Juan 9 - Biblia ande chib Romani

O Jesus sastarel iekhe korre

¹ Kana o Jesus avilo, dikhla iekhe llene kai saia korro sar kai biandilo.

² E disipulura puchle le: Kovachi, ¿soke gava lleno biandilo korro? ¿Ko cherda o bilachipe, vou o leke dada?

³ O Jesus phenda lenge: Ni cherda ni vou ni leke dada o bilachipe. Gaia ezgoda avilape gia te sai dikhol e Devleki buchi ande lete.

⁴ So si ollivesea, morabi te cherav e buchi goleki kai bichalda man. E riat avel kana niko nasti radil.

⁵ So avava ando sueto, o villelo e suetoko sem.

⁶ Kana phenda gava, chungardia pe phuv ta cherda glibo pe chungarea ta thoda le pe korreke akha.

⁷ Ta phenda leke: Lla jalau tut ando bunari e Siloeko, kai gua si o Bichaldo. O korro llelo ta jaladape, ta kana irisailo dikhela.

⁸ Ondaka gola kai zivina pasa le ta i gola kai omanglal dikhlea kai mangela esmola puchenape: ¿Inai gava kai besela te mangel esmola?

⁹ Nesave phenena: Vou si. Aver phenena: Iok, sargo vou si. A vou phenela: Ea, me sem.

¹⁰ Ondaka puchle le: ¿Sar akana sai dikhe?

¹¹ Vou phenda lenge: Gua lleno kai ikhardol Jesus cherda glibo ta thoda le pe me akha, ta phenda mange: ‘lla kai o bunari e Siloeko ta jalau tut’ Me llelem, ta kana jaladem man dikhlem.

¹² Ondaka puchle le: ¿Kai talo vou? Vou phenda lenge: Ni llanav.

E fariseura puchen e korre

¹³ Inllarde angla e fariseura e llene kai saia korro.

¹⁴ Ando sabado saia kana o Jesus cherda glibo ta sastardaia leke akha,

¹⁵ A von puchle le: ¿Sar akana dikhe? A vou phenda lenge: Thoda pe me akha glibo, jaladem man, ta akana dikhav.

¹⁶ Nesave fariseura phende: Inai e Devletar gua kai cherda gava soke ni kandel o sabado. Aver phenena: ¿Sar sai cherel gala bare ezgode Devlikane te si bilacho? Ta von janape maskar pete,

¹⁷ ta pale puchle gole kai saia korro: ¿So phene tu katar gua lleno kai putarda che akha? Vou phenda: Me phenav kai vou si profeta.

¹⁸ A e judiura ni pachana kai vou saia korro ta kai leke akha sastilea, ondaka ikharde leke daden e korreke

¹⁹ ta puchle len: ¿Vou si tumaro chaurro? ¿Tumen phenen kai biandilo korro? ¿Sar akana dikhel?

²⁰ Leki dei ta leko dad phende: Amen llana kai vou si amaro chaurro ta i kai biandilo korro;

²¹ A sar dikhel akana, ni llana, ta ko putarda leke akha ni gua ni llana. Puchen isto le, vou ia si baro, isto vou sai phenel tumenge.

²² Leki dei ta leko dad phende gava, soke darana katar e judiura soke phendea kai kogo phenela kai o Jesus si o Mesias, ka traden le katar e khanlliri e judionengi.

²³ Goleke phendea leko dad ta leki dei: Puchen isto le, vou si baro.

²⁴ E judiura pale ikharde gole llene kai saia korro, ta phende leke: Phen amenge o chachipe ando anav e Devleko. Amen llana kai gua lleno si bilacho.

²⁵ Vou phenda: Te si vou bilacho, me ni llanav. Samo llanav kai sema korro ta akana dikhav.

²⁶ Pale puchle le: ¿So cherda chuke? ¿Sar sastarda che akha?

²⁷ Vou phenda lenge: Me phendem tumenge sar, ta ni kamlen te asunen. ¿Soke mangen te phenaule pale? ¿A so? ¿I tumen mangen te aven leke disipulura?

²⁸ Ondaka jolaile pe lete, ta phende leke: Tu san leko disipulo, a amen sam e Moiseseke disipulura.

²⁹ Amen llana kai o Del dia orba e Moisesea, a gua lleno ni llana katar si.

³⁰ O lleno kai saia korro phenda lenge: ¡Savo chudo si gava! Tumen ni llanen katar si vou, a vou sastarda me akha.

³¹ Saurre llana kai o Del ni asunel e bilachen, o Del samo asunel golen kai blagosin le ta kanden le.

³² Ta nikada ni asundilo kai vareko sastarda e akha iekhe lleneke kai biandilo korro.

³³ Gava lleno te na aviloa e Devletar, nasti cherdaia niso.

³⁴ Ondaka phende leke: Tu biandilan ando bilachipe, ¿a tu ka sikave amen? Ta tradie le katar e khanlliri e judionengi.

E korre ando duo

³⁵ O Jesus asunda kai tradie katar e khanlliri e judionengi gole llene kai sastardaia leke akha, ta kana malada le, puchla le: ¿Pacha tu ando Chavo e Manuseko?

³⁶ Vou phenda leke: ¿Phen mange ko si vou, te sai pachau ande lete?

³⁷ O Jesus phenda leke: Tu dikhlan le: Me sem kai dav tuia orba.

³⁸ Ondaka gua lleno dia changa angla o Jesus, ta phenda: Pachau, Gazda ta blagosisarda le.

³⁹ Ondaka o Jesus phenda: Me avilem ande gava sueto te cherav kris, te sai dikhen e korre, a gola kai dikhen, te sai korraon.

⁴⁰ Nesave fariseura kai sea lea, kana asunde gaia orba puchle le: ¿So i amen sam korre?

⁴¹ O Jesus phenda lenge: Te avilena korre, ni avilaia tumen bilachipe. A akana soke phenen kai dikhen, tumen sen dosale.