Juan 15 - Biblia ande chib Romani

O chachuno kas drakhengo.

¹ Me sem o chachuno kas drakhengo, a mo Dad si ko arakhel le te bariol.

² Iek krango kai ni del drak, chinel le. A gua kai del drak chistol le te del mai but drak.

³ Tumen akana sen chiste pala e alava kai me phendem tumenge.

⁴ Achen ande mande gia sar me achav ande tumende. O krango nasti del drak vou petar te na avela po kas e drakhengo, isto gia tumen te na achena ande mande.

⁵ Me sem o kas drakhengo a tumen e krangura. Gua kai achel ande mande a me ande lete, gava del but drak, soke bi murno tumen nasti cheren niso.

⁶ Gua kai ni achel manchar ka chudau le avri sargo krango, ta ka sukol sargo krangura kai chiden len pe iek than ta chuden len ande iag te phabon.

⁷ Te achen ande mande, a me alava ande tumende, sogo te mangena ka dav tumen.

⁸ Ande gava sikadol me Dadeko blagosipe, te den but drak gia te aven me disipulura.

⁹ Me voliv tumen gia sar mo Dad volil man. Achen ande mo volipe.

¹⁰ Te kandena so phenen me zakonura, ka achen ande mo volipe, gia sar me kandau so phenen me Dadeke zakonura ta achav ande leko volipe.

¹¹ Gia dav orba tumenge te veselin tumen manchar, ta tumari veselia te avel pherdi.

¹² Gava si murno zakono. Te volisaren tumen iek avere, gia sar me volisardem tumen.

¹³ O volipe mai baro si, o manus kai del po zivoto pala pe amal.

¹⁴ Tumen sen me amal, te cherden so phenav tumenge.

¹⁵ Ni ka ikharav tumen ios esluga, soke o esluga ni llanel so cherel leko gazda. Me ikharav tumen amal, soke sikadem tumenge suako ezgoda kai asundem me Dadetar.

¹⁶ Tumen ni esvirisarden man, me esvirisardem tumen, ta thodem tumen te den ta te inllaren but drak, ta tumari drak te achel. Sogo ka mangen me Dadetar ande mo anav, vou ka del tumen.

¹⁷ Gava mangav te cheren: Te volisaren tumen iek avere.

O sueto ka murzil pe tumende

¹⁸ Te murzisarela o sueto pe tumende, llanen kai pe mande murzisarda mai anglal.

¹⁹ Te avilena e suetoke, o sueto volisardaia tumen sar volil so si leko. A me esvirisardem tumen katar o sueto, goleke o sueto murzil pe tumende, soke ni sen e suetoke.

²⁰ Den tumen golli o alav kai me phendem tumenge: O esluga inai mai baro neko po gazda. Gia sar llele pala mande, isto gia ka llan pala tumende. A te cherde so phenav, i tumaro alav ka kanden.

²¹ Sa gava ka cheren tumenge pala mo anav, soke o sueto ni pinllaren gole kai bichalda man.

²² Von ni avena dosale te na avilema me te dav lenge orba. A akana inai len so te phenen pala po bilachipe,

²³ soke gola kai murzin pe mande, i pe mo Dad murzin.

²⁴ Ni avilaia len bilachipe, te na cherdema e bucha maskar lende kai niko ni cherda omanglal. A dikhle gala ezgode kai cherdem ta murzin pe ma ta i pe mo Dad.

²⁵ A gava avilape te sai cherdol so si pisime pe lengo zakono: Pala niso murzisarde pe mande.

²⁶ A kana ka avel o gua kai ka del tumen zor, gole kai me ka bichalav tumenge me Dadetar, o Duo e chachimako kai avel e Dadetar, vou ka phenel mandar.

²⁷ Ta i tumen ka phenen mandar, soke sena manchar mai anglal.