Juan 4 - Biblia ande chib Romani

O Jesus ta e diskinia katar e Samaria

¹ E fariseure llangle kai o Jesus cherela ta kristila ios mai but disipulura neko o Juan

² A o Jesus ni kristila, samo leke disipulura.

³ Kana o Jesus llanglale, llelotar katar e Judea ta avilo pale ande phuv katar e Galilea.

⁴ Ta saia te nakhel ande Samaria.

⁵ Ta avilo kai iek foro katar e phuv e Samariaki kai ikhardola Sikar, pasa e umal kai o Jakob dia pe chave e Josee.

⁶ Kote saia o bunari e Jakoboko. Ondaka o Jesus chinio e drometar beslo pasa o bunari, ta saia ande desudui e lliveseke.

⁷ Ta avili iek diskinia katar e Samaria te ikanel pai, ta o Jesus phenda lake: De man te piau.

⁸ A leke disipulura llele ando foro te chinen fiso te jan.

⁹ A goia diskinia phenda e Jesuseke: ¿Sar tu, kai san katar e Judea, mange mandar te pie pai, a sem iek diskinia katar e Samaria? Voi phenda gua soke e judiura ta e samaritanura ni denpe orba.

¹⁰ O Jesus penda lake: Te llanglana so del o Del, ta ko mangel tutar pai, tu mangea letar, ta vou dela tut o pai o llundo.

¹¹ E diskinia phenda leke: Gazda, inai tut soia te ikane o pai ta o bunari si baro: ¿Katar ka ikane o pai o llundo?

¹² O Jakob mukla amenge, kai sam katar leki vicha, gava bunari katar pila vou leke chave ta leke stoka. ¿So san tu mai baro neko vou?

¹³ O Jesus phenda lake: Kogo ka piel katar gava pai, pale ka trusaol.

¹⁴ A gua kai ka piel katar o pai kai me ka dav le, nikada ni ka trusaol. Soke o pai kai me ka dav le ka ezvoril ta ka del le zivoto ostade.

¹⁵ E diskinia phenda leke: Bre, de man katar gua pai te na avav ios trusali, ta te na avav pale kate ta ikanav le.

¹⁶ O Jesus phenda lake: Lla ta ikhar che rrome ta bolde karinga.

¹⁷ E diskinia phenda: Inai man rrom. A o Jesus phenda lake: Sukar phendan kai inai tut rrom,

¹⁸ soke panch rroma sea tut, a gava kai si pala tute inai cho rrom. O chachipe phendan.

¹⁹ Kana voi asunda gava, phenda leke: Misliu kai tu san profeta.

²⁰ Amare purane, e samaritanuria, blagosisarde pe gava burdo, a tumen e judiura phenen kai trubul te blagosil ando Jerusalem.

²¹ O Jesus phenda lake: Pacha man, kai avel o llive, kai ni pe gava burdo ni ando Jerusalem ni ka blagosisaren e Dade.

²² Tumen blagosin so ni llanen, a amen llana ka blagosisara, soke o braduipe avel katar e judiura.

²³ A avel o llive, ta akana si, kana e llene chachune ka blagosin e Dade ando Duo ta ando chachipe, soke gia mangel o Dad te blagosin le gola llene.

²⁴ O Del si Duo, ta gola kai blagosin le morabi ando Duo ta ando chachipe te blagosin le.

²⁵ E diskinia phenda leke: Llanav kai si te avel o Mesias, kai gava si o Kristo, kana vou ka avel ka bristol amenge sa gala ezgode.

²⁶ O Jesus phenda lake: Gua sem me, kai del orba tuia.

²⁷ Ondaka avile leke disipulura, ta chudisaile soke dela orba iekhe diskiniaia. A ni iek lendar ni puchla le so mangela voi, o katar so dela orba laia.

²⁸ E diskinia mukla po bardako ta lleli ando foro, ta phenda le saurrenge:

²⁹ Aven te dikhen iekhe llene kai phenda mange sa sogo cherdem. ¿Sai avel gava o Mesias?

³⁰ Ondaka likiste katar o foro, ta avile kai o Jesus.

³¹ A leke disipulura molinape leke: Kovachi, ja vareso.

³² Vou phenda lenge: Man si man iek jape, kai tumen ni pinllaren.

³³ Ondaka e disipulura thode te phenen iek avereke: ¿Sai avel kai ande leke vareso te jal?

³⁴ O Jesus phenda lenge: Mo jape si te cherav e volia goleki kai bichalda man, ta te getosarav leki buchi.

³⁵ Tumen phenen: ‘Trubul star chon te avel e chidimake’, a me phenav tumenge dikhen po vostano, soke si reslo te sai chidiniaol.

³⁶ Ta gua kai chidel pochindiniaol leke, ta chidel septelie ostade zivotoke, te sai o simichari veselilpe golea kai chidel e septelie.

³⁷ Soke de istina si kana phenen ‘Iek si gua kai thovel e simicha ande phuv, a o gua si kai chidel e septelie’.

³⁸ Me bichalden tumen te chiden e septelie ande so tumen ni radisarden. Aver si gola kai radisarde, a tumen lien lengo chari.

³⁹ A but samaritanura katar gua foro pachaie ando Jesus pala e alava gole diskiniake, soke voi phenela: Phenda mange sa sogo cherdem

⁴⁰ Goleke kana avile e samaritanura, molisaile leke te achel lenchar. Ta vou achilo kote dui llive,

⁴¹ ta mai but llene pachaie ande lete pala e Jesuseke alava,

⁴² ta phenena gole diskiniake: Akana amen pacha, na samo pala che alava soke isto amen asundam le, ta llana kai de istina vou si kai braduil e sueto.

O Jesus sastarel e chaurre katar iek sudo baro

⁴³ Nakhle dui llive ta o Jesus llelotar katar e phuv katar e Samaria ta avilo ande phuv katar e Galilea.

⁴⁴ Soke isto vou phendaia, iekhe profeta ni blagosin le ande leki phuv.

⁴⁵ Kana avilo ande Galilea, e llene kai sea kotar lie le sukar, soke i von llelea pe llivesa katar e Paskua ando Jerusalem, ta dikhle e ezgode kai vou cherdaia.

⁴⁶ O Jesus avilo pale ando foro kai ikhardol Kana, kote kai cherdaia o pai mol. Ta saia kote iek sudo baro e charoko kai leko chaurro saia nasualo ando foro kai ikhardol Kafarnaum.

⁴⁷ Kana o sudo asunda kai o Jesus aviloia katar e Judea ande Galilea, avilo lete, ta molilape leke te llal te sastarel leke chaurre, soke saia po meripe.

⁴⁸ O Jesus phenda leke: Tumen ni pachaiena te na dikhlena e bare ezgode Devlikane.

⁴⁹ A o sudo phenda leke: Lla, soke mo chaurro ka merel.

⁵⁰ Ondaka o Jesus phenda: Irisao chere soke cho chaurro zivil. A vou pachaia ando alav kai phendaia leke o Jesus, ta llelotar.

⁵¹ Ta kana avilo kai po cher, leke esluge avile lete ta phende leke: ¡Cho chaurro zivil!

⁵² Vou puchla len kana thodaia te sastol leko chaurro, ta phende leke: Arachi ande iek e lliveseko liape letar e muka.

⁵³ Ondaka o gua lleno acharda kai saia kana o Jesus phendaia leke: Cho chaurro zivil. A vou ta sa leko porodo pachaie ando Jesus.

⁵⁴ Gaia saia e duito bari ezgoda Devlikani kai cherdaia o Jesus kana avilo pale katar e Judea ande Galilea.