Juan 7 - Biblia ande chib Romani

E phlal e Jesuseke ni pachan ande le

¹ Mapalal katar gala ezgode o Jesus llala ande phuv katar e Galilea. Ta ni kamela te llal katar e Judea, soke e judiura mangena te mundaren le.

² Ta saia pase e eslava katar e cherorra kai cherdon katar e patra, iek eslava e judionengi,

³ ta leke phlal phende leke: Na achi kate. Llatar ande phuv katar e Judea te dikhen che disipulura e buchi kai chere.

⁴ Soke ko mangel te avel pinllardo, ni cherel niso po chorial. Te cherea gala ezgode, cher len angla sa o sueto.

⁵ Von phende gala orbe soke ni von ni pachana ande lete.

⁶ O Jesus phenda lenge: Mo llive ni ios ni avilo, a tumenge suako llive kai avel si lacho.

⁷ O sueto nasti murzil pe tumende. A pe mande murzil, soke me sikavav bristomaia kai von cheren o bilachipe.

⁸ Llan tumen pe goia eslava. Me ni llau, soke mo llive ni ios ni avilo.

⁹ Phenda lenge gava, ta achilo ande phuv katar e Galilea.

O Jesus pe eslava katar e cherorra patrenge.

¹⁰ Kana leke phlal lleletar, i o Jesus llelo pe eslava, ta llelo po chorial.

¹¹ E judiura rodena le pe eslava, ta phenena: ¿Kai talo?

¹² Ta saurre dena leki orba. Nesave phenena: Lacho si. Ta aver phenena: Iok, kojavel e foro.

¹³ Ta niko ni dela leki orba angla e llene soke darana katar e judiura.

¹⁴ Kana nakhlia dopas katar e eslava, o Jesus dia ando cher e Devleko ta sikavela.

¹⁵ E judiura chudinape ta phenena: ¿Sar llanel gava pe gachin ezgode kana nikada ni sikilalen?

¹⁶ O Jesus phenda lenge: So sikavav inai mandar, so sikavav avel goletar kai bichalda man.

¹⁷ Kogo mangela te cherel e volia e Devleki, ka pinllarel dal si e Devleko so me sikavav, o dal me ikanav gava me mandar.

¹⁸ Kogo phenel vareso vou petar, rodel te falil vou pe. A me samo mangav te den liubao me Dade kai bichalda man, goleke suako drom phenav o chachipe.

¹⁹ ¿Ni dia tumen o Moises o zakono? a niko tumendar nikamel te kandel so phenel o zakono. ¿A soke roden te mundaren man?

²⁰ E llene phende leke: ¡Ande tute si iek llavolo! ¿Ko rodel te mundarel tut?

²¹ O Jesus phenda lenge: Iek ezgoda cherdem ando sabado, ta saurre chudisailen.

²² De istina, o Moises dia tumen e sirkunsision, kai ni avili katar o Moises, avili katar e purane, a tumen sirkunsidin e muruse i ando sabado.

²³ Te lela o murus e sirkunsision ando sabado, te na bangaren e Moiseseko zakono, ¿soke joliaon pe mande kai ando sabado sastardem iekhe llene?

²⁴ Na thoven kris pe so tumen mislin kai gia si. Kana ka krisin cheren le chachimaia.

Ko si o Jesus

²⁵ Ondaka nesave llene katar o Jerusalem phenena gia: ¿Inai gava gole kai roden te mundaren le?

²⁶ Dikhen, sar del orba angla saurre, ta ni phenen leke niso, ¿Sai avelpe kai i e sudura pachan kai de istina vou si o Mesias?

²⁷ A amen llana katar si gava. Kana ka avel o Mesias, niko ni ka llanel katar avel.

²⁸ O Jesus saia ando cher e Devleko kana asunda gala orbe ta ando baro avazi phenda: ¡Tumen mislin kai pinllaren man ta mislin kai llanen katar avav! Me ni avilem me mandar, a gua kai bichalda man si chachuno, ta gale tumen ni pinllaren.

²⁹ A me pinllarav le, soke letar avav, vou bichalda man.

³⁰ Ondaka mangena te phanden le, ta niko ni thoda o va pe lete, soke ni ios ni aviloia leko llive.

³¹ But llene pachaie ande lete, ta phenena: Kana ka avel o Mesias, ¿ka cherel mai but bare ezgode Devlikane neko gala kai cherel gava?

E fariseura mangen te phanden e Jesuse

³² E fariseura asunde kai but llene phenena gava letar, a von ta e mai preche popura bichalde e boñikura te phanden e Jesuse.

³³ Ondaka o Jesus phenda lenge: Cherricha ios ka achav tumenchar, ta ka llautar golete kai bichalda man.

³⁴ Ka roden man ta ni ka malaven man soke kote kai me ka avav tumen nasti ka llan.

³⁵ Ondaka e judiura phenena maskar pete: ¿Kai ka llal gava kai amen nasti ka malava le? ¿Ka llaltar kai e judiura kai si maskar e griegure, ta ka sikavel ande Gresia?

³⁶ ¿So si gava kai phenda ‘Ka roden man, ta ni ka malaven man, soke kote kai me ka avav tumen nasti te llan’?

O pai o llundo

³⁷ Ando mai baro llive e eslavako, o Jesus ustilo ta ando baro avazi phenda: Kogo si trusalo te avel mande.

³⁸ Kogo pachal ande mande, sar phenel o Pisipe, letar ka ezvoril o pai o llundo.

³⁹ Gava phenda katar o Duo kai ka len gola kai ka pachan ande lete, soke ni ios ni diaia o Duo, ta ni ios o Jesus ni saia blagosime.

E llene fuladon cheres o Jesus

⁴⁰ Neseve llene kai sea kote, kana asunde gala alava, phende: Chache si gava o profeta.

⁴¹ Aver phenena: Gava si o Mesias. A aver phenena: Iok, soke o Mesias nasti te avel katar e Galilea.

⁴² Pisime si kai o Mesias si te avel katar e vicha Davideki, katar o foro kai ikhardol Belen, isto kotar katar saia i o David.

⁴³ Ta fulade sea saurre cheres o Jesus.

⁴⁴ Nesave llene lendar mangena te phanden le, a niko ni thoda o va pe lete.

⁴⁵ E boñikura katar o cher e Devleko avile kai e mai bare popura ta e fariseura, ta puchle len: ¿Soke ni anden e Jesuse?

⁴⁶ E boñikura phende. ¡Nikada niko ni dia orba sargo gava!

⁴⁷ Ondaka e fariseura phende lenge: ¿I tumen kojadilen?

⁴⁸ ¿A so, vareko katar amare sudura pachaia ande lete, o varesavo fariseo?

⁴⁹ Gala llene, kai ni pinllaren o zakono, von si proketime.

⁵⁰ O Nikodemo, o fariseo kai aviloa kai o Jesus iek drom, phenda lenge:

⁵¹ Amaro zakono phenel kai nasti dosara nika te na asunaia mai anglal gole llene, te sai llana so cherda.

⁵² Phende leke: ¿I tu san katar e phuv katar e Galilea? Chitisar ta dik kai katar e Galilea nikada ni likisto ni iek profeta.

E kurvichka

⁵³ Mapalal katar gala ezgode suako lleno llelotar kai po cher.