Juan 8 - Biblia ande chib Romani

¹ A o Jesus llelotar po burdo e Maslinkengo,

² ta thiarinako rano pale irisailo kai o cher e Devleko. E llene avile lete ta vou besindo sikavela len.

³ Ondaka e kovacha e zakonoke ta e fariseura ande lete iekhe diskinia kai maladea ando kurvaluko, ta thode la po maskaral katar sa e llene,

⁴ ta phende leke: Kovachi, maladam gale diskinia kana cherela o kurvaluko.

⁵ Ando zakono, o Moises phenel amenge te mundara barrenchar gale diskinien. ¿A tu so phene?

⁶ Von phenena gava te zumaven le, te sai dosaren le. A o Jesus bangilo ta thodape te pisil pe phuv e naiea.

⁷ Ta sar von puchena le but droma, ortosailo ta phenda lenge: Te chudel o purvo barr ko tumendar ni cherda bilachipe.

⁸ Ta pale bangilo ta i pale thoda te pisil pe phuv.

⁹ Kana von asunde gava achardepe dosale ta thode te llantar iek pala iek, katar o mai purano llik kai o mai terno. Kana o Jesus dikhla kai achilo samo vou ta e diskinia kai achilia po maskaral,

¹⁰ ortosailo ta puchla la: Chei, ¿kai talen gola kai dosarena tut? ¿Niko ni dosarel tut?

¹¹ Voi phenda: Ea Gazda niko ni dosarda man. O Jesus phenda lake: Ni me ni dosarav tut, llatar ta na cher ios o bilachipe.

O Jesus, o villelo e suetoko

¹² O Jesus pale dia orba e llenenge, ta phenda lenge: Me sem o villelo e suetoko. Ko pachal ande ma, ni ka llal ando truniariko ta ka avel le o villelo e zivotoko.

¹³ Ondaka e fariseura phende leke: Tu de orba isto tutar: Gola orbe inai chache.

¹⁴ O Jesus phenda lenge: Te dav orbe chache isto me mandar, so phenav si o chachipe, soke llanav katar avilem ta i kai llav, a tumen ni llanen le.

¹⁵ Tumen krisisaren sar krisisaren e manusa. Me ni krisisarav nika,

¹⁶ a te krisisarava, mi kris si chachuni, soke inai sem korkorre, soke o Dad kai bichalda man, i vou krisisarel manchar.

¹⁷ Ande tumaro zakono phenel kai dui llene te dena isto iek orba gua si chachipe.

¹⁸ Isto me dav orba lachi me mandar, ta o Dad kai bichalda man, i vou del orba lachi mandar.

¹⁹ Von puchle le: ¿Kai talo cho dad? O Jesus phenda lenge: Tumen ni pinllaren man, ta ni pinllaren me Dade. Te pinllardena man, pinllardena i me Dade.

²⁰ O Jesus phenda gala alava kana sikavela ando cher e Devleko kote kai guruvena e love kai dena e Devleke. Ta niko ni phangla le soke ni ios ni aviloa leko llive.

Kai me llau, tumen nasti llan

²¹ O Jesus phenda lenge pale: Me llautar, ta ka roden man, A ka meren ande tumaro bilachape, kote kai me llau tumen nasti llan.

²² Ondaka e judiura thode te phenen: ¿So, ka mundarel isto vou pe, soke phenel: Kote kai me ka llau tumen nasti llan?

²³ O Jesus phenda lenge: Tumen sen katar e phuv, me sem katar o miloso, tumen sen katar gava sueto, me ni sem katar gava sueto.

²⁴ Goleke phendem tumenge kai ka meren ande tumaro bilachipe. Soke te na pachana kai me sem, ande tumaro bilachipe ka meren.

²⁵ Ondaka puchle le: ¿Ko san tu? O Jesus phenda: Me sem so mai anglal phendem tumenge.

²⁶ Si man but ezgode te phenav ta te krisiu tumendar, a gua kai bichalda man phenel o chachipe, ta me so asundem letar, gua phenav e suetoke.

²⁷ Ta von ni acharde kai dela lenge orba katar po Dad.

²⁸ Goleke phenda lenge: Kana ka vazden e Chave e Manuseke, ondaka ka acharen kai me sem, ta kai niso ni cherav me mandar, soke so sikada man o Dad gua phenav.

²⁹ Soke gua kai bichalda man si manchar. Mo Dad ni mukla man korkorre, soke me suako llive cherav so si leke drago.

³⁰ Kana o Jesus phenda gala ezgode, but llene pachaie ande le.

