Juan 14 - Biblia ande chib Romani

O Jesus si o drom te lla kai o Dad

¹ Te na tristolpe tumaro lio. Pachan ando Del, pachan i ande mande.

² Ande me Dadeko cher si but thana. Te na avilaia gia, phendema le tumenge. Ka llau te lacharav than tumenge.

³ A te llelemtar ta te lachardem than tumenge, pale ka avav te inllarav tumen manchar, te aven kote kai me ka avav.

⁴ Tumen pinllaren o drom kai inllarel kote kai me llau.

⁵ O Tomas phenda e Jesuseke: Gazda, ni llana kai lla, ¿sar ka pinllara o drom?

⁶ O Jesus phenda leke: Me sem o drom, o chachipe ta o zivoto. Niko ni llal kai o Dad bi murno.

⁷ Te pinllaren man, i me Dade ka pinllaren, ta akana pinllaren le ta dikhen le.

⁸ O Felipe phenda leke: Gazda, sikau amenge e Dade, ta golea si amenge dosta.

⁹ O Jesus phenda leke: Felipe, gachin cherel kai sem tumenchar, ¿ta ni pinllardan man? Kogo dikhla man, dikhla e Dade, ¿soke phene: Sikau amenge e Dade?

¹⁰ ¿Ni pacha kai me sem ando Dad a o Dad si ande mande? E alava kai me phenav tumenge, ni phenav len me mandar. O Dad kai zivil ande mande vou cherel e bucha.

¹¹ Pachan man kai me sem ando Dad a o Dad si ande mande. A te na, pachan man isto pala e ezgode kai cherav.

¹² Chachimaia phenav tumenge kai kogo pachal ande ma, e ezgode kai me cherav i vou ka cherel len. Ta ios mai bare ka cherel len, soke me llautar kai o Dad.

¹³ Ta sogo tumen mangena e Dadetar ande mo anav, ka cherav le, te sai avel o Dad blagosime.

¹⁴ Te mangena vareso ande mo anav, ka cherav le.

O Duo e chachimako

¹⁵ Te volina man, cheren so phenen me zakonura.

¹⁶ Me ka moliv man e Dadeke ta vou ka del tumen aver kai ka del tumen zor te avel tumenchar suako llive:

¹⁷ o Duo e chachimako, gole kai o sueto nasti lel, soke ni dikhel le, ta ni pinllarel le. A tumen pinllaren le, soke zivil tumenchar ta i ka avel tumenchar.

¹⁸ Ni ka mukau tumen bidadeko, ka avav tumenchar.

¹⁹ Cherricha ios, ta o sueto ni ka dikhel man ios. A tumen ka dikhen man, ta ka zivin soke me ziviu.

²⁰ Gua llive tumen ka llanen kai me sem ande mo Dad, a tumen ande mande, ta me ande tumende.

²¹ Gua kai si le me zakonura ta cherel len, gua si kai volil man. Ta mo Dad ka volil le, ta i me ka voliv le ta ka sikavav leke sar sem.

²² O Judas, na o Iskariote, puchla le: Gazda, ¿soke ka sikado amenge a e suetoke iok?

²³ O Jesus phenda leke: Gua kai volil man cherel so phenav ta mo Dad ka volil le, ta mo Dad ta me ka ava lete ta ka zivisara ande lete.

²⁴ Gua kai ni volil man, ni cherel so phenav. O alav kai asunden inai murno, e Dadeko si kai bichalda man.

²⁵ Phenav tumenge gala ezgode akana kai sem tumenchar;

²⁶ A o Santo Duo kai o Dad ka bichalel ande mo anav, vou ka sikavel tumen sogo si e ezgode ta ka cherel te den tumen golli sa so phendem tumenge.

²⁷ E pas mukav tumenge, murni pas dav tumen. Ni dav la tumenge gia sar del la o sueto. Te na tristolpe tumaro lio, na daran.

²⁸ Asunden kai me phendem tumenge kai ka llautar ta kai ka avav tumende. Te volisardena man veselisailena te llanen kai llautar kai o Dad, soke o Dad si mai baro mandar.

²⁹ Akana phenaule tumenge te sai pachan kana ka avenpe gala ezgode.

³⁰ Ni ka dav but orba tumenchar, soke avel gua kai gazdaril pe gava sueto. Lea inai man niso.

³¹ Morabi te cherdol gia, te sai llanel o sueto kai me voliv e Dade, ta kai cherav so bichalda man. Usten. Aventar katar.