Josue 14 - Biblia ande chib Romani

O Josue fulavel e phuv ando Kanaan

¹ Gala si e phuvia katar o Kanaan kai o popo Eleazar, o Josue chavo katar o Nun ta e gazda katar e familie katar e viche israelitura die e israelitonenge.

² Ta cheldepe te sai fulaven e phuv maskar e inia ta dopas viche, sar phendaia le o Del e Moiseke te cherel le.

³ Omanglal o Moises fuladaia phuvien pe ogoia rig katar o Jordan e vichenge katar o Ruben, o Gad ta e dopase vichake katar o Manases. E vichake katar o Levi ni fulada lenge phuvien.

⁴ E chave katar o Jose sea dui viche, e Manaseki ta e Efraineki, a e levitonenge ni fulada ni iek phuv, samo e forura te sai zivin, ta vostanura te bariaren guruven ta bakren.

⁵ E israelitura fulade e phuv isto gia sar phendaia le o Del e Moiseke.

E phuv katar o Kaleb

⁶ E chave katar o Juda llele ando Gilgal te den orba e Josuea. Ta o Kaleb o kenezita chavo katar o Jefune phenda e Josueke: De tut golli so phenda o Del tutar ta mandar e Moiseke ando Kades Barnea.

⁷ Mange sea saranda burs kana o Moises bichalda man katar o Kades barnea te dikhav e phuv, ta kana irisailem diem orba chachimaia.

⁸ Gola kai llele manchar cherde te daral o foro, a me achilem orta angla mo Del ta Gazda.

⁹ Ondaka o Moises jala sovel gia: E phuv kai thodan cho porrno ka avel ostade chiri ta che chaveki, soke sana orta angla mo Del ta Gazda.

¹⁰ Nakhle saranda ta panch burs sar kana o Del phenda gua alav e Moiseke kana e israelitura phirena po pusto. Prema leko alav akana si mange ojtovardes ta panch burs ta o Del arakhla mo zivoto,

¹¹ ta sem zuralo sargo kana o Moises bichalda man te dikhav e phuv ta sai marav man sargo sema omanglal.

¹² Goleke akana mangav tutar te de man o burdo kai o Del phendaia kai ka del man, soke tu asundan gua llive kai e chave katar o Anak zivin kote ta kai si bare forura kai si len zidura truial lendar. Te pomozil man o Del te tradav len kotar, sar phendaia le.

¹³ Ondaka o Josue blagosisarda e Kalebe ta dia le o Jebron te avel leki phuv ta katar leke chave.

¹⁴ Gia o Jebron achilo e Kalebeke ta leke chaveke llik akana, soke o Kaleb saia orta angla o Gazda, o Del e Israeleko.

¹⁵ O purano anav katar o Jebron saia Kiriat Arba, soke Arba saia iek chavo pinllardo katar o baro lleno o Anak. Mapalal ni saia ios maripe ande phuv.