Josue 9 - Biblia ande chib Romani

E gabaonitura

¹ Kana asunde kai o Israel dobisarda, e charura ititura, amorreura, kananeura, ferezeura, jeveura ta jebuseura kai sea pe rig kai perel o kham katar o Jordan, pe burdura ande bare umalia, ta pasa e mora llik kai o Libano,

² achile pe orba te marenpe e Josuea ta e Israelea.

³ A e llene katar o Gabaon kana asunde so cherda o Josue e foroke katar o Jeriko ta o Ai,

⁴ phende te kojaven le. Llele po drom ta cherdepe kai avena katar aver phuv. Thode pe magarchura vreche ta morcha purane kai inllardol e mol pharrade ta suvde,

⁵ ta thode pe pete patave ta minie purane kai suvdea len pale, ta anena samo marrno suko.

⁶ Kana avile ando pero katar o Gilgal phende e Josueke ta e israelenge: Amen ava duratar katar aver phuvia. Achen pe orba amenchar.

⁷ Ta e israelitura phende e jeveonenge: Sai te avel kai tumen sen katar. ¿Sar ka acha pe orba tumenchar?

⁸ A von phende e Josueke: Amen ka ava tumare sluge. Ta o Josue puchla len: ¿Ko sen tumen? ¿Katar aven?

⁹ A von phende lenge: Amen ava duratar soke tumaro Del si but pinllardo. Amen llanglam so cherda ando Ejipto,

¹⁰ ta so cherda e duie charonenchar amorreura pe ogoia rig katar o Jordan, e Sijoneke o charo katar o Jesbon ta e Ogeke o charo katar o Basan kai zivila ando Astarot.

¹¹ Goleke amare gazda ta amaro foro vacharde amenge: Len tumenge so trubul te jan po drom ta llan lende, te vacharen lenge kai amen manga te achen pe orba lenchar ta te ava lenge sluge.

¹² Kana likistam te ava tumende, amaro marrno saia tato ta akana si zuralo ta suko.

¹³ Ta amare morcha sea neve pherde mol, ta akana si sa pharrade. Ta i amare patave ta e minie, soke o drom sai but baro.

¹⁴ Ta e israelitura lie katar o jape kai anena e gabaonitura, ta ni puchle e Devle.

¹⁵ Ta o Josue achilo pe orba lenchar ta jala lenge sovel kai ni ka mundarel len, ta i e gazda katar e israelitura cherde isto gia.

¹⁶ Kana nakhle trin llive sar kai achile pe orba, e israelitura llangle kai e gabaonitura sea llene kai zivina pase.

¹⁷ Ta likiste e israelitura te roden len, ta ando trito llive avile ande lenge forura kai sea o Gabaon, o Kefira, o Beerot ta o Kiriat Jearim.

¹⁸ Ta ni mundarde len soke e gazda katar e israelitura jalea sovel ando anav e Gazdako ta Del e Israeleko kai ni ka mundaren len. Goleke o foro ni dela orba sukar katar lenge gazda,

¹⁹ a e gazda phende lenge: Amen jalam lenge sovel ando anav e Gazdako ta Del e Israeleko kai ni ka mundara len. Goleke akana nasti chera niso.

²⁰ Morabi te muka len te zivin soke te na, ka phaga e sovel ta o Del ka joliaol pe amende.

²¹ Gia e gazda katar e israelitura phende te na mundaren e gabaonen. Ta cherde len pe sluge, te anen e kasta ta o pai sa e foroke. Gia e gazda cherde so jale sovel.

²² O Josue ikharda e gabaonen ta puchla len: ¿Soke kojaden amen ta phenden kai avena duratar, kana o chachipe si kai tumen zivin kate?

²³ Goleke tumen ka achen prokete ta ostade ka aven sluge. Ka chinen kasta ta ka ikanen o pai kai trubulpe ando cher me Devleko.

²⁴ Ta von phende e Josueeke: Amen cherdam le soke but darailam tumendar pala so asundam kai o Del phenda e Moiseseke leko sluga, kai ka del tumende sa gaia phuv ta kai ka zatril sa e llenen kai zivin kate.

²⁵ Akana amen sam ande che va. Cher amenge sogo kamea.

²⁶ Ta o Josue ni mukla e foro te mundarel e gabaonen,

²⁷ ta thoda len te anen kasta ta pai e foroke ta kai o altar esvirime e Devletar. Llik akana von si e sluge e foroke.