E chave e Devleke ta e esluge katar o bilachipe

³¹ O Jesus phenda e judionenge kai pachaiea ande lete: Te achena tumen ande mo alav, chache ka aven me disipulura.

³² Ka pinllaren o chachipe, ta o chachipe ka braduil tumen.

³³ Von phende leke: Amen sam katar e vicha e Abraameki ta nikada ni sama sluge nikake. ¿Sar tu phene kai amen ka ava braduime?

³⁴ O Jesus phenda lenge: Chachimaia phenav tumenge kai kogo cherel bilachipe, si esluga katar o bilachipe.

³⁵ Iek sluga ni achel ostade ande iek familia. A o chavo achel ostade ande familia.

³⁶ Goleke, te braduila tumen o Chavo, tumen ka aven de istina braduime.

³⁷ Llanav kai tumen sen katar e vicha e Abraameki, a tumen mangen te mundaren man soke tumen ni pachaien ande me alava.

³⁸ Me phenav so dikhlem pasa mo Dad. Isto gia, tumen phenen so asunden pasa tumaro dad.

³⁹ Von phende leke: ¡Amaro dad si o Abraam! O Jesus phenda lenge: Te avilena tumen chave e Abraameke, cherdena so cherda o Abraam.

⁴⁰ A akana mangen te mundaren man kana me phendem tumenge o chachipe kai sikada man o Del. ¡O Abraam nikada ni cherda iek ezgoda gia!

⁴¹ Tumen cheren e buchi tumare dadeki. Von phende leke: ¡Amen ni biandilam katar o kurvaluko; Iek Dad si amen, o Del!

⁴² O Jesus phenda lenge: Te aviloa tumaro dad o Del, tumen volisardena man, soke me avilem e Devletar. Ni avilem me mandar, o Del bichalda man.

⁴³ ¿Soke ni acharen so phenav tumenge? Soke tumen nasti asunen me alava.

⁴⁴ Tumaro dad si o llavolo, ta so si leke drago gua si so tumen mangen te cheren. O llavolo suako llive mundarda, ta ni achilo ando chachipe, ta nikada ni phenel o chachipe ta kana kojavel del orba prema so si vou soke si iek kojamno ta vou si o dad katar o kojaipe.

⁴⁵ A me kai phenav o chachipe, tumen ni pachan.

⁴⁶ ¿Ko tumendar sai phenel savo bilachipe cherav? A te phenava o chachipe ¿soke tumen ni pachan man?

⁴⁷ Ko si e Devleko, asunel e Devleke alava, goleke tumen ni kamen te asunen len soke ni sen e Devleke.

O Kristo saia mai anglal neko o Abraam

⁴⁸ Ondaka e judiura phende e Jesuseke: Amen phendam sukar kai tu san samaritano, ta kai iek llavolo si ande tute.

⁴⁹ O Jesus phenda lenge: Ande mande inai o llavolo. Me dav liubao me Dade. A tumen ni den man liubao.

⁵⁰ Me ni rodau te den orba lachi mandar e llene. O Del si gua kai mangel le gia, a vou si gua kai krisil.

⁵¹ Chachimaia phenav tumenge, kai ko kandela mo alav, ni ka merel.

⁵² E judiura phende leke: Akana llana kai o llavolo si ande tute. O Abraam ta sa e poraukura mule, a tu phene: Kogo kandel mo alav ni ka merel.

⁵³ ¿So san tu mai baro neko amaro dad o Abraam? Vou mulo ta i e poraukura mule. ¿Ko misli kai san tu?

⁵⁴ O Jesus phenda: Te dav orba lachi isto me mandar, gua ni mol mange niso. Mo Dad si kai del orba lachi mandar, isto gua kai tumen phenen kai si tumaro Del.

⁵⁵ A tumen ni pinllaren le. Me pinllarav le. A te phenava kai ni pinllarav le, avilema kojamno sargo tumen. A me pinllarav le ta kandau leko alav.

⁵⁶ O Abraam tumaro dad, veselisailo soke saia te dikhel mo llive, ta dikhla le ta veselisailo.

⁵⁷ E judiura phende e Jesuseke: Ni ios inai chuke ni pinda burs, ¿ta phene kai dikhlan e Abraame?

⁵⁸ O Jesus phenda lenge: Chachimaia phenav tumenge, kai me sem mai anglal neko o Abraam.

⁵⁹ Ondaka lie peke barra te chuden ande lete, a o Jesus gurudilo ta likisto katar o cher e Devleko.