Josue 2 - Biblia ande chib Romani

O Josue bichalel llenen te dikhen e phuv

¹ Katar o Sitim o Josue chavo katar o Nun, bichalda duie llenen te dikhen po chorial e phuv, ta phenda lenge: Llan te dikhen e phuv ta o foro katar o Jeriko. Von llele ta avile ando cher katar iek kurvichka katar o Jeriko kai ikhardola Rajab, kote nakhle e riat.

² A iek lleno phenda gia e charoke katar o Jeriko: Nesave israelitura avile gaia riat po chorial te dikhen e phuv.

³ Ondaka o charo katar o Jeriko bichalda te phenen gia e Rajabake: Ikan avri e llenen kai avile tute, soke von avile te dikhen e phuv po chorial.

⁴ A voi guruda len ta phenda: De istina si kai nesave llene avile mande, a me ni llanav katar avena.

⁵ Kana peli e riat lleletar, soke phandena o udar e foroko ta ni llanav kai llele. Te roden len isto akana sai resen len.

⁶ A voi saia kai guruda len upral katar o cher maskar e umpe lino kai sea kote.

⁷ Ta e llene llele te roden len pe droma katar o Jordan llik kai e thana kai e llene nakhen o pai. Kana von likiste, phangle o udar katar o foro.

⁸ Ondaka mai anglal te soven e llene kai avilea te dikhen e phuv po chorial, e Rajab likisti upral po cher ta phenda lenge:

⁹ Me llanav kai o Del dia tumen gaia phuv, soke cherda amen te dara but tumendar. Sa e llene e phuviake meren daratar tumendar.

¹⁰ Amen llana kai kana tumen likisten katar o Ejipto, o Del sukarda o pai katar e Mora e Loli te sai tumen nakhen. Ta llana so cherden tumen e duie charonenge amorreura kai sea pe ogoia rig katar o Jordan, o Sijon ta o Og, kai tumen zatrisarden len.

¹¹ Ta kana amen asundam gaia ezgoda darailam but, gachin darailam kai niko ni tromala te marelpe tumenchar, soke o Gazda tumaro Del, si isto o Del incha upre ando miloso ta kate tele pe phuv.

¹² Goleke mangav tumendar te jan sovel ando anav e Devleko kai ka aven postene me familiaia gia sar sema me tumenchar. Den man te dikhav iek ezgoda te pachav kai ka cheren le gia,

¹³ ta kai ni ka mundaren me daden, me phlalen, me phiorren ta sa so si lengo, ta kai ka braduin amen katar o meripe.

¹⁴ Ta von phende lake: Te merena tumen, amen ka pochina le amare zivotoia. Samo te na phene nikake gaia ezgoda. Kana o Del ka del amen gaia phuv, ka ava postene tuia.

¹⁵ Ondaka voi iekhe solea katar e penllerava cherda te fulien katar o zido e foroko, soke lako cher saia upral po zido.

¹⁶ Ta phenda lenge: Llan pe burdura te na malaven tumen. Achen kote gurudine trin llive lligo ni ka irinpe ando foro gola kai roden tumen. Mapalal llantar pe tumaro drom.

¹⁷ A von phende lake: Amen ka ava chache ta ka chera so jalam chuke sovel.

¹⁸ Kana amen ka da ande phuv, phande gava solorro lolo pe penllerava kai cherdan te fulia. Chide ande cho cher che da, che dade, che phlalen ta sa e familia che dadeki.

¹⁹ A te likela fiko katar cho cher amen ni ka ava dosale te merela. A te si kai fiko ka avel tuia ande cho cher ta merela, amen ka ava dosale.

²⁰ A te phenea fikake katar gaia ezgoda, amen ni ka ava dosale katar e sovel kai jalam.

²¹ Ta voi phenda: Ea, cheren le gia sar phenden. Mapalal e Rajab phenda lenge te llantar, ta phangla iek solorro lolo pe penllerava.

²² E dui llene lleletar pe burdura ta gurudile kote trin llive lligo ni irisaile ando Jeriko e boñikura kai rodena len, soke ni malade len po drom.

²³ Ondaka e dui llene fuliste katar e burdura, nakhle o pai ta irisaile kai o Josue chavo katar o Nun. Ta phende leke sa so nakhlea.

²⁴ Ta i phende e Josueeke: O Del dia ande amare va sa gaia phuv. Sa e llene kai zivin ande gaia phuv meren daratar amendar.