Juan 20 - Biblia ande chib Romani

E Jesuseko llundipe

¹ Ando purvo llive katar e efta, e Maria Magdalena lleli but rano ando truniariko, kai o limori. Ta dikhla kai ni saia o barr katar o udar e limoreko.

² Ta avili prastindo kai o Simon Pedro ta i kai o gua disipulo gole kai o Jesus volila, ta phenda lenge: ¡Inllarde katar o limori e Jesuse ta ni llana kai thode le!

³ O Pedro ta o gua disipulo lleletar kai o limori.

⁴ E dui prastena, a o gua disipulo prastio mai sigardo neko o Pedro ta avilo mai oma kai o limori.

⁵ Ta bangilo te dikhel ta dikhla o chiti a ni dia andre.

⁶ Mapalal avilo o Simon Pedro ta dia ando limori. I vou dikhla o chiti

⁷ ta i o chiti kai sai pe Jesuseko soro ni saia e chitea saia ulime pe aver rig.

⁸ Ondaka i o gua disipulo dia andre, gua kai aviloa mai anglal kai o limori, ta i vou dikhla ta pachaia.

⁹ Soke ni ios ni achardea so phenela o Pisipe, kai trubulale te ustel katar o meripe.

¹⁰ Ta gala disipulura lleletar chere.

O Jesus avel kai e Maria Magdalena

¹¹ E Maria achili avri pasa e limori ta rovela. Ta rovindo bangili te dikhel ando limori,

¹² ta dikhla duie suechonen ande parrne patave kai besena kote kai saia e Jesuseki esnaga, iek kote kai saia o soro a o gua kai sea e porrne.

¹³ E suechura puchle la: Chei, ¿soke rove? Voi phenda lenge: Soke inllarde me Gazda ta ni llanav kai thode le.

¹⁴ Samo phenda gava boldinaili ta dikhla kote e Jesuse, A ni llanela kai saia vou.

¹⁵ O Jesus puchla la: Chei, ¿soke rove? ¿Ka rode? Voi mislila kai saia gua kai arakhela o than ta phenda leke: Te inllardan le tu, phen mange kai thodan le, ta me ka anav le.

¹⁶ Ondaka o Jesus phenda lake: ¡Maria! A voi boldinaili ta phenda leke ando ebreo: ¡Rabuni! gua alav si gua kai sikavel.

¹⁷ O Jesus phenda lake: Na dodisar man soke ni ios ni avilem kai mo Dad. Lla kai me phlal ta phen lenge kai llau kai mo Dad, tumaro Dad, kai mo Del, tumaro Del.

¹⁸ Ondaka e Maria Magdalena lleli te phenel e disipulonenge kai dikhlaia e Jesuse ta i so phendaia lake o Jesus.

O Jesus sikadol pedisipulonenge

¹⁹ Kana peli e riat isto katar gua llive kurko, e disipulura besena po stali ta e udara sea phangle soke darana katar e judiura, avilo o Jesus, thodape po maskaral ta phenda lenge: ¡Pas tumenge!

²⁰ Kana phenda gava, sikada lenge pe va ta pi rig e pasuareki. Ta e disipulura veselisaile kai dikhena e Gazda.

²¹ Ondaka O Jesus pale phenda lenge: ¡Pas tumenge! Gia sar bichalda man o Dad, gia me bichalav tumen.

²² Ta phurdia pe lende ta phenda: Len o Santo Duo.

²³ Golengo bilachipe kai ka prostisaren ka aven prostime. A golen kai ni ka prostisaren, ka achen bi prostime.

O Tomas dikhel e Jesuse llundo

²⁴ O Tomas iek katar e desudui kai ikharena le o Jemelo, ni saia lenchar kana aviloa o Jesus.

²⁵ Ta phende leke ogola disipulura: Dikhlam e Gazda. A o Tomas: Te na dikhava pe leke va kote kai sea e kafrina, ta i te thovava mo nai po than e kafrinengo ta mo va ande leko pasuaro, ni ka pachau.

²⁶ Ojto llive mapalal pale sea e disipulura andre ta lenchar saia o Tomas. Ondaka e udara sea phangle ta o Jesus avilo ta dia andre. Thodape po maskaral ta phenda lenge: ¡Pas tumenge!

²⁷ Mapalal phenda e Tomaseke: Thou kate cho nai ta dik me va. An cho va ta thov le ande mo pasuaro. Na achi bipachamako, ¡pacha!

²⁸ Ondaka o Tomas urkisarda: ¡Gazda murno, Del murno!

²⁹ O Jesus phenda leke: ¿Pacha soke dikhlan man? ¡Blagosime gola kai ni dikhle ta pachaie!

Pala so si gava lil

³⁰ O Jesus cherda but aver ezgode angla pe disipulura kai inai pisime ande gava lil.

³¹ A gala alava pisisaile te pachan tumen kai o Jesus si o Mesias, e Devleko Chavo, ta te pachana te avel tumen zivoto ostade ande leko anav.