Josue 7 - Biblia ande chib Romani

O bilachipe kai cherda o Akan

¹ A iek lleno katar e vicha e Judaeki kai ikhardola Akan, chavo katar o Karmi, unuko katar o Zabdi ta paraunuko katar o Zera, lia ezgode kai sea dine te aven zatrime, goleke o Del jolailo po foro katar o Israel.

E duk cheres o bilachipe

² O Josue bichalda nesave llenen te llan katar o Jeriko llik kai o Ai. O foro Ai saia pasa o Betaven pe rig kai likel o kham katar o Betel. Ta o Josue phenda lenge te llan te dikhen e phuv katar o Ai. Ta von llele ta dikhle o foro katar o Ai.

³ Ta kana irisaile phende e Josueeke: Inai soke te marelpe sa o foro te den po Ai, samo dui o trin milie boñikura trubun te sai len e foro. Na bichal saurren soke inai but llene.

⁴ Gia llele preko trin milie boñikura te den po foro o Ai. A e llene katar o Ai dobisarde len ta nasle, a e llene katar o Ai rodie len,

⁵ ta mundarde tranda ta sov llenen katar o Israel, ta ogolen rodie len katar o udar e foroko llik o Sebarim, ta dobisarde len kote kai o drom fuliel. Goleke o foro jasarda e zor ta daraile.

⁶ Ondaka o Josue ta e purane katar o Israel pharrade pe patave ta chudie chik pe po soro, ta bangile llik pe phuv e chikatea angla e arka e Devleki lligo ni peli e riat.

⁷ Ta o Josue phenela: ¡Tesko amendar Devla! ¿Soke cherdan te nakhel gava foro o pai katar o Jordan? ¿Cherdan le te dobin amen e amorreura te sai zatrin amen? ¡Mai sukar avilaia te achilama pe ogoia rig katar o Jordan!

⁸ ¡Tesko amendar Devla! ¿So sai te phenav akana kai dobisarde e llenen katar o Israel ta nasle katar pe dusmanura?

⁹ E kananeura ta sa e llene kai zivin ande phuv ka llanen le ta sa ka den pe amende ta ni ka achel amendar niso, ¿a so ka chere tu pala cho baro anav?

¹⁰ Ta o Del phenda leke: Uste Josue. ¿Soke bango gia llik pe phuv?

¹¹ E israelitura phagle o alav kai achilem lenchar. Lie ezgode kai me phendem te zatrin len sa. Ta i chorde ta kojade ta gurude len maskar pe ezgode.

¹² Goleke e israelitura ni ka dobin pe dusmanonen ta ka nasen angla lende. E israelitura morabi te aven dukhade. Te na zatrin isto akana so phendem tumenge te zatrin, ni ka avav ios tumenchar.

¹³ Uste ta chide e foro. Phen lenge te lacharenpe te aven thiara angla ma, soke me o Gazda ta o Del e Israeleko phenav: Tu Israel lian katar so saia te avel zatrime. Goleke lligo ni ka zatri le ta te chude le tutar, nasti ka mareto che dusmanonenchar.

¹⁴ Thiara te aven sa e viche, ta katar e vicha kai me ka esviriv ka aven sa e familie. Ta katar e familia kai me ka esviriv ka aven sa e murusa.

¹⁵ Ta o lleno kai ka aven lete e ezgode kai sea te zatrin len, ka phabaren le ta sa so si le, soke phagla o alav e Devleko ta cherda o bilachipe ando Israel.

O Akan si dukhado cheres leko bilachipe

¹⁶ Thiarinako o Josue ustilo but rano ta phenda te aven e llene prema lenge viche. Ta o Del esvirisarda e vicha e Judaeki.

¹⁷ Ondaka o Josue phenda te aven e familie katar e vicha e Judaeki. Ta katar e vicha e Judaeki ikharde e murusen katar e familia e Zeraeki. Ta lendar ikharde e familia katar o Zabdi.

¹⁸ Kana e murusa katar e familia e Zabdieki avile iek po iek, ikharde e Akane chavo katar o Karmi, unuko katar o Zabdi ta paraunuko katar o Zera, katar e vicha e Judaeki.

¹⁹ Ondaka o Josue phenda e Akaneke: Chavea murno, de liubao e Gazdake ta Del Israeleko. Phen mange so cherdan. ¡Na kojav!

²⁰ Ta o Akan vacharda e Josueeke: Istina cherdem o bilachipe angla o Gazda ta Del e Israeleko. Gia cherdem le:

²¹ Maskar e ezgode kai sea ando Jeriko, dikhlem iek gertachi but sukar cherdo ande Babilonia, dui stotine tolaria rupune ta iek kotor sunakuno kai phariavela mai but katar dopas e kila. Sa gala ezgode pele mange drago, liem len ta gurudem len ande mi chara ta thodem len telal ande phuv.

²² Ondaka o Josue bichalda llenen te llan ande chara katar o Akan, ta malade kote sa so saia gurudino e tolaria rupune telal.

²³ Ta inllarde sa angla o Josue ta e israelitura, ta thode len angla o Del.

²⁴ Mapalal inllarde ande bari umal katar o Akor e Akane, e tolaria rupune, o gertachi, o kotor sunakuno, leke chaven leke chorren, leke guruven, magarchen, bakren, leki chara ta sa so saia leko.

²⁵ Ta o Josue phenda leke: ¿Soke andan amenge gaia duk? Akana, te cherel o Del te perel pe tu e duk kai andan amenge. Samo o Josue phenda gale alava, sa e israelitura mundarde e barrenchar e Akane ta leke familia, mapalal phabarde len.

²⁶ Ta thode pe lete umpa barra kai si llik allive. Ta liape e Devletar e joli. Goleke gua than ikhardol e bari umal katar o Akor.