Josue 4 - Biblia ande chib Romani

E desudui barra katar o Jordan

¹ Kana sa o foro nakhlo o Jordan, o Del phenda e Josueeke gia:

² Ikhar desuduie llenen katar o foro, iek katar suako vicha,

³ ta phen lenge te ikanen desudui barra maskar o Jordan katar o than kai e popura achile pe porrne. Te inllaren len ta te thoven len po than kai ka racharen gaia riat.

⁴ Ondaka o Josue ikharda e desuduie llenen kai esvirisarda maskar o foro katar o Israel, iek katar suako vicha.

⁵ Ta phenda lenge: Den po maskaral katar o Jordan angla e arka katar tumaro Del o Gazda, ta suako iek tumendar te thovel iek barr pe po dumo. Iek barr prema suako vicha katar o Israel, te sai aven desudui barra.

⁶ Von si te dikhen len, ta kana tumare chave ka puchen: ¿So si gala barra?

⁷ Ondaka tumen ka phenen lenge: Kana e arka katar o alav e Devleko nakhli o Jordan, o pai fuladilo pe dui kotora angla e arka. Gala barra si te denpe golli ostade e llene katar o Israel katar goia bari ezgoda.

⁸ Ondaka von cherde so phenda lenge o Josue. Lie desudui barra katar o Jordan, iek prema suako vicha katar o Israel, ta inllarde len ando pero ta thode len kote sar phenda lenge o Josue.

⁹ Ta i o Josue thoda aver desudui barra po dopas katar o Jordan, po than kai sea e porrne katar popura kai inllarena e arka katar o alav. Gala barra si kote llik akana.

¹⁰ E popura kai inllarena e arka achile po maskaral katar o Jordan kana e israelitura cherena sa so phenda o Del e Josueeke te phenel e foroke. Sa cherdilo prema sar phenda o Moises e Josueeke. Ta o foro sigarda te nakhel,

¹¹ mapalal kana sa sea pe ogoia rig katar o pai, ondaka nakhli e arka e Devleki ta e popura thodepe anglal katar o foro.

¹² Ta nakhle o pai e boñikura katar e vicha e Rubeneki ta e Gadeki, ta dopas e vicha katar o Manases. Nakhle e ezgodenchar marimake ta llana anglal katar e chave katar o Israel prema sar phenda lenge o Moises,

¹³ von sea preko saranda milie murusa, sa lacharde te marenpe. Ta nakhle ande bari umal katar o Jeriko angla o Del.

¹⁴ Gua llive o Del cherda te chudilpe sa o Israel katar o Josue, te den le liubao gia sar cherda le e Moisesea ande sa leko zivoto.

¹⁵ Ondaka o Del phenda e Josueeke:

¹⁶ Phen e poponenge kai inllaren e arka katar o alav, te liken katar o Jordan.

¹⁷ Ta o Josue phenda te liken katar o Jordan,

¹⁸ kana e popura kai inllarena e arka katar o alav e Devleko likiste katar o Jordan ta thode pe porrne pe phuv suki, o pai pale irisailo pe po than ta dia avrial katar e riga sargo omanglal.

¹⁹ E israelitura likiste katar o Jordan ando desengo llive katar o purvo chon. Ta logle ando Gilgal, pe rig kai likel o kham katar o Jeriko.

²⁰ Kote o Josue thoda e desudui barra kai anda katar o Jordan,

²¹ ta phenda e israelenge: Kana ka puchen tumen tumare chave ¿So si gala barra?,

²² phenen lenge sar o Israel nakhlo o pai katar o Jordan pe phuv suki,

²³ ta sar o Gazda tumaro Del sukarda e paia katar o Jordan kana tumen nakhlen le, isto gia sar sukarda e Mora e Loli kana amen nakhlam la.

²⁴ Gia ka llanen sa e phuvia kai o Gazda tumaro Del si zuralo, ta tumen ka blagosin le ostade.