Josue 8 - Biblia ande chib Romani

E israelitura den ando Ai

¹ O Del phenda e Josueeke: Na dara ta na brigisao. Le chuke sa che boñikonen ta lla te mareto e foroia katar o Ai, soke me ka cherav te dobi. Ka dav tut e charo katar o Ai ta leke llenen. O Ai ta e phuv ka aven chire,

² ta ka chere e foroke katar o Ai isto gia sar cherdan e foroke katar o Jeriko ta leko charo, samo kai akana tumen sai te len e ezgode ta e zivirinie kai si ando foro. Den palal katar o foro kana ni ka uzdinpe.

³ Ondaka o Josue lacharda e boñikonen te marenpe e foroia katar o Ai. Ikharda tranda milie boñikonen ta bichalda len orachaia,

⁴ ta phenda lenge: Asunen, llan palal katar o foro ta gurudon pase. Kote lacharen tumen te maren tumen.

⁵ A me ta sa e llene ka ava pase katar o foro. Ta kana ka liken te marenpe amenchar, ka nasa angla lende te sai llan pala amende gia sar cherde le omanglal.

⁶ Kana amen ka nasa von ka roden amen, soke ka mislin kai pale dobisarde amen ta gia ka durion katar o foro.

⁷ Ondaka tumen ka liken kotar kai gurudon ta ka len tumenge o foro, soke o Del ka del le tumenge.

⁸ Ta kana ka len le phabaren le sar phenda le o Del. Dikhen kai me phendem le tumenge.

⁹ Ondaka o Josue bichalda len, ta gurudile maskar o Betel ta o Ai, pe rig kai perel o kham katar o Ai. Ta o Josue racharda ando pero.

¹⁰ Thiarinako o Josue ustilo but rano ta chidia pe llenen. Mapalal thodape angla lende e purenchar katar o Israel ta llelo te marelpe e foroia katar o Ai.

¹¹ Sa e boñikura avile pase katar o foro ta logle pe rig norte, ta von sea po maskaral katar e bari umal ta o foro.

¹² O Josue guruda preko panch milie boñikonen maskar o Betel ta o Ai, pe rig kai likel o kham katar o foro.

¹³ Gia e boñikura sea fulade pe dui kotora, iek gurudino pe rig kai perel o kham, a ogola pe rig norte katar o pero. Gaia riat o Josue sigarda te avel po maskaral katar e bari umal.

¹⁴ Kana o charo katar o Ai dikhla so nakhela, sigarda te likel pe boñikonenchar te marenpe e israelitonenchar ande bari umal katar o Araba. A von ni llanena kai aver israelitura sea gurudine palal pala o foro.

¹⁵ Ondaka o Josue ta sa o Israel cherdepe kai jasarena len ta nasle angla e boñikura katar o Ai po drom kai llal ando pusto.

¹⁶ Ondaka phenda te liken sa e llene katar o Ai te roden e llene katar o Israel, ta kana rodie len durile katar o foro.

¹⁷ Ni saia ni iek lleno katar o Ai ta o Betel kai ni likisto te rodel e israelen, ta gia mukle e foro bi te arakhen le.

¹⁸ Ondaka o Del phenda e Josueeke: Inzar cho jarni po Ai soke me ka dav le ande cho va. Ta o Josue inzarda po jarni po foro.

¹⁹ Ondaka gola kai sea gurudine likiste, lie e foro ta sigarde te phabaren le.

²⁰ Kana e llene katar o Ai dikhle kai likela thuv katar o foro ta vazdiniaola llik kai o miloso, nasti nasena soke e israelitura kai von rodena po pusto, akana avena te marenpe lenchar.

²¹ Ta kana o Josue ta sa e israelitura dikhle kai gola kai sea gurudine liea e foro ta phabarena le, ondaka irisaile ta die ando foro katar o Ai.

²² Mapalal ogola likiste katar o foro, ta gia e llene katar o Ai achile phangle. Ta e israelitura mundarde sa e llenen katar o Ai.

²³ Samo mukle llundo e charo ta ande le phanglo angla o Josue.

²⁴ Mapalal kana mundarde sa e llenen katar o Ai kai likistea te roden len, e israelitura irisaile ando Ai ta mundarde sa e llenen kai achilea llunde.

²⁵ Ande gua llive mule desudui milie llene katar o Ai, murusa ta diskinie,

²⁶ soke o Josue mukla po jarni inzardo lligo ni mundarde sa e llenen katar o Ai.

²⁷ E israelitura lie e zivirinie ta e ezgode kai sea ando foro, gia sar o Del phendaia le e Josueeke.

²⁸ Ta o Josue phabarda o Ai ta mukla le zatrime ostade, llik allive.

²⁹ E charo katar o Ai umblada le katar iek kas lligo ni peli e riat. Ta kana peli e riat, o Josue phenda te ikanen le kotar, te chuden le avri katar o foro ta te vazden pe lete iek umpa barra kai si kote llik akana.

O Josue chitil o zakono e Devleko po burdo o Ebal

³⁰ Ondaka o Josue vazdia po burdo o Ebal iek altar e Gazdake o Del e Israeleko,

³¹ gia sar o Moises sluga e Devleko phendaia le e llenenge katar o Israel prema sar si pisime ando zakono e Moiseseko: Iek altar cherdo e barrenchar kai niko ni radisarda len. Ta die kurbanura e Devleke ta so si dino pala e pas.

³² Mapalal o Josue pisisarda pe barra katar o altar angla e israelitura, isto o zakono e Moiseseko.

³³ Ta sa o foro katar o Israel ta i e llene kai sea katar aver phuvia, e phure, e gazda ta e krisaria, sa sea pe porrne angla e arka katar o alav e Devleko kai inllarena la e levitura. Dopas lendar sea pe rig katar o burdo o Gerizim, ta ogola dopas sea pe rig katar o burdo o Ebal, sar phendaia le o Moises te sai blagosin e purvo drom e foro katar o Israel.

³⁴ Mapalal o Josue chitisarda sa o lil katar o zakono, o blagosipe ta e armaia.

³⁵ Ni saia ni iek alav kai diaia o Moises kai o Josue ni chitisarda angla o foro katar o Israel, angla e diskinie, angla e minone ta angla e llene kai sea katar aver phuvia kai zivina maskar lende.