Juan 13 - Biblia ande chib Romani

O Jesus jalavel e disipulonenge porrne

¹ Achela cherricha llivesa te avel Paskua, ta o Jesus llanela kai aviloa leko llive te llaltar katar gava sueto kai po Dad. Vou volisarda pe disipulonen kai sea ando sueto ta volisarda len llik kai o son.

² O llavolo thoda ando lio e Judaseko, chavo e Simonoko Iskariote, te phukavel e Jesuse,

³ a o Jesus llanela kai o Del thodaia sa e ezgode tala leke va ta kai o Del bichalda le ta kai saia te llaltar kai o Del,

⁴ ustilo katar e sinia, ikanda po gertachi ta phangla pe po maskar iek piskiri.

⁵ Mapalal thoda pai ande iek tepsia ta thoda te jalavel e disipulonenge porrne, ta te koslen len e piskirea.

⁶ Kana avilo kai o Simon Pedro te jalavel leke porrne, o Simon Pedro phenda leke: Gazda, ¿tu ka jalave me porrne?

⁷ O Jesus phenda leke: Akana ni achare so cherav, a mapalal ka achare.

⁸ O Pedro phenda leke: ¡Nikada ni ka mukau tut te jalave me porrne! O Jesus phenda leke: Te na jalavav len, ni ka ave katar murne llene.

⁹ O Simon Pedro phenda leke: ¡Te si gia, na jalau samo me porrne, jalau me va ta i mo soro!

¹⁰ O Jesus phenda leke: Ko si jalado trubul te jalavel samo pe porrne, soke si sa jalado. A tumen sen jalade, a inai saurre jalade.

¹¹ Ta phenda: Inai jalade saurre, soke llanela ko saia te phukavel le.

¹² Mapalal kana jalada lenge porrne, pale lia po gertachi, beslo pale pe sinia ta phenda lenge: ¿Llanen so si gua kai cherdem?

¹³ Tumen ikharen man Kovachi ta Gazda. Sukar phenen, soke gua sem.

¹⁴ A me, o Kovachi ta o Gazda, jaladem tumare porrne, goleke i tumen si te jalaven tumare porrne iek avereke.

¹⁵ Me cherdem gava, te cheren le i tumen.

¹⁶ Chachimaia phenav tumenge kai o esluga inai mai baro neko leko gazda, ni o bichaldo mai baro goletar kai bichalda le.

¹⁷ Te acharen gala ezgode, blagosime ka aven te cherenalen.

¹⁸ Ni phenau le pala sa tumende. Me llanav ka esvirisardem. A si te cherdol so si pisime: Gua kai jal manchar marrno, vazdinailo pe mande.

¹⁹ Phenav le tumenge akana, gia kana ka avelpe gaia ezgoda, te pachan kai me sem.

²⁰ Chachimaia phenav tumenge kai kogo ka lel gole kai bichalav, man lel. Ta kogo lel man, lel gole kai bichalda man.

Iek tumendar ka phukavel man

²¹ Kana o Jesus phenda lenge gala orbe, tristosailo duotar ta phenda lenge bristomaia: Chachimaia phenav tumenge kai iek tumendar ka phukavel man.

²² Ondaka e disipulura thode te dikhen iek pe aver, ta ni llanena katar savo lleno dela orba.

²³ Iek lendar, gole kai o Jesus volila but, saia inzardo pasa o Jesus kana von jana,

²⁴ galeke o Simon Pedro cherda te puchel katar savo lleno dela orba.

²⁵ Vou, kai inzola pasa o Jesus, puchla le: Gazda, ¿ko si gua lleno?

²⁶ O Jesus phenda leke: Gole kai me ka dav o marrno chingo, gua si. Ta chingarda o marrno ta diale kai o Judas, chavo Simonoko Iskariote.

²⁷ Ta kana jala o marrno, o llavolo dia ande leko lio. Ondaka o Jesus phenda leke: So si te chere, cher le mai oma.

²⁸ A niko lendar kai besena pe sinia ni acharda soke phendaia gava.

²⁹ Soke o Judas inllarela e love, nesave mislina kai o Jesus phendaia leke te chinel fiso kai trubula len e Paskuake, o te del vareso e chorren.

³⁰ Kana o Judas jala, llelotar, ta pelia e riat.

O zakono nevo

³¹ Kana o Judas llelotar, o Jesus phenda: Akana o Chavo e Manuseko si blagosime, ta o blagosipe e Devleko sikadol ande le.

³² A te sikavel o Chavo e Manuseko e Devleko blagosipe, i o Del ka sikavel e Chaveko blagosipe ta ka cherel le oma.

³³ Chavalen, ni ka avav tumenchar but vreme. Tumen ka roden man, A isto gua kai phendem e judionenge, phenaule akana tumenge: Tumen, nasti llan kote kai me ka llau.

³⁴ Iek nevo zakono dav tumen: Te volin tumen iek avere. Isto gia sar me voliv tumen, volisaren tumen, iek avere.

³⁵ Cheres gava, saurre ka llanen kai tumen sen me disipulura, te volisarden iek avere.

O Jesus phenel kai o Pedro ka phenel kai ni pinllarel le.

³⁶ O Simon Pedro puchla e Jesuse: Gazda, ¿kai lla? Kote kai me llau nasti lla pala mande akana. Mapalal ka lla pala mande.

³⁷ O Pedro phenda leke: Gazda, ¿soke nasti llau pala tute akana? ¡Mo zivoto ka dav pala tute!

³⁸ O Jesus phenda leke: ¿De istina cho zivoto dea pala mande? Chachimaia phenav chuke: Ni ka basel o basno, a tu ka phene trin droma kai ni pinllare man.