Josue 3 - Biblia ande chib Romani

E israelitura nakhen o Jordan

¹ Thiarinako rano o Josue ta sa e israelitura likiste katar o Sitim, ta avile pasa o pai katar o Jordan ta logle kote mai anglal te nakhen pe ogoia rig.

² Kana nakhle trin llive, e gazda phirde sa o pero,

³ ta phende e foroke: Kana ka dikhen kai e popura e levitura inllaren e arka katar o alav e Gazdako tumaro Del, tumen ka usten ta ka llan pala la.

⁴ Gia ka llanen kai morabi te llan, soke niko tumendar ni nakhlo pe gava drom. Na thoven tumen pasa e arka, achen dur latar milia pole.

⁵ Ta o Josue phenda lenge: Suako lleno te chistolpe, soke thiara o Del ka cherel bare ezgode maskar tumende.

⁶ Ta o Josue phenda e poponenge: Len e arka katar o alav ta llan angla o foro. A von lie e arka katar o alav ta llele angla o foro.

⁷ Ondaka o Del phenda e Josueke: Katar gava llive angle ka cherav te gazdari ios mai but angla e akha katar sa o Israel, te sai llanen kai me sem tuia sar sema e Moisesea.

⁸ Phen e poponenge kai inllaren e arka katar o alav, kai kana ka den ando pai o Jordan, te achen pasa e chib e paieki.

⁹ Ondaka o Josue phenda e foroke katar o Israel: Aven te asunen so phenel o Gazda tumaro Del.

¹⁰ Pe gaia ezgoda ka pinllaren kai o Del o llundo si maskar tumende, vou ka cherel te nasen angla tumende e kananeura, e jeteura, e jeveura, e ferezeura, e gergeseura, e amorreura ta e jebuseura.

¹¹ E arka katar o alav, katar o Del katar sa e phuv, ka nakhel po maskaral katar o Jordan angla tumende.

¹² Goleke tumen ikharen desuduie murusen, iek katar suako vicha e Israeleki.

¹³ Kana e popura kai inllaren e arka katar o Del o Gazda, kai si o Gazda pe sa e phuv, ka thoven pe porrne ando pai, e paia ka putaon pe dui kotora. Ondaka o pai katar o Jordan kai avel upral ka achel sargo zido.

¹⁴ Ondaka e llene katar o foro likiste katar pe chare te nakhen o Jordan. Angla lende llana e popura kai inllarena e arka katar o alav.

¹⁵ Ando vreme kana chiden e septelie o pai katar o Jordan bariol, goleke e porrne katar e popura chingile ando pai kai si pasa e phuv.

¹⁶ E paia kai avena upral achile sargo zido dur katar o foro Adam kai si pasa o Saretan, ta e paia kai fuliena ande Mora e Londi sukile. Gia putailo o Jordan ta o foro nakhlo karing o Jeriko.

¹⁷ A e popura kai inllarena e arka katar o alav e Devleko, achile po maskaral katar o Jordan pe phuv suki lligo ni nakhlo sa o foro.