Juan 16 - Biblia ande chib Romani

¹ Me phenav tumenge gala ezgode te na jasaren tumaro pachape ande ma.

² Ka traden tumen katar e khanllira e judionenge: Ta avel o llive kana vareko ka mundarel tumen ta ka mislil kai cherel pe Devleko.

³ Ka cheren gola ezgode soke ni pinllaren me Dade ni man.

⁴ Phenav tumenge gava, te sai kana ka avel o llive, te den tumen golli kai me phendemle tumenge. Ni phendem tumenge gala ezgode omanglal soke sema tumenchar.

E buchi kai cherel o Santo Duo

⁵ A akana llautar golete kai bichalda man, a niko tumendar ni puchel man kai llau.

⁶ A tumaro lio tristosailo soke phendem tumenge gala ezgode.

⁷ Me phenav tumenge o chachipe: Mai lache si tumenge te llautar. Soke te na llavatar, gua kai ka del tumen zor ni ka avel tumende. A te llelemtar, ka bichalav le tumenge,

⁸ ta kana vou ka avel ka sikavel e sueto so si o bilachipe, so si o lachipe ta savi si e kris.

⁹ O bilachipe, soke ni pachan ande ma.

¹⁰ O chachipe, soke llav kai o Dad, ta tumen ni ka dikhen man ios.

¹¹ Ta e kris, soke o gazda katar gava sueto, avilo krisime.

¹² Si man but ezgode ios te phenav tumenge, a akana ni ka acharen len.

¹³ Kana ka avel o Duo e chachimako, vou ka inllarel tumen kai sa o chachipe, soke ni ka del orba vou petar. A ka phenel so ka asunel te llanen e ezgode kai si te aven.

¹⁴ Vou ka blagosil man, soke ka lel katar so si murno ta ka cherel te llanenle.

¹⁵ Sogo si me Dade si murno, goleke phendem tumenge kai o Duo ka lel katar so si murno ta ka cherel te llanenle.

¹⁶ Cherricha ios, ta tumen ni ka dikhen man, ta cherricha ios pale ka dikhen man.

O tristope ka cherdol veselia

¹⁷ Ondaka nesave katar e disipulura thode te phenen iek avereke: ¿So si gava kai phenel amenge: cherricha ios ni ka dikhen man, ta cherricha ios pale ka dikhen man soke llautar kai o Dad?

¹⁸ ¿So si gua ‘cherricha ios’? Ni achara so del orba.

¹⁹ O Jesus llanela kai mangena te puchen le ta phenda lenge: Me phendem tumenge kai cherricha ios ta ni ka dikhen man, ta cherricha ios pale ka dikhen man. ¿Gava puchen tumen iek avere?

²⁰ Chachimaia phenav tumenge kai tumen ka roven ta ka aven tristome, a o sueto ka veselilpe. A kana ka aven tristome, tumaro tristope ka cherdol veselia.

²¹ E diskinia kana bianel, dukhal la soke avilo lako llive. A mapalal kana bianel iekhe minone, bristarelpe katar e dukha pala e veselia kai biandilo iek murus ando sueto.

²² I tumen akana sen tristome, a pale ka dikhav tumen, ondaka tumaro lio ka pherdol veselimatar, veselia kai niko ni ka lel tumendar.

²³ Gua llive ni ka puchen man niso. Chachimaia phenav tumenge kai o Dad ka del tumen sogo mangena ande mo anav.

²⁴ Llik akana niso ni manglen ande mo anav. Mangen, ta ka len, te avel tumari veselia pherdi.

O Jesukristo dobisarda e sueto

²⁵ Gala ezgode phendem tumenge e paramichenchar, a avel o llive kana ni ka dav orba ios paramichenchar, bristo ka phenav tumenge cheres mo Dad.

²⁶ Gua llive ka mangen ande mo anav ta me ni phenav kai ka moliv man e Dadeke pala tumende,

²⁷ soke isto o Dad volil tumen. Volil tumen soke tumen volil man, ta pachaien kai avilem e Dadetar.

²⁸ Avilem e Dadetar ando sueto, akana mukau e sueto ta llautar kai o Dad.

²⁹ Ondaka e disipulura phende leke: Akana tu de orba bristomaia, inai paramichenchar.

³⁰ Akana amen achara kai llane sogo si e ezgode, ta ni trubul niko te puchel tut. Goleke amen pacha kai avilan e Devletar.

³¹ O Jesus phenda lenge: ¿De istina akana pachan?

³² O vreme avel, ta akana avilo o vreme kai tumen ka aven fulade suako lleno pe pi rig ta ka muken man korkorre. A ni sem korkorre, soke o Dad si manchar.

³³ Sa gala ezgode phendemlem tumenge te avel tumen pas ande mande. Ando sueto ka avel tumen brige, A vazden tumari vera soke me dobisardem e sueto.