Josue 24 - Biblia ande chib Romani

O Josue llaltar

¹ O Josue chidia ando Sikem sa e viche katar o Israel. Ikharda te aven angla o Del e phure, e gazda, e krisaria ta e mai preche katar o foro e Israeleko,

² ta phenda e foroke: Gia phenel o Del e Israeleke: Tumare purane o Teraj ta leke chave o Abraam ta o Najor zivisarde omanglal pe ogoia rig katar o pai o Eufrates, ta blagosina avere delen.

³ Ta liem e Abraame katar ogoia rig katar o Eufrates te llal ande sa e phuv katar o Kanaan. Cherdem te bariol leko porodo. Diem le e Isaake,

⁴ ta e Isaake diem duie chaven, e Jakobe ta e Esaue. E Esaue diem e burdo katar o Seir. A o Jakob ta leke chave lleletar ando Ejipto.

⁵ Ondaka bichaldem e Moisese ta e Aarone ta ranisarde e Ejipto lligo ni ikandem tumen kotar.

⁶ Kana tumare dada likiste katar o Ejipto, e ejipsiura rodie len pe bordonenchar marimake ta e grastenchar llik e Mora e Loli.

⁷ Von ikharde man ta me thodem iek baro truniariko maskar tumen ta e ejipsiura, ta cherdem te perel e mora pe ejipsiura, ta e mora ucharda len. Tumen dikhlem so cherdem ando Ejipto.

⁸ Ta andem len kai e phuv katar e amorreura pe rig kai likel o kham katar o Jordan. Von mardepe tumenchar ta me cherdem tumen te dobin len ta te len lengi phuv.

⁹ Mapalal o Balak chavo katar o Sipor o charo katar e moabitura avilo te marelpe tumenchar. O Balak bichalda llenen te ikharen e Balaame chavo katar o Beor te sai proketil tumen.

¹⁰ Ta me ni muklem te proketil tumen o Balaam, ta sai le te blagosil tumen. Gia braduisardem tumen.

¹¹ Ondaka tumen nakhlen o pai katar o Jordan ta avilen ando Jeriko. E llene kai zivina ando Jeriko, e amorreura, e ferezeura, e kananeura, e jititura, e gergeseura, e jeveura ta e jebuseura, mardepe tumenchar, ta me cherdem tumen te dobin len.

¹² E duien charonen amorreura tumen ni dobisarden len e jarnienchar ta e llidenchar soke me cherdem te avel lenge iek bari dar angla tumen, goleke nasle omanglal te aven tumen.

¹³ Ta diem tumen phuvia kai tumen ni radisarden ta forura kai tumen ni vazdien. Akana tumen zivin ande len ta jan drakha ta maslinke kai tumen ni bariarden. Ta i o Josue ios phenda:

¹⁴ Goleke den liubao e Devle ta radisaren leke chachimaia ta orta. Chuden tumendar e delen kai tumare dada radisarde lenge pasa o Eufrates ta ando Ejipto ta blagosin samo e Devle.

¹⁵ A te si kai ni kamen te blagosin e Devle, phenen le tumen akana, kake mangen te radin. E delenge kai tumare dada radisarde kana sea pe ogoia rig katar o len, o te radin e delenge katar e amorreura. A me ta murni familia ka radi e Devleke.

¹⁶ Ondaka sa o foro phenda: ¡Te na del Gazda o Del te radi amen avere delen!

¹⁷ O Gazda ikanda amen ta amare daden katar o Ejipto kai sama sluge. Vou cherda bare ezgode angla amare akha ta arakhla amen po drom kana nakhlam maskar but forura.

¹⁸ Vou tradia angla amen sa e foronen kai sea po amaro drom, ta e amorreonen kai zivina kate. Goleke amen ka radi e Gazdake soke vou si amaro Del.

¹⁹ A o Josue phenda lenge: Tumen nasti radin e Devleke soke vou si santo kai inai leke drago te blagosin avere delen. Vou ni ka terpil tumare bilache ezgode.

²⁰ Te muken le ta blagosin avere delen, o Gazda ka cherel tumenge bilachipe ta ka zatril tumen, i te cherela tumenge gachin lachipe.

²¹ Ta o foro phenda: Ni ka avel pe amende gia. Amen ka radi e Devleke.

²² Ondaka o Josue phenda: Isto tumen phenen le kai ka radin samo e Devleke. Ta o foro phenda: Ka radi samo e Devleke.

²³ Ta o Josue phenda lenge: Chuden e delen kai si maskar tumen ta irin tumen sa tumare liea e Gazdake o Del e Israeleko.

²⁴ Ta o foro phenda: Amen ka radi samo e Gazdake amaro Del ta ka chera sa so ka phenel amenge.

²⁵ Isto gua llive ando Sikem o Josue achilo po alav e foroia ta dia len zakonura,

²⁶ ta pisisarda len ando lil katar o zakono e Devleko. Mapalal lia iek bari pechina ta thoda la telal katar e ensina kai si pasa o cher e Devleko,

²⁷ ta phenda e foroke: Gaia pechina si o alav, soke voi asunda sa so phenda amenge o Del. Voi si o alav tumenge te na kojaven e Devle.

²⁸ Mapalal o Josue bichalda suakone llene te irilpe kai pi phuv.

O meripe katar o Josue

²⁹ Pala nesave llivesa mapalal mulo o Josue chavo katar o Nun, sluga e Devleko, kana sea leke stotina ta des burs.

³⁰ Ta prajosarde le ande pi phuv ando Timnat Seraj kai si pe burdura katar o Efrain ando norte katar o burdo o Gaas.

³¹ E israelitura radisarde e Devleke ando vreme kana zivila o Josue. Ta sa o vreme kai zivisarde e purane kai llanena so cherdaia o Del e israelitonenge.

E israelitura prajosaren e kokala katar o Jose

³² E israelitura prajosarde e kokala katar o Jose kai andea katar o Ejipto ando vos kai o Jakob chindaia ande stotina tolaria rupune katar e chave e Jamoreke o Dad katar o Sikem, kai mapalal saia e phuv katar e chave e Joseeke.

O meripe katar o Elazar

³³ Ta i mulo o Elazar chavo katar o Aaron ta prajosarde le po burdo katar o Finees leko chavo, kai die le ando Efrain.