Josue 17 - Biblia ande chib Romani

E phuv katar e vicha e Manaseki

¹ Gaia si e phuv katar o Manases o chavo mai purano katar o Jose. E Makirake kai saia o chavo mai purano katar o Manases ta o dad katar o Galaad die le o Galaad ta o Basan pe rig kai likel o kham katar o Jordan.

² Ta fulade e phuv maskar aver chave katar e vicha e Manaseki prema e familie. Maskar o Abiezer, o Jelek, o Asriel, o Sikem, o Jefer ta o Semida kai sea e panch chave katar o Manases ta unukura katar o Jose.

³ A o Selofjad kai saia chavo katar o Jefer ta unuko katar o Galaad o chavo katar o Makir ta unuko katar o Manases, ni sea le chave samo panch chorra, e Majla, e Noa, e Jogla, e Milka ta e Tirsa.

⁴ Gala chorra avile te dikhen e popo o Eleazar ta e Josue chavo katar o Nun ta e mai preche llenen, te phenen lenge: O Del phenda e Moiseke te den amen phuvia maskar amare phlal. Ta vou dia len phuv maskar lenge dadeko phlal, sar phendaia le o Del.

⁵ Ta e vichake katar o Manases fulade des kotora katar e phuv ta e phuvia katar o Galaad ta o Basan kai si pe rig kai likel o kham katar o Jordan,

⁶ soke e chorrake katar o Manases die len phuv sargo e murusen. E phuv katar o Galaad fuladelen avere chaven katar o Manases.

⁷ E phuv katar e vicha e Manaseki saia katar o Aser llik o Mikmetat kai si ando sur katar o Sikem ta llala ando sur llik o bunari katar o Tapuaj.

⁸ E phuv katar o Tapuaj saia katar o Manases, ta o foro o Tapuaj saia katar e vicha e Efraineki.

⁹ Ando sur e phuv avela llik o paiorro katar o Kana. Goleke gala dui forura katar o Efrain sea maskar e forura katar o Manases. E phuv e Manaseki si ando norte katar isto gua paiorro ta likel ande mora.

¹⁰ E phuv e Efraineki saia ando sur katar o paiorro ta o Manases ando norte pasa e mora ta e phuv e Aseraki ando norte ta e Isakareki ando este.

¹¹ E vicha e Manaseki sea la forura ta forichura ande phuv katar o Isakar ta o Aser, o Bet Sean, o Ibleam, o Dor, o Endor, o Taanak, o Megido ta e trin phuvia.

¹² E chave katar o Manases nasti tradie e llenen katar gola forura, ta o kananeo mardepe te sai achen kote.

¹³ Mapalal kana e israelitura sea mai zurale mangle katar e kananeura te pochinen lenge love ta ni tradie len kotar.

E chave katar o Jose len e vostanura

¹⁴ E chave katar o Jose phende e Josueke: ¿Soke dian amen samo iek phuv kana amen sam but ta o Del blagosil amen?

¹⁵ Ta o Josue phenda lenge: Te si kai tumen sen but ta ni resen ande burdura katar o Efrain, llan ande vostanura katar e ferezeura ta e refaitura ta len len, soke o burdo katar o Efrain si minono tumenge.

¹⁶ Ta e chave katar o Jose phende: Ni resel amenge gava burdo. Ta sa e kananeura kai zivin ande bari umal si len bordona sastrune, ta i golen kai zivin ando Bet Sean ta e forichura pase, ta gola kai zivin ande bari umal katar o Jezreel.

¹⁷ Ondaka o Josue phenda e chavenge katar o Jose, o Efrain ta o Manases: Tumen sen but ta zurale, goleke ni ka len samo iek kotor katar e phuv,

¹⁸ gava burdo uchardo ande vostanura ka avel tumaro ta ka radi ande le. Soke ka traden kotar e kananeonen i te avena zurale ta i te avena len bordona sastrune.