Juan 3 - Biblia ande chib Romani

O Jesus ta o Nikodemo

¹ Saia iek lleno katar e fariseura kai ikhardola Nikodemo, kai saia but baro maskar e judiura.

² Vou avilo iek riat kai o Jesus, ta phenda leke: Kovachi, llana kai avilan e Devletar te sikave, soke niko nasti cherel bi e Devleko e bare ezgode Devlikane kai tu chere.

³ O Jesus phenda leke: Chachimaia phenav chuke kai kogo ni biandola pale, nasti ka dikhel e charoina e Devleki.

⁴ O Nikodemo puchla le: ¿Sar iek lleno ande po phuripe sai biandol pale? ¿sai del o duito drom ande pe dako lli?

⁵ O Jesus phenda leke: Chachimaia phenav chuke kai kogo ni biandola e paietar ta i e Duotar, nasti ka del ande charoina e Devleki.

⁶ So si masetar, mas si. A so si biando e Duotar, duo si.

⁷ Na chudisao kai phenav chuke: ‘Sa trubun te biandon pale’.

⁸ E balav phurdel katar mangel, ta tu asune la kana phurdel, a ni llane katar avel ni kai llal. Isto gia si sa gola kai biandon e Duotar.

⁹ Pale o Nikodemo puchla le: ¿Sar sai avelape gava?

¹⁰ O Jesus phenda leke: ¿Tu sikave ando Israel, ta ni llane gala ezgode?

¹¹ Chachimaia phenav chuke kai amen phena so llana, ta i phena so dikhlam a tumen ni pachan amen.

¹² Kana me phenav tumenge e ezgode e phuviake ni pachan man, ¿sar ka pachan te phenava tumenge katar e ezgode e milosoke?

¹³ Niko ni avilo katar o miloso, samo gua kai fulisto katar o miloso, e Manuseko chavo.

¹⁴ Ta gia sar o Moises vazdia e sape po pusto, isto gia o Chavo e Manuseko si te avel vazdino upre,

¹⁵ gia suako lleno kai pachal ande mande te avel le zivoto ostade.

O volipe e Devleko

¹⁶ Soke pe gachin volisarda o Del e sueto, kai dia pe edine Chave, gia kogo pachal ande lete, te na jasaol, ta te avel le zivoto ostade.

¹⁷ Soke o Del ni bichalda pe Chave ando sueto te proketil e sueto, bichalda le te braduil e sueto.

¹⁸ Kogo pachal ande Devleko Chavo, inai proketime. A gua kai ni pachal, proketime si, soke ni pachaia ando anav katar o edino Chavo e Devleko.

¹⁹ Gola kai ni pachan proketime si, soke kana avilo o villelo ando sueto, von cherena ezgode bilache, ta von volisarde mai but o truniariko neko e villelo.

²⁰ Sa gola llene kai cheren o bilachipe, murzin po villelo, ta ni aven kai o villelo, te na dikhon lenge bilache ezgode kai cheren.

²¹ A kogo cherel o lachipe, avel kai o villelo te sai dikhol kai cherel e Devleke ezgode.

O Juan kai kristil pale del orba katar o Jesus

²² Mapalal o Jesus llelo pe disipulonenchar ande phuv katar e Judea, ta achilo kote ta kristila.

²³ Ta i o Juan kristila ando foro kai ikhardol Enon, pasa o foro kai ikhardol Salim, soke kote saia but pai, ta avena ta kristinape.

²⁴ Soke ni ios ni phanglea e Juane.

²⁵ Ondaka e disipulura e Juaneke thode te janpe iekhe judioia cheres o zakono katar o chistope,

²⁶ ta avile kai o Juan ta phende leke: Kovachi, o lleno kai saia tuia pe o goia rig katar o Jordan kaki orba tu dea, etalo kristisarel, ta saurre aven lete.

²⁷ O Juan phenda lenge: Nika nasti avel le niso te na dela le o Del.

²⁸ Isto tumen llanen kai me phendem kai me ni sem o Mesias, me sem o bichaldo angla lete.

²⁹ Goleke, pe iek biau ko zinilpe si o chavo ta o mai lacho amal e chaveko veselilpe samo kai asunel leko avazi. Isto gia veselo sem akana, soke o Mesias si kate.

³⁰ Vou trubul te bariol, a me te chiknivav.

Ko avel upral

³¹ Gua kai avel upral si pe saurre. A gua kai si katar e phuv, phuviako si, ta e ezgode e phuviake phenel. A ko avel e milosotar si pe saurre,

³² ta phenel so dikhla ta asunda ta niko ni pachal le.

³³ A vareko te pachal le, llanel kai o Del si chachuno,

³⁴ soke gole kai bichalda o Del, e Devleke alava phenel, soke o Del ni del po Duo po cherricha.

³⁵ Soke o Dad volil pe Chave, ta thoda sa e ezgode ande leke va.

³⁶ Gua kai pachal ande Devleko Chavo si le zivoto ostade, A gua kai ni kamel te pachal ando Chavo ni ka dikhel o zivoto, ta e joli e Devleki si pe lete.