Josue 5 - Biblia ande chib Romani

O pero ando Gilgal

¹ Kana sa e charura amorreura kai sea pe ogoia rig katar o Jordan, ta i e charura kananeura kai sea pasa e mora, asunde sar o Del sukarda o pai katar o Jordan angla e israelitura, von but daraile.

² Ondaka o Del phenda e Josueeke: Cher chuke churia ostre ta pale cher e sirkunsision e israelenge.

³ Ondaka o Josue cherda e churia ta cherda e sirkunsision e murusenge katar o Israel po burdo o Aralot.

⁴ O Josue cherda lenge e sirkunsision soke sa e murusa kai sea boñikura kana likiste katar o Ejipto mulea po pusto.

⁵ A i akana makar sa gola kai likiste katar o Ejipto cherdea lenge e sirkunsision, gola kai biandile po drom po pusto, ni cherdea lenge e sirkunsision.

⁶ Soke e israelitura phirde po pusto saranda burs lligo ni mule sa e murusa kai sea boñikura kai likistea katar o Ejipto. Soke ni kandie e Devle, goleke o Del jala sovel kai ni ka mukel len te dikhen e phuv kai saia te del len. Phuv kai o thud ta o aullin nakhen sargo o pai.

⁷ Goleke o Josue cherda e sirkunsision e chavenge kai o Del thodaia po than katar gola murusa. Soke kana sea po drom ni cherde lenge e sirkunsision.

⁸ Ondaka kana cherde saurrenge e sirkunsision, achile ando pero lligo ni sastile.

⁹ Ta o Del phenda e Josueke: Allive ikandem tumendar o lallao katar o Ejipto. Goleke ikharde gua than Gilgal llik akana.

¹⁰ E israelitura logle ando Gilgal. Ta ando desustarto llive katar o chon, kana perela o kham, e israelitura cherde e slava katar e paskua ande bari umal katar o Jeriko.

¹¹ Ande gua llive jale marrno kai inai le levadura ta lliu peko. Ta thiarinako, mapalal katar e paskua, o foro jala katar e simicha e phuviaki.

¹² Sar kotar ni saia ios mana. Ta e israelitura nikada ios ni jale mana, soke gua burs jale katar e septelie kai del e phuv.

O Josue ta o gazda katar e boñikura e Devleke

¹³ Iek llive kana o Josue saia pase katar o Jeriko, dikhla iekhe llene kai saia iek jarni ande leko va. O Josue llelo lete ta puchla le: ¿Tu san iek amendar o san iek katar amare dusmanura?

¹⁴ Ta vou phenda: Iok, me sem o birovi katar e boñikura e Devleke. Ondaka o Josue bangilo ta leko chikat reslo pe phuv, blagosisarda, ta phenda leke: ¿So mange mo gazda te cherel cho sluga?

¹⁵ Ta o gazda katar e boñikura e Devleke phenda leke: Ikan che minie, soke o than kai san si santo. Ta o Josue ikanda pe minie.