Juan 17 - Biblia ande chib Romani

O Jesus molilpe pala pe disipulura

¹ Kana phenda gala ezgode, o Jesus vazdia pe akha karing o miloso ta phenda: Dade, o vreme avilo: Blagosisar che Chave, te sai blagosil tut i vou.

² Soke thodan tala leko va suako manuse, te del zivoto ostade sa golen kai dian le.

³ O zivoto ostade si te pinllaren tut, o edino Del chachuno, ta i e Jesukristo gole kai bichaldan.

⁴ Me blagosisardem tut ando sueto, cherdem e buchi kai dian man te cherav.

⁵ Akana, Dade, blagosisar man pasa tute, gole blagosimaia kai saia man tuia mai anglal te cherdol o sueto.

⁶ Golen kai esvirisardan katar o sueto, sikadem cho anav. Chire sea, ta dian len mange, ta von cherde so phenen che alava.

⁷ Akana llanen kai sogo phendan mange avel tutar.

⁸ Soke e alava kai dian man, me diem len, ta von lie len. Llangle kai de istina avilem tutar ta pachaie kai tu bichaldan man.

⁹ Me moliv man pala lende. Ni moliv man pala o sueto, ta pala gola kai dian man, soke chire si.

¹⁰ Sogo si murno, chiro si. Ta so si chiro, si murno, ta mi dragostia si ande lende.

¹¹ Me ni sem ios ando sueto, a von si ando sueto ta me llau tute. Dade Santo, arak len ande cho anav, te aven iek gia sargo amen.

¹² Kana me sema lenchar ando sueto arakhava len golen kai dian len mange arakhlem len ta niko lendar ni jasailo samo o chavo jasardimako, te cherdol so si ando Pisipe.

¹³ Akana llau tute ta phenav gava ando sueto, te avel lenge isto goia veselia pherdi kai si man.

¹⁴ Me diem len che alava, a o sueto murzil pe lende, soke von inai e suetoke, sargo me kai inai sem e suetoko.

¹⁵ Me ni moliv man te le len katar o sueto, me mangav te arakhe len katar o bilachipe.

¹⁶ Isto gia sargo me kai inai sem e suetoko i von inai e suetoke.

¹⁷ Blagosisar len ande cho chachipe. Cho alav si chachipe.

¹⁸ Gia sar tu bichaldan man ando sueto, isto gia me bichaldem len ando sueto.

¹⁹ Ta pala lende me blagosiv isto me man, te sai aven i von blagosime ando chachipe.

²⁰ Me ni moliv man samo pala gala llene, me moliv man pala gola kai si te pachan ande mande kana ka asunen lengo alav.

²¹ Te aven saurre ande iek than sargo tu, Dade, san ande mande a me ande tute, te aven i von iek amenchar, te sai pachal o sueto kai tu bichaldan man.

²² E dragostia kai dian man, me diem len te sai aven iek, gia sar amen sam iek:

²³ me ande lende, a tu ande mande te aven de istina iek te sai llanel o sueto kai tu bichaldan man, ta kai voli len sargo kai voli man.

²⁴ Dade, tu dian len mange, a me mangav te aven manchar kote kai ka avav me te dikhen o blagosipe kai dian man, soke volisardan man mai anglal te cherdol o sueto.

²⁵ Dade chacho, o sueto ni pinllarda tut, A me pinllardem tut, a gola llanen kai tu bichaldan man.

²⁶ Cherdem te llanen ko san tu, ta ka cherav te pinllaren tut ios, te sai o volipe kai si tut pe mande i te avel lenchar ta me ande lende.