Juan 21 - Biblia ande chib Romani

O Jesus sikadol pasa e mora e Tiberiaki

¹ Mapalal katar gala ezgode o Jesus sikadilo pale pe disipulonenge pasa e mora e Tiberiaki. Ta sikadilo gia:

² Sea kote o Simon Pedro, o Tomas kai ikharenale o Jemelo, o Natanael kai saia katar e Kana e Galileaki, e chave e Zebedeoke ta i dui ios katar leke disipulura.

³ O Simon Pedro phenda lenge: Llau te ikanav machen. Von phende leke: I amen lla tuia. Ondaka llele ta likiste ande iek llimia. A goia riat ni ikande niso.

⁴ Kana lela te llivosaol o Jesus sikadilo pasa e mora, A e disipulura ni llanena kai saia vou.

⁵ O Jesus puchla len: Chavalen, ¿si tumen mache? Von phende: Iok.

⁶ O Jesus phenda lenge: Chuden e mreza pe rig e chachi katar e llimia ta ka ikanen mache. Von chudie e mreza ta mapalal nasti ikanena la pala e but mache kai istarde.

⁷ Ondaka o disipulo gole kai o Jesus volila phenda e Pedroke: ¡Gua si o Gazda! Samo asunda o Simon Pedro kai saia o Jesus thoda pe patave, soke ikandaialen petar, ta chudiape ande mora.

⁸ Ogola disipulura aviletar ande llimia ta chirdena e mreza e machenchar soke e phuv ni saia dur kotar.

⁹ Kana avile pe phuv dikhle kai sea angara phabarde iek macho upral ta i marrno.

¹⁰ O Jesus phenda lenge: Anen katar e mache kai istarden.

¹¹ O Simon Pedro likisto ta ikanda e mreza pe phuv pherdi bare machenchar, stotina ta pinda ta trin, sea but mache ta e mreza ni putaili.

¹² O Jesus phenda lenge: Aven te jan. Ni iek katar e disipulura ni tromana te puchen le ¿Tu ko san? Soke llanena kai saia o Gazda.

¹³ Mapalal o Jesus lia o marrno ta dia len isto gia sar dia len macho.

¹⁴ Gaia saia e trito drom kai sikadilo pe disipulonenge sar kana ustilo katar o meripe.

Arak me bakren

¹⁵ Kana jale o Jesus puchla e Simono Pedro: Simon chavo e Jonaseko, ¿tu voli man mai but neko von? O Pedro phenda leke: Ea Gazda, tu llane kai me voliv tut. O Jesus phenda leke. Arak me bakren.

¹⁶ Pale puchla le o duito drom: Simon chavo e Jonaseko, ¿tu voli man? O Pedro phenda leke. Ea Gazda, tu llane kai voliv tut. O Jesus phenda leke: Arak me bakren.

¹⁷ E trito drom pale puchla le: Simon chavo e Jonaseko, ¿tu voli man? O Pedro tristosailo soke puchla le trin droma dal volisarel le ta phenda leke: Gazda, tu llane sa, tu llane kai voliv tut. O Jesus phenda leke: Arak me bakren.

¹⁸ Chachimaia phenav chuke kana sana mai terno thovea pe tute che patave ta llaia kai mangea, a kana ka ave phuro, ka inzare che va ta aver ka thovel pe tute che patave ta ka inllarel tut kote kai tu ni kame.

¹⁹ Gua phenda le te sai llanel sar saia te merel o Pedro ta sar saia te blagosil e Devle. Mapalal phenda leke: ¡Aide pala mande!

O disipulo kai o Jesus volila

²⁰ Kana o Pedro boldinailo dikhla kai avela o disipulo kai o Jesus volila but, isto gua kai pe sinia inziloa pasa lete ta puchlaia le: Gazda, ¿ko si gua kai ka phukavel tut?

²¹ Kana o Pedro dikhla le, puchla e Jesuse: Gazda, ¿a galea so ka avelpe?

²² O Jesus phenda leke: Te mangav te achel lligo ni ka iriv man, ¿ni chitilpe chuke? Tu aide pala mande.

²³ Goleke gava alav barilo maskar e phlal kai gua disipulo ni saia te merel. A o Jesus ni phenda kai ni ka merel. So phenda o Jesus saia: Te mangava te achel, chuke ni chitilpe.

²⁴ Gava si isto gua disipulo kai phenel gala ezgode ta i kai pisisarda len. Ta amen llana kai phenel o chachipe.

²⁵ O Jesus cherda ios mai but ezgode kai te pisisailea iek po iek, me misliuman kai ni reslea ando sueto ni e lila kai te pisinape. Gia te avelpe.