: Te cherel chi rromi sa so phendem lake.

¹⁴ Te na piel niso cherdo katar e drak, te na piel mol ni rachia, te na jal niso pogano.

¹⁵ Ta o Manoa ni llanela kai o lleno saia o suecho e Devleko,

¹⁶ ta phenda leke: Na llatar, achi te ja amenchar iek busno kai ka chirava. Ta o suecho phenda leke: I te achava nasti jav tumenchar. A o busno sai te de le kurbano e Devleke.

¹⁷ Ondaka o Manoa phenda e suechoke: Phen amenge sar ikhardo tu te sai da liubao chuke kana ka cherdol so phendan.

¹⁸ A o suecho phenda: ¿Soke mange te llane mo anav kai si but sukar?

¹⁹ Ta o Manoa lia o busno ta ezgode dine ta dialen kurbano e Devleke pe iek pechina. Ondaka o suecho e Devleko cherda iek bari ezgoda Devlikani.

²⁰ Soke kana likisto iag katar o altar, o Manoa ta leki rromi dikhle sar o suecho e Devleko likisto ando miloso ande iag. Ondaka die changenchar lligo lengo chikat dodisarde pe phuv.

²¹ Ta o Manoa acharda kai o lleno saia o suecho e Devleko, soke ni sikadilo ios ni leke ta ni lake rromiake,

²² ta phenda pe rromiake: De istina amen ka mera soke dikhlam e Devle.

²³ A voi phenda leke: Te mangela mundarel amen o Del, ni liea amaro kurbano ta amari ezgoda dini, ni sikadaia amenge sa gale ezgode, ta i ni phendaia amenge so ka cherdol.

²⁴ Ta avilala e diskiniake iek minono ta thoda leko anav Sanson. Ta o minono barilo ta o Del blagosisarda le.

²⁵ Ta o duo e Devleko thodape te avel po Sanson ando vos katar o Dan, maskar Zora ta Estaol.