Juan 18 - Biblia ande chib Romani

Phanden e Jesuse

¹ Kana o Jesus phenda gala ezgode, llelotar pe disipulonenchar pe o goia rig katar o pai kai ikhardola Sedron, kote saia iek vostano, ta o Jesus dia andre pe disipulonenchar.

² Ta i o Judas leko dusmano, pinllarela gua than soke kote but droma o Jesus chidinailoa pe disipulonenchar.

³ Ondaka o Judas avilo bute boñikonenchar ta sudonenchar katar e mai preche popura ta fariseura. Ta avena lacharde te marempe ta anena kasta phabarde.

⁴ A o Jesus sar llanela so saia te avelpe, llelo lende ta puchla len: ¿Ka roden?

⁵ Von phende leke: E Jesuse katar o Nazaret. O Jesus phenda lenge: Me sem. O Judas kai pukhadaia le, saia lenchar

⁶ Kana o Jesus phenda lenge: Me sem, diepe palpale ta peletar pe phuv.

⁷ O Jesus pale puchla len: ¿Ka roden? A von pale phende: E Jesuse katar o Nazaret.

⁸ O Jesus pale phenda lenge: Phendem tumenge kai me sem. Te roden man, muken te llantar gala llene.

⁹ Gua phenda le te cherdol so phendaia vou: Dade, katar gola kai dian man ni jasardem ni iekhe.

¹⁰ Ondaka o Simon Pedro kai saia le iek jarni, ikandale ta chinda o kan iekheko kai ikhardola Malko kai saia esluga katar o mai baro popo.

¹¹ O Jesus phenda e Pedroke: Guruv cho jarni. So dia man te nakhav mo Dad, ¿tu misi kai ni ka nakhav le?

O Jesus angla o Anas

¹² Ondaka e boñikura, o tribuno, ta e sudura katar o cher e Devleko istarde e Jesuse ta phangle le.

¹³ Mai anglal inllarde le angla o Anas, soke saia o sastro e Kaifaseko, kai saia o mai baro popo gua burs.

¹⁴ O Kaifas saia gua kai phendaia e judionenge kai avela mai lache lenge te merel samo iek lleno pala sogo si o foro.

O Pedro phenel kai ni pinllarel e Jesuse

¹⁵ O Simon Pedro ta aver disipulo liepe pala o Jesus. Gale disipulo pinllarela le o mai baro popo, goleke dia andre e Jesusea ando cher e Anaseko;

¹⁶ A o Pedro achilo avri po udar, goleke o disipulo kai pinllarela e mai bare popo avilo ta dia orba e diskiniaia kai arakhela o udar ta cherda te nakhel o Pedro.

¹⁷ Ondaka voi kai arakhela o udar phenda e Pedroke: ¿I tu san iek katar e disipulura gale lleneke? O Pedro phenda: Iok, inai sem.

¹⁸ Cherela sil, ta e esluge ta e sudura thodea iag ta kote achena pasa e iag. Ta i o Pedro tatola lenchar pasa e iag.

O mai baro popo puchel e Jesuse

¹⁹ O mai baro popo puchla e Jesuse cheres leke disipulura ta i so sikavela.

²⁰ O Jesus phenda leke: Me diem orba e suetoke angla sa. Suako llive sikadem ande khanllira e judionenge ta i ando cher e Devleko kote kai chidiniaon sogo si e judiura. Niso ni phendem po chorial.

²¹ ¿Soke puche man? Puch golen kai asunde cheres so phendem lenge. Von llanen so phendem.

²² Kana o Jesus phenda gava iek katar e llene kai arakhena o cher e Devleko kai saia kote chalada le po mui, ta phenda leke: ¿Gia phene e mai bare popoke?

²³ O Jesus phenda leke: Te phendem bilache, phen ande so si o bilachipe. A te phendem sukar, ¿soke chalave man?

²⁴ Ondaka o Anas bichalda le phanglo kai o Kaifas, o mai baro popo.

O Pedro pale phenel kai ni pinllarel e Jesuse

²⁵ A i o Pedro saia kote pe porrne ta tatola pasa e iag. Ondaka puchle le: ¿Tu san katar leke disipulura? A vou phenda: Inai sem.

²⁶ Mapalal iek katar e esluge e mai bare popoke kai saia bariardo katar gua kai o Pedro chindaia leko kan, phenda leke: ¿Ni dikhlem tut me ando vostano lea?

²⁷ Ta o Pedro pale phenda kai iok, ondaka baslo o basno.

O Jesus angla o Pilato

²⁸ Inllarde e Jesuse katar e Kaifaseko cher kai o than e krisako. Saia rano a von ni die andre ando than e krisako te na achen melale soke saia te jan pe Paskua.

²⁹ Ondaka o Ponsio Pilato likisto lende ta phenda lenge: ¿Ande so gava lleno si dosalo?

³⁰ Von phende leke, te na aviloa bilacho ni andama le tute.

³¹ O Pilato phenda lenge: Len le tumen ta krisisaren le prema tumaro zakono. Von phende leke: Amen nasti mundara nika.

³² Gia cherdilo o alav kai phendaia o Jesus: Sar saia te avel leko meripe.

³³ O Pilato pale dia ando than e krisako ikharda e Jesuse ta puchla le: ¿San tu o charo e judionengo?

³⁴ O Jesus phenda leke: ¿Tu tutar phene gava, o soke aver phendele chuke?

³⁵ O Pilato phenda leke: ¿So sem me, judio? Chi phuv ta e mai preche popura die tut mande. ¿So cherdan?

³⁶ O Jesus phenda leke: Mi charoina inai gale suetoki. Te avilaia gale suetoki me esluge mardeape te na phanden man, A mi charoina inai katar.

³⁷ O Pilato puchla le: ¿Gua si kai de istina san charo? O Jesus phenda leke: Tu phendanle: Me sem charo. Me pala gava biandilem te phenav so si o chachipe. Suako lleno kai si e chachimako, asunel mo avazi.

³⁸ O Pilato phenda leke: ¿So si o chachipe? Kana phenda gava o Pilato pale avilo kai e judiura, ta phenda lenge: Pe gava lleno me ni malavav ni iek bilachipe.

O Jesus krisime te merel

³⁹ A tumen sen sikade te mukliarav iekhe pe Paskua: ¿Mangen te mukliarav tumenge o Charo e judionengo?

⁴⁰ Ondaka saurre pale ando baro avazi urkisarde: ¡Gale iok! ¡Muk e Barrabase! A o Barrabas saia chor.