Juan 1 - Biblia ande chib Romani

¹ Mai anglal saia o Alav, ta o Alav saia e Devlea ta o Alav saia o Del.

² Vou saia mai anglal e Devlea.

³ Sa e ezgode letar cherdile, a bi leko niso katar so si cherdo ni cherdiloia.

⁴ Ande le saia o zivoto, ta o zivoto saia o villelo e manusengo.

⁵ O villelo ando truniariko klichil, ta o truniariko nasti mundarda le.

⁶ Saia iek manus bichaldo e Devletar, kai ikhardola Juan.

⁷ Vou avilo pala e orba e chachi, te sai del e orba e chachi katar o villelo, te sai pachan ande le sa e manusa pala e orba kai vou dela.

⁸ Vou ni saia o villelo, vou avilo te sai del orba chachi katar o villelo.

⁹ O villelo chachuno kai kletosarel suakone llene avela pe gava sueto.

¹⁰ Ando sueto saia, ta o sueto letar cherdilo, a o sueto ni llangla ko saia vou.

¹¹ Pala piro avilo, a leke ni lie le.

¹² A sa golen kai lie le, golen kai pachan ande leko anav dia len e dragostia te sai cherdon chave e Devleke.

¹³ Von ni biandile katar e volia e maseki, ni rateki, ni e manuseki, von biandile e Devletar.

¹⁴ Ta gua Alav cherdilo manus ta zivisarda maskar amende, pherdo volipe ta chachipe, ta dikhlam leki dragostia, dragostia sar o edino Chavo e Devleko.

¹⁵ O Juan dia orba chachi letar kana phenda: Gava si kai me phenava letar: Kai avel pala mande, kai si mai anglal mandar, soke saia mai anglal mandar.

¹⁶ Soke saurre liam katar leko barvalipe ta katar leko chachipe,

¹⁷ soke o zakono diale katar o Moises, a o volipe ta o chachipe avile katar o Jesukristo.

¹⁸ E Devle niko ni dikhla le nikada. O edino Chavo kai si lea, vou cherda te pinllaren le.

Alava katar o Juan kai kristil

¹⁹ Gaia si e orba e chachi katar o Juan, kana e judiura bichalde katar o Jerusalem poponen ta levituria te puchen le: ¿Tu, ko san?

²⁰ Ta chachimaia phenda lenge: Me ni sem o Mesias.

²¹ Pale puchle le: ¿Ko san tu, o Elias? O Juan phenda lenge: Inai sem o Elias ¿A ko san tu, o profeta? O Juan phenda: Iok.

²² Phende leke: ¿A ko san? Si te phena vareso golenge kai bichalde amen. ¿Phen amenge ko san tu?

²³ O Juan phenda: Me sem o avazi katar iek lleno kai urkil po pusto: ‘Ortosaren e Gazdako drom,’ gia sar phenda o profeta o Isaias.

²⁴ A gola llene kai sea bichalde te den orba e Juanea, sea katar fariseura.

²⁵ Ta puchle le: ¿Soke kristisare, kana tu inai san o Kristo, ni o Elias, ni o profeta?

²⁶ O Juan phenda lenge: Me kristiv tumen e paiea, a maskar tumende si iek kai tumen ni pinllaren.

²⁷ Gava si gua kai avel mapalal mandar, me ni sem lacho ni te putarav o kavisi leke miniengo.

²⁸ Gala ezgode nakhle ande Betania, pe ogoia rig katar o Jordan, kote kai o Juan kristila.

E Devleko Bakro

²⁹ Thiarinako o Juan dikhla kai o Jesus avela lete, ta phenda: ¡Etalo kote e Devleko Bakro, kai ikanel o bilachipe e suetotar!

³⁰ Letar dava orba kana phendem: Pala mande avel iek lleno kai si mai baro mandar, soke vou zivila mai anglal te biandivav me.

³¹ Ta ni me ni pinllarava le. Goleke avilem te kristisarav e paiea, te sai pinllarel le o Israel.

³² Ta o Juan phenda: Dikhlem kai o Duo fuliela katar o miloso sargo iek gulubo, ta achilo upral pe lete.

³³ Me ni pinllarava le. A gua kai bichalda man te kristisarav e paiea, phenda mange ‘Pe gua kai ka dikhe kai fuliel o Duo ta kai achel pe lete, gua si kai kristisarel e Santone Duoia.’

³⁴ Ta me dikhlem le, ta phenav kai vou si e Devleko Chavo.

E purve disipulura

³⁵ Thiarinako pale saia o Juan, ta dui katar leke disipulura.

³⁶ Ta kana dikhla kai o Jesus llala kotar, phenda: ¡Etalo kote e Devleko Bakro!

³⁷ E dui disipulura e Juaneke kana asunde so phenda o Juan lleletar pala o Jesus.

³⁸ Kana o Jesus boldinailo, ta dikhla kai llele pala lete, phenda lenge: ¿So roden? Von phende: Kovachi, ¿kai zivi?

³⁹ O Jesus phenda lenge: Aven te dikhen. Von llele ta dikhle kai zivila, ta achile lea gua llive.

⁴⁰ O Andres, phlal katar o Simon Pedro, saia iek katar e dui kai asundea e Juane, ta kai llele pala o Jesus.

⁴¹ O Andres mai anglal llelo te rodel pe phlale e Simono, ta phenda leke: Maladam e Mesiase kai gua si o Kristo.

⁴² Ta anda le kai o Jesus. Ta o Jesus dikhla pe lete, ta phenda: Tu san o Simono, chavo e Juaneko, tu ka ikhardo Sefas, Sefas si Pedro

O Jesus ikharel e Felipe ta e Natanaele

⁴³ Thiarinako mangla o Jesus te llal ande phuv katar e Galilea. Kote malada e Felipe ta phenda leke: Aide pala ma.

⁴⁴ O Felipe saia katar e Betsaida, o foro e Andreseko ta e Pedroko.

⁴⁵ O Felipe malada e Natanaele ta phenda leke: Maladam gole kai o Moises pisisisarda letar ande lila e zakonoke, ta kai i e poraukura pisisarde letar: O Jesus, o chavo e Joseeko, katar o Nazaret.

⁴⁶ O Natanael phenda leke: ¿Sai liklel varesavo lachipe katar o Nazaret? O Felipe phenda leke: Aide ta dik.

⁴⁷ Kana o Jesus dikhla kai o Natanael avela karing lete, phenda letar: ¡Etalo kote avel iek chachuno lleno katar o Israel, kai ande lete inai kojaipe!

⁴⁸ O Natanael phenda leke: ¿Katar pinllare man? O Jesus phenda leke: Mai anglal te ikharel tut o Felipe, kana sana telal katar e simochina, dikhlem tut.

⁴⁹ O Natanael phenda leke: ¡Kovachi, tu san e Devleko Chavo! ¡Tu san o Charo e Israeleko!

⁵⁰ O Jesus phenda leke: ¿Soke phendem chuke Dikhlem tut telal katar e simochina pacha? Ezgode mai bare galendar ka dikhe.

⁵¹ Ta i phenda leke: Chachimaia phenav tumenge kai katar angle ka dikhen o miloso putardo ta e Devleke suechura kai liklen ta fulien upral pe manuseko Chavo.