Juan 12 - Biblia ande chib Romani

Iek diskinia chudel meriso po Jesus

¹ Achena sou llive te avel e Paskua ta o Jesus avilo ande Betania, kote kai zivila o Lasaro, gua kai vou llungadaia le katar o meripe.

² Kote cherde e Jesuseke iek pachiu. E Marta thoda e sinia a o Lasaro saia iek katar e llene kai besela pe sinia ta jala lea.

³ E Maria lia cherricha meriso, kai saia but kuch, ta thoda pe Jesukristoke porrne ta kosla len pe balenchar. Ta sa o cher khandela ando meriso.

⁴ Ondaka o Judas Iskariote, iek katar leke disipulura kai saia te phukavel e Jesuse phenda:

⁵ ¿Soke ni bichindinailo gava meriso pe so mol o rado iekhe burseko ta te pomozilpe gole lovenchar e llenen kai si chorre?

⁶ A o Judas ni phenda gava soke saia leke zao katar e chorre, gua phenda le soke saia chor, ta lete saia e anbava kai thovena e love ta chorela peke so thovena andre.

⁷ O Jesus phenda leke: Mukla, soke voi cherda gava pala o llive kana ka prajon man.

⁸ Soke e chorre ka aven tumenchar suako llive, a me iok.

But katar e judiura pachana.

⁹ But katar e judiura llangle kai o Jesus saia ande Betania ta avile, na samo pala o Jesus, avile te dikhen e Lasaro gole kai o Jesus llungadaia katar o meripe.

¹⁰ Ondaka e mai preche popura chinade te mundaren i e Lasaro,

¹¹ soke cheres lete but katar e judiura avenatar ta pachana ando Jesus.

O Jesus del ando Jerusalem

¹² Thiarinako but llene kai avilea pe Paskua llangle kai o Jesus avelatar ando Jerusalem.

¹³ Ondaka lie peke krangura katar e palmere ta lleletar angla lete, ta urkina: ¡Osana! ¡Blagosime gua kai avel ande Devleko anav, o Charo Israeleko!

¹⁴ O Jesus malada iek magarcho ta likisto pe lete, sar phenel ando Pisipe:

¹⁵ Na dara chei e Sioneki cho Charo avel, pe iek magarcho.

¹⁶ Leke disipulura ni acharde gala ezgode. A kana o Jesus blagosisailo, llangle kai sa gala ezgode kai cherde leke, sea pisime ando Pisipe.

¹⁷ E llene kai sea e Jesusea kana ikharda e Lasaro katar o limori ta llungada le, phenena so dikhle.

¹⁸ Goleke e llene avile angla lete, soke asundea kai o Jesus cherdaia gaia ezgoda.

¹⁹ A e fariseura phenena iek avereke: Dikhen gia amen ni ka dobi niso galea. Dikhen ¡sa o sueto llaltar pala lete!

Nesave griegura roden e Jesuse

²⁰ Andar gola kai llelea ando Jerusalem te blagosisaren pe Paskua, sea nesave griegura.

²¹ Gala avile pasa o Felipe, kai saia katar e Betsaida e Galileaki, ta molisaile leke: Gazda, manga te dikha e Jesuse.

²² O Felipe llelo kai o Andres ta phenda leke gava, mapalal e dui avile kai o Jesus ta phende leke gaia ezgoda.

²³ O Jesus phenda lenge: Avilo o llive te avel blagosime o Chavo e Manuseko.

²⁴ Chachimaia phenav tumenge, e simicha katar o lliu te na perela pe phuv ta te na merela, achela korkorre. A te merela, ka del but kuchorra.

²⁵ O lleno kai volil po zivoto, ka jasarel le. A o lleno kai ni volil po zivoto ande gava sueto ka zivil ando zivoto ostade.

²⁶ Gua kai mangel te avel mo esluga, morabi te llal pala mande. Ta kaigo te avava me, kote ka avel mo esluga. Kogo llal pala ma, mo Dad ka falil le.

O Jesus phenel kai si te merel

²⁷ ¡Akana sem but tristome! ¿A so ka phenav? ¿Ka phenav, Dade: ‘braduisar man akana’? ¡A goleke avilem pe gava llive!

²⁸ Dade, blagosisar cho Anav. Ondaka iek avazi avilo e milosotar kai phenela: Blagosisardem le, ta pale ka blagosiv le.

²⁹ E llene kai sea kote phenena kai so asundilo saia iek germipe. Ta nesave phenena: Iek suecho dia orba.

³⁰ O Jesus phenda lenge: Gava avazi ni avilo pala ma, avilo pala tumende.

³¹ Akana avili e kris pe gava sueto, ta o llavolo ka avel tradino avri.

³² A me kana ka avav vazdino katar e phuv, ka anav saurren me mande.

³³ Ta phenela gava te sai acharen sar saia te merel.

³⁴ E llene phende leke: Amen asundam e zakonotar kai o Mesias zivil ostade. ¿Sar phene tu kai o Chavo e Manuseko si te vazdinaol? ¿Ko si gava Chavo e Manuseko?

³⁵ O Jesus phenda lenge: O villelo cherricha ios si tumenchar. Llan kana si tumenchar o villelo te na perel pe tumende o truniariko, soke ko llal ando truniariko ni llanel kai llal.

³⁶ Pachan ando villelo akana kai o villelo si tumenchar, te aven e villeloke. Kana phenda gala ezgode o Jesus llelotar ta gurudilo lendar.

Soke e judiura ni pachana

³⁷ O Jesus cherda but bare ezgode, ta von ni pachana ande lete,

³⁸ soke saia te cherdol so phendaia o profeta o Isaias: Devla, ¿ko pachaia ande amaro alav? ¿Kake sikadilo e Devleko va?

³⁹ Goleke nasti pachana soke o Isaias phenda:

⁴⁰ O Del korrada lenge akha ta zuriarda lengo lio, te na dikhen, te na acharen, te na keimpe, a me te sastarav len.

⁴¹ O Isaias phenda gava kana dikhla e Jesuseki dragostia, ta phendaia cheres lete.

⁴² Ta but judiura pachaie ando Jesus, ta i but katar e gazda e foroke, a ni phenenale pala e fariseura, te na aven tradine katar e khanllira e judionenge.

⁴³ Soke mai but volina e murusengi dragostia neko e Devleki dragostia.

O Jesus avilo te braduil e sueto

⁴⁴ O Jesus phenda ando baro avazi: Kogo pachal ande mande, ni pachal samo ande mande, pachal i ande gua kai bichalda man.

⁴⁵ Kogo dikhel man, dikhel gole kai bichalda man.

⁴⁶ Me, o villelo, avilem ando sueto te sai suako lleno kai pachal ande mande te na achel ando truniariko.

⁴⁷ Gua kai asunel me alava ta ni cherel len ni thovav pe lete kris, soke ni avilem te thovav kris po sueto, me avilem te braduiv e sueto.

⁴⁸ Gua kai ni kamel te guruvel me alava, si le ko te thovel pe lete e kris, o alav kai me phendem, vou ka thovel pe lete e kris ando llive mai anglal.

⁴⁹ Soke ni dav orba me mandar, o Dad, kai bichalda man, vou phenda mange so si man te phenav, ta so si man te sikavav.

⁵⁰ A me llanav kai leko zakono si zivoto ostade. Goleke so phenav me, o Dad phenda mange te phenaule.