Josue 19 - Biblia ande chib Romani

E phuv katar e vicha e Simeoneki

¹ E duito phuv dialen e vichake katar o Simeon prema lenge familie. Ta gaia phuv saia andre katar e phuv e Judaeki,

² ta sea e forura o Berseba, o Seba, o Molada,

³ o Jasar Sual, o Bala, o Esem,

⁴ o Eltolad, o Betul, o Jorma,

⁵ o Siklag, o Bet Markabot, o Jasar Susa,

⁶ o Bet Lebaot ta o Sarujen. Sa sea desutrin forura ta lenge forichura.

⁷ Ta i die len o Ain, o Rimon, o Eter ta o Asan. Star forura bare ta lenge forichura,

⁸ ta sa e forichura kai sea llik o Baalat Beer kai si o Ramat ando Negeb. Gala si e phuvia kai dielen e familiake katar o Simeon.

⁹ E phuv katar e vicha e Simeoneki saia andre katar e phuv e Judaeki.

E phuv katar e vicha e Zabulonoki

¹⁰ E trito phuv dielen e vichake katar o Zabulon prema lenge familie. Lengi phuv avela llik o Sarid.

¹¹ Lengi phuv resel llik o Marala ta Dabeset pe rig kai perel o kham, pasa o paiorro kai si angla o Jokneam.

¹² Katar o Sarid resela llik o Kislot Tabor. Kotar nakhela ando Daberat ta likela ando Jafia.

¹³ Kotar nakhela ando Gat Jefer ta Ita Kazin pe rig oriente ta likel ando Rimon pasa o Nea.

¹⁴ Ando norte nakhela ando Janaton ta likel ande bari umal katar o Jefte El.

¹⁵ Ande gaia phuv sea desudui forura ta forichura pase, o Katat, o Naalal, o Simron, o Idala ta o Belen. Desudui forura ta lenge forichura.

¹⁶ Gaia si e phuv kai dielen e vichake katar o Zabulon, e forura ta lenge forichura.

E phuv katar e vicha e Isakareki

¹⁷ E starto phuv dielen e familiake katar e vicha e Isakareki.

¹⁸ Lengi phuv saia o Jezreel, o Kesulot, o Sunem,

¹⁹ o Jafaraim, o Sion, o Anajarat,

²⁰ o Rabit, o Kision, o Ebes,

²¹ o Remet, o En Ganim, o En Jada ta o Bet Pases.

²² E phuv resela llik o Tabor, o Sajasima ta o Bet Semes pasa o Jordan. Sa sea desusov forura ta lenge forichura.

²³ Gaia saia e phuv kai die e familiake katar e vicha e Isakareki, e forura ta lenge forichura.

E phuv katar e vicha e Asereki

²⁴ E panchto phuv dialen e vichake katar o Aser prema lenge familie.

²⁵ Lengi phuv saia katar o Jelkat, o Jali, o Beten, o Aksaf,

²⁶ o Alamelek, o Amad ta o Miseal llik o burdo o Karmelo ta o Sijor Libnat pe rig kai perel o kham.

²⁷ Pe rig kai likel i kham e phuv saia llik o Bet Dagon pasa e phuv katar o Zabulon e bari umal katar o Jefte El, o Bet Emek, o Neiel llik o Kabul,

²⁸ Ta resel ando Jebron, o Rejob o Jamon ta o Kana llik o Sidon.

²⁹ Kotar llik o Rama ta o baro foro katar o Tiro, nakhel ando Josa ta likel pe mora ande phuv katar o Akzib.

³⁰ Ta i resel ando Uma, o Afek ta o Rejob. Vis ta dui forura ta lenge forichura.

³¹ Gaia si e phuv kai dilen e familiake katar e vicha e Asereki.

E phuv katar e vicha e Neftalieki

³² E souto phuv dielen e familiake katar e vicha e Neftalieki prema lenge familie.

³³ Lengi phuv saia katar o Jelef, o Elon Saananim, o Adami Nekeb ta o Jabneel llik o Lakum pasa o Jordan.

³⁴ Pe rig kai perel o kham e phuv saia katar o Aznot Tabor ta nakhela ando o Jukok llik o Zabulon ando sur ta pe rig kai perel o kham pasa e phuv katar e vicha e Asereki. Pe rig kai likel o kham e phuv katar e vicha e Neftalieki resela llik o Jordan.

³⁵ E forura zidome kai die len sea o Sidim, o Ser, o Jamat, o Rakat, o Kineret,

³⁶ o Adama, o Rama, o Jazor,

³⁷ o Kedes, o Edrei, o En Jasor,

³⁸ o Iron, o Migdal El, o Jorem, Bet Anat ta o Bet Semes. Sa sea desunia forura ta lenge forichura.

³⁹ Gaia saia e phuv, e forura ta e forichura kai dielen e vichake katar o Neftali.

E phuv katar e vicha e Daneki

⁴⁰ E eftato phuv dielen e familiake katar e vicha e Daneki prema lenge familie.

⁴¹ Lengi phuv saia o Sora, o Estaol, o Ir Semes,

⁴² o Saalbim, o Aialon, o Jetla,

⁴³ o Elon, o Timnat, o Ekron,

⁴⁴ o Elteke, o Gibeton, o Baalat,

⁴⁵ o Jeud, o Bene Berak, o Gat Rimon,

⁴⁶ o Mejarkon ta o Rakon ta sa e phuv kai si angla o Jope.

⁴⁷ Ta soke gaia phuv ni resela lenge, e llene katar e vicha e Daneki die pe foro katar o Lesem ta mundarde saurren kai zivina kote ta lie e foro. Ta achile te zivin ando foro ta ikharde e foro Dan kai si o anav katar lengo dad.

⁴⁸ Gaia si e phuv e forura ta e forichura kai dielen e vichake katar o Dan.

E phuv katar o Josue

⁴⁹ Kana e israelitura gotovisarde te fulaven e phuv suakone vichake, die kotor katar e phuv e Josueke chavo katar o Nun maskar lende,

⁵⁰ prema o alav e Devleko, die le e foro kai vou mangla, o Timnat Sera po burdo katar o Efrain. Vazdia pale o foro ta zivisarde ande le.

⁵¹ Gala si e phuvia kai o popo o Eleazar, o Josue ta e gazda katar o foro fulade angla o Del e vichenge katar o Israel, po udar katar e chara te chidiniaon kai vazdie ando Silo. Gia gotovisarde te fulaven e phuv.