Josue 21 - Biblia ande chib Romani

E forura katar e levitura

¹ E gazda katar e levitura llele ando Silo te den orba e popoia o Eleazar e Josuea ta e gazdenchar katar e familie katar e viche e Israeleke,

² ta phende lenge: O Del phenda e Moiseke te den amen forura te sai zivi, ta te den amen thana pala amare zivirinie.

³ Ondaka e israelitura die nesave katar lenge forura ta thana e zivirinienge, sar phendaia le o Del.

⁴ E purve sea e familiake katar o Keat ta e chavenge katar o popo o Aaron kai sea katar e vicha e Levieki. Dien len desutrin forura katar e vicha e Judaeki, e Simeoneki ta e Benjamineki.

⁵ Ogolen katar e keatitura die len des forura kai sea katar e vicha e Efraineki, e Daneki ta katar o dopas vicha e Manaseki.

⁶ Mapalal e familie katar o Gerson die len desutrin forura kai sea katar e vicha e Isakareki, e Asereki, e Neftalieki ta katar o dopas vicha e Manaseki kai si ando Basan.

⁷ E familie katar o Merari die len desudui forura kai sea katar e vicha e Rubeneki, e Gadeki ta e Zabulonoki.

⁸ E israelitura cheldepe te sai fulaven e vichake katar o Levi e forura ta e thana e zivirinienge sar phendaia le o Del e Moiseke.

⁹ Die e levitonen forura katar e vicha e Judaeki ta e Simeoneki.

¹⁰ Ta kana cheldepe o purvo drom, achile e levitura katar e familia e Keateki kai sea chave katar o Aaron.

¹¹ Pe burdura katar o Juda die len o Jebron ta e thana e zivirinienge truial.

¹² A e vostanura ta e forichura katar o Jebron die e Kalebe o chavo katar o Jefune.

¹³ O Jebron saia iek foro te sai gurudon e llene kai mundarde iekhe llene. Ta i die e levitonen gala forura, o Libna,

¹⁴ o Jatir, o Estemoa,

¹⁵ o Jolon, o Debir,

¹⁶ o Ain, o Juta ta o Bet Semes. Sa gala forura sea len thana e zivirinienge.

¹⁷ Katar e vicha e Benjamineki die len o Gabaon, o Geba,

¹⁸ o Anatot ta o Almon, star forura ta lenge thana e zivirinienge.

¹⁹ Sa e forura ta lenge thana e zivirinienge kai die e chaven katar o Aaron sea desutrin.

²⁰ Avere familie katar e chave katar o Keat fulade len forura katar e vicha e Efraineki.

²¹ Pe burdura katar o Efrain die len o Sikem te sai nasel o lleno kai mundarel, ta i die len o Gezer.

²² O Kibsaim ta o Bet Joron e forichura truial ta e thana e zivirinienge.

²³ Katar e vicha e Daneki o Elteke, o Gibeton e forichura truial ta e thana e zivirinienge,

²⁴ o Aialon ta o Gat Rimon, star forura ta e forichura truial.

²⁵ Katar o dopas vicha e Manaseki dui forura o Taanak ta o Gat Rimon ta e thana e zivirinienge.

²⁶ Sa e forura katar e keatitura sea des ta e thana e zivirinienge.

²⁷ E levitonenge katar e familia e Gersoneki kai sea katar o dopas vicha e Manaseki die dui forura ta e thana e zivirinienge, o Golan kai saia ando Basan te sai avel iek foro te gurudon ta o Beestera.

²⁸ Katar e vicha e Isakareki die len o Kision, o Daberat,

²⁹ o Jarmut ta o En Ganim, star forura ta e thana e zivirinienge.

³⁰ Katar e vicha e Asereki die len o Misael, o Abdon,

³¹ o Jelkat ta o Rejob. Star forura ta e thana e zivirinienge.

³² Katar e vicha e Neftalieki die trin forura ta e thana e zivirinienge, o Kedes kai saia ande Galilea te sai aven forura te gurudon. O Jamot Dor ta o Kartan,

³³ Sa e forura ta lenge thana e zivirinienge kai die e familiake katar o Gerson sea desutrin.

³⁴ E levitonen katar e familia e Merarieki die katar e vicha e Zabulonoki star forura ta e thana e zivirinienge, o Jokneam, o Karta,

³⁵ o Dimna ta o Najalal. Star forura ta e thana e zivirinienge.

³⁶ Katar e vicha e Rubeneki o Beser, o Jaas,

³⁷ o Kademot ta o Mefaat. Star forura ta e thana e zivirinienge.

³⁸ Katar e vicha e Gadeki, o Ramot katar o Galaad te sai aven forura te gurudon. O Majanaim,

³⁹ o Jesbon ta o Jazer. Star forura ta e thana e zivirinienge.

⁴⁰ Desudui forura die e familiake katar o Merari kai sea e familie katar e vicha e Levieki kai achena te den len forura.

⁴¹ E forura ta e thana e zivirinienge katar e levitura ande phuv katar o Israel sea saranda ta ojto,

⁴² suako foro saia dur katar e aver forura, ta suakone foro sea len thana e zivirinienge.

O Israel lel sa e phuv

⁴³ Gia o Del dia e israelen sa e phuv kai omanglal diaia po alav e puranenge kai ka del la lenge. Ta e israelitura zivisarde ande la.

⁴⁴ O Del dia len pas ande sa e phuv. Ta lenge dusmanura nasti dobisarde len soke o Del cherela te dobil len o Israel.

⁴⁵ Sa so phendaia o Del kai saia te cherel e israelitonenge charda le.