Josue 18 - Biblia ande chib Romani

E phuvia katar aver viche

¹ Mapalal kana lie sa e phuv, e israelitura chidinaile ando Silo ta vazdie kote iek chara te sai chidiniaon ande la,

² makar achena ios efta viche kai ni diea len phuv.

³ Ondaka o Josue phenda e israelitonenge: ¿So aduricharen te len e phuv kai dia tumen o Gazda, o Del tumare puranengo?

⁴ Ikharen trin llenen katar suako vicha te sai bichalav len te dikhen e phuv ta te llana sar ka fulada lengi phuv.

⁵ Gala llene morabi te fulaven e phuv ande efta kotora. E phuv e Judaeki morabi te achel ando sur ta e phuv katar e chave e Joseeke ando norte.

⁶ Mapalal kana ka fulaven e phuv ka aven mande ta ka phenen mange sar si e phuv te sai fulavav la tumenge angla o Gazda amaro Del.

⁷ E vichake katar o Levi ni ka da len phuv, soke lengo si o rado e poponengo katar o Del. E vichake katar o Gad o Ruben ta o dopas vicha katar o Manases si len phuv pe ogoia rig katar o Jordan, kai dia len o Moises, sluga e Devleko.

⁸ O Josue phenda e llenenge kai lachardepe te dikhen e phuv: Llan pe sa e phuv te fulaven la pe kotora ta kana ka gotovin, irin tumen mande te chelav man e phuv tumenge.

⁹ Ondaka e llene llele pe sa e phuv ta fulade e forura ande efta kotora ta pisisarde sa so cherde. Mapalal irisaile ando pero katar o Silo kote kai saia o Josue.

¹⁰ Ondaka o Josue cheldape angla o Del ando Silo te sai fulavel e phuv maskar e israelitura.

E phuv katar e vicha e Benjamineki

¹¹ Kana cheldepe te sai fulaven e phuv, e familie katar e vicha e Benjamineki lie phuvia ande phuv katar o Juda ta katar e chave e Joseeke.

¹² Ando norte lengi phuv saia katar o Jordan pasa o Jordan, nakhela pasa o burdo pe rig kai perel o kham ta likel po pusto katar o Bet Aven.

¹³ Kotar e phuv si katar o Luz kai si o Bet El, ando sur llik o Atarot Adar po burdo kai si ando sur katar o Bet Joron telal.

¹⁴ Mapalal bangarel kai e mora pe rig o sur katar o burdo kai si angla o Bet Joron llik o Kiriat Baal kai ikharen le Kiriat Jearim kai si katar e vicha e Judaeki. Gaia si e phuv pe rig kai perel o kham.

¹⁵ Ando sur e phuv saia pasa o Kiriat Jearim pe rig oeste kai o paiorro katar o Neftoaj,

¹⁶ ta llal tele pe rig mai dur katar o burdo kai si angla e bari umal katar o Ben Inom, ando norte katar e bari umal katar o Refaim. Mapalal llala tele ande bari umal katar o Inom ta nakhela ando sur katar o drom kai llal pasa o Jebus ta kotar llik o Rogel.

¹⁷ Mapalal bangarel po norte ta likel ando En Semes. Kotar llik o Gelilot kai si angla o drom kai llal upre katar o Adumin ta fuliel kai e pechina katar o Boan chavo katar o Ruben,

¹⁸ ta nakhel pasa e rig kai si angla o Araba ta fuliel ando Araba.

¹⁹ Ando norte nakhel pasa o Bet Jogla llik e Mora e Londi kote kai aven e paia katar o Jordan. Llik kote resela e phuv ando sur.

²⁰ Pe rig kai likel o kham e phuv resela llik o Jordan. Gala si e phuvia kai die e familiake katar e vicha e Benjamineki.

²¹ E forura kai die e familiake katar e vicha e Benjamineki sea o Jeriko, o Bet Jogla, o Emek Kesis,

²² o Bet Araba, o Semaraim, o Betel,

²³ o Avim, o Para, o Ofra,

²⁴ o Kefar Aamoni, o Ofni ta o Geba. Sa sea desudui forura ta lenge forichura.

²⁵ O Gabaon, o Rama, o Beerot,

²⁶ o Mizpa, o Kafira, o Moza,

²⁷ o Rekem, o Irpeel, o Tarala,

²⁸ o Zela, o Elef, o Jebus, kai si o Jerusalem, o Gabaa ta o Kiriat. Sa sea desustar forura ta lenge forichura. Gaia si e phuv katar e chave e Benjamineke prema lenge familie.