Juan 2 - Biblia ande chib Romani

O biau ande Galilea

¹ Pala e trin llive cherde iek biau ando foro kai ikhardola Kana katar e phuv katar e Galilea. Kote saia e Jesuseki dei,

² ta o Jesus ta leke disipulura sea ikharde pe gua biau.

³ Ta kana trubula e mol, e dei e Jesuseki phenda leke: Inai len mol.

⁴ O Jesus phenda lake: Chei ¿so si chuke? Ni ios ni avilo mo llive.

⁵ A voi phenda e eslugenge: Cheren sa so vou ka phenel tumenge.

⁶ Sea kote sou piria barrustune kai andre saia o pai kai e judiura cherena lea o zakono katar o chistope. Ande suako iek resena dui o trin bardakuria.

⁷ O Jesus phenda e slugenge: Pheren gala piria pai. Ta pherde len,

⁸ ondaka o Jesus phenda lenge: Akana ikanen katar e piri, ta inllaren kai o lleno kai gazdaril po biau. Ta von inllarde leke.

⁹ Kana o gazda e biaveko pila o pai kai cherdilo mol, vou ni llanela katar saia, a e esluge kai ikanena o pai llanena katar saia. Ondaka o lleno kai gazdarila po biau ikharda e chave kai zinilape,

¹⁰ ta phenda leke: Suako lleno thovel mai anglal e mai lachi mol, ta kana e llene pien goia mol, ondaka thoven o goia mol, a tu muklan e mai lachi mol llik akana.

¹¹ Gaia si e purvo drom kai o Jesus cherda iek bari ezgoda Devlikani ando foro kai ikhardola Kana katar e phuv katar e Galilea, ta golea sikada pi zor, ta leke disipulura pachaie ande lete.

¹² Mapalal lleletar ando Kafarnaum, vou leki dei, leke phlal ta leke disipulura. Ta achile kote nesave llivesa.

O Jesus chistosarel o cher e Devleko

¹³ Kana saia pase e Paskua e judionengi, o Jesus llelotar ando Jerusalem.

¹⁴ Ta malada ando cher e Devleko golen kai bichinena guruven, bakren ta gulubura, ta i golen kai pharruvena e love ta besena kote ta cherena po rado.

¹⁵ Kana o Jesus dikhla so cherena, cherda peke e solenchar iek bicho ta tradia len katar o cher e Devleko sa gole llenen kai andea pe bakren ta e guruven. Ta tradia golen kai pharruvena e love ta boldia lenge stalia.

¹⁶ Ta phenda golenge kai bichinena gulubura: ¡Ikanen gava katar! ¡Na cheren me Dadeko Cher iek duchano!

¹⁷ Ondaka leke disipulura diepe golli katar o Pisipe kai phenel: O volipe kai si man pala cho cher phabarel man sargo e iag.

¹⁸ Ta e judiura puchle le: ¿Sikau amenge katar le e zor te gazdari pe gala ezgode?

¹⁹ Ta o Jesus phenda: Peraven gava cher e Devleko, ta ande trin llive me pale ka vazdaule.

²⁰ Ondaka e judiura phende leke: Ande saranda ta sou burs vazdinailo gava cher e Devleko, ¿a tu ande trin llive mange vazdele?

²¹ A o Jesus dela orba isto katar pi esnaga, kai si o cher e Devleko.

²² Goleke, kana ustilo katar o meripe, leke disipulura diepe golli kai vou phendaia gava, ta pachaie ando Pisipe ta ando alav kai phendaia o Jesus.

O Jesus llanela so mislinape e manusa

²³ Kana o Jesus saia ando Jerusalem ande llivesa katar e Paskua, but llene pachaie ande leko anav kana dikhena e ezgode kai vou cherela.

²⁴ A isto e Jesuse ni saia le vera ande lende, soke pinllarela saurren,

²⁵ ta ni trubulale te phenel leke niko cheres nika, soke vou llanela so mislinape e manusa.