Jueses 10 - Biblia ande chib Romani

O gazdaripe katar o Tola

¹ Mapalal katar o Abimelek, iek lleno katar e vicha e Isakareki kai ikhardola Tola, chavo katar o Pua ta unuko katar o Dodo, vazdinailo te braduil e Israele. O Tola zivila ando Samir po burdo katar o Efrain.

² Ta o Tola gazdarisarda ando Israel bis ta trin burs. Ta kana mulo prajosarde le ando Samir.

O gazdaripe katar o Jair

³ Mapalal vazdinailo o Jair katar o Galaad, ta gazdarisarda ando Israel bis ta dui burs.

⁴ E Jaire sea le tranda chave kai llana pe tranda magarchura, ta sea len tranda forura ando Galaad kai llik akana ikharen len e forura katar o Jair.

⁵ Kana mulo o Jair prajosarde le ando Kamon.

E amonitura dukhaven e Israele

⁶ A e israelitura pale cherde o bilachipe angla e akha e Devleke ta blagosisarde e Baale ta e Astarte ta i blagosisarde e delen katar e Siria, Sidon, Moab, Amon ta katar e filisteura. Mukle te blagosin e Devle.

⁷ Goleke o Del jolailo pe lende ta dia len e filisteonenge ta e amonitonenge.

⁸ Sar kotar ande desojto burs e filisteura ta e amonitura dukhade zurale e israelen kai zivina ando Galaad, pe ogoia rig katar o Jordan, ande phuv katar e amorreura.

⁹ E amonitura nakhle o Jordan te marenpe e vichenge katar o Juda, Benjamin, ta Efrain. Ta e israelitura sea but brigime.

¹⁰ Ondaka ikharde e Devle ta phende leke: Devla, cherdam o bilachipe angla tu soke muklam tut te sai blagosi avere delen.

¹¹ Ta o Del phenda lenge: E ejipsiura, e amorreura, e amonitura e filisteura,

¹² e sidoniura e amalekitura ta e madianitura dukhade tumen, ta kana tumen ikharden man me braduisardem tumen.

¹³ A tumen muklen man te sai blagosin avere delen. Goleke me ni ka braduiv tumen ios.

¹⁴ ¡Llan kai e delen kai esvirisarden! ¡Von te braduin tumen kana ka aven ande brige!

¹⁵ Ondaka e israelitura vacharde e Devleke: Amen cherdam o bilachipe. Cher amenge sogo kamea, ¡a braduisar amen akana, moli amen chuke!

¹⁶ Ta e israelitura ikande e delen ta blagosisarde e Devle. Ta avilo zao e Devleke kana dikhela sar o Israel nakhela patnia.

¹⁷ Ondaka e amonitura chidinaile ando Galaad. Ta e israelitura chidinaile ta logle ando Mispa.

¹⁸ Ta e mai preche llene ta o foro katar o Galaad phende iek avereke: O purvo lleno kai ka marelpe e amonitonenchar ka gazdaril ando Galaad.