Josue 13 - Biblia ande chib Romani

E phuvia kai achena te len

¹ Kana o Josue saia but phuro, o