Jueses 1 - Biblia ande chib Romani

O Juda ta o Simeon phanden e Adoni Bezeke

¹ Mapalal kana mulo o Josue e israelitura puchle e Devle savi vicha saia te marelpe oma e kananeonenchar.

² Ta o Del phenda kai e vicha e Judaeki saia te marelpe oma, soke saia te del la gaia phuv.

³ Ondaka e llene katar e vicha e Judaeki ikharde pe phlalen katar e vicha e Simeoneki te pomozin len ando maripe, ta mapalal te den ande phuv kai saia dini e Simeonoke.

⁴ Ondaka e boñikura katar o Juda die ande phuv katar e kananeura ta e ferezeura ta o Del cherda te dobil o Juda. Ta mundarde ando Besek des milie murusen.

⁵ Ta malade e Adonisedeke ando Besek, mardepe lea ta dobisarde e kananeone ta e ferezeone.

⁶ A o Adonisedek naslo, ta von rodie le, phangle le ta chinde o palcho katar e va ta e porrne.

⁷ Ondaka o Adonisedek mothada: Eftavardes charura kai chinde o palcho katar e va ta e porrne chidena e kotora kai muken te peren katar murno stali. Sar cherdem le gia cherda mange o Del. Ta inllarde le ando Jerusalem ta kote mulo.

O Juda lel o Jebron ta o Jerusalem

⁸ E vicha katar o Juda die po Jerusalem ta liela, ta mapalal kana mundarde sa e llenen kai zivina ande late, phabarde e foro.

⁹ Mapalal mardepe e kananeonenchar kai zivina pe burdura ando Negeb ta ande bari umal.

¹⁰ Ta i die pe kananeonen kai zivina ando Jebron kai omanglal ikhardola Kiriat Arba ta dobisarde e Sesaie e Ajimane ta e Talmaie.

O Otoniel lel e foro katar o Debir

¹¹ Mapalal die po foro katar o Debir kai omanglal ikhardola Kiriat Sefer.

¹² Ondaka o Kaleb jala sovel kai ka del leki chorri te zinilpe laia e lleneke kai ka lel e foro katar o Debir.

¹³ Ta o lleno kai lia e foro katar o Debir saia o Otoniel chavo katar o Kenaz, o phlal mai terno katar o Kaleb. Ondaka o Kaleb dia le leki chorri e Aksa te zinilpe laia.

¹⁴ Ta kana voi llala lea, o Otoniel phenda lake te mangel katar po dad iek vostano. Ta kana dikhla o Kaleb kai e Aksa fuliela katar o magarcho, puchla la: ¿So si?

¹⁵ Voi phenda e Kalebeke: Mangav te de man iek ezgoda. Tu dian man phuvia ando Negeb, de man i bunaria paeke. Ta o Kaleb dia la e bunaria kai sea upre ta e bunaria kai sea ta tele.

E phuvia kai lie e viche katar o Juda ta o Benjamin

¹⁶ E chave katar o kenita o sastro e Moiseko, avile katar o foro katar e palmere e chavenchar katar o Juda ando Negeb kai si po pusto pasa o Arad, ta zivisarde e foroia kai zivina kote.

¹⁷ Ondaka e llene katar e vicha e Judaeki llele e llenenchar katar e vicha e Simeoneki ta mardepe e kananeonenchar kai zivina ando Sefat ta zatrisarde e foro. Goleke ikharde e foro Jorma.

¹⁸ Ta i o Juda lia sa e phuv katar e Gaza, sa e phuv katar o Askalon ta sa e phuv katar o Ekron.

¹⁹ Ta o Juda chudia e llenen katar e burdura soke o Del pomozila la. Ta nasti tradel e llene kai zivina ande bare umalia kai sea len bordona sastrune.

²⁰ E Kalebe die o Jebron sar phendaia le o Moises. Ta o Kaleb chudia e trine chave katar o Anak.

²¹ A e llene katar e vicha e Benjamineki nasti tradie e jebuseonen katar o Jerusalem. Goleke llik akana von zivin e jebuseonenchar ando Jerusalem.

E viche katar o Jose len o Betel

²² Ta e viche katar o Jose llele te marenpe e foroia katar o Betel, ta o Del pomozila len.

²³ Ta bichalde llenen te dikhen e foro kai omanglal ikhardola Luz.

²⁴ Ta e llene kai dikhena e foro dikhle iekhe llene kai likela katar o foro, ta phende leke: Te sikave amen sar te da andre ando foro, amen ka ava lache tuia.

²⁵ Ta o lleno sikada len sar te den andre ando foro. Ta kana die andre mundarde saurre llenen kai zivina kote. Ta e llene kai sikada len o drom ni mundarde le ta leki familia.

²⁶ Ondaka gua lleno llelotar ande phuv katar e jititura ta vazdia iek nevo foro ta thoda leko anav Luz, ta gia ikharen le llik akana.

²⁷ E llene katar e vicha e Manaseki nasti tradie e llenen kai zivina ando Bet Sean, Taanak, Dor, Ibleam ta Megido, ta e llenen kai zivina ande forichura kai sea pase. Goleke e kananeura ni mukle te zivin ande gola forura.

²⁸ Ta kana o Israel cherdilo zuralo cherda te pochinen e kananeura love, ta ni tradie len.

²⁹ E llene katar e vicha e Efraineki nasti tradie e kananeonen kai zivina ando Gezer, goleke e kananeura zivin lenchar ando Gezer.

E phuvia kai lie e aver viche

³⁰ E llene katar e vicha e Zabulonoki nasti tradie e kananeonen kai zivina ando Kitron ta Naalal, goleke e kananeura zivin lenchar ta pochinen lenge love.

³¹ E llene katar e vicha e Asereki nasti tradie e kananeonen kai zivina ando Ako, Sidon, Ajlab, Akzib, Jelba, Afek ta Rejob. Ta sar nasti tradie len e kananeura achile te zivin lenchar.

³² Ta o Aser zivisarda maskar e kananeura kai sea pe phuv, soke ni tradia len.

³³ E llene katar e vicha e Neftalieki nasti tradie e kananeonen kai zivina ando Bet Semes ta ando Bet Anat. Ta sar nasti tradie len cherde te pochinen lenge love.

³⁴ E amorreura mardepe e llenenchar katar e vicha e Daneki llik e burdura ta ni mukle len te fulien ande bare umalia.

³⁵ Ta e amorreura ni mukle te zivin po burdo katar o Jeres ando Aialon ta Saalbim. Ta kana e viche katar o Jose cherdile zurale cherde te pochinen lenge love e amorreura.

³⁶ E phuv katar e amorreura saia katar o Akrabim llik o Sela upral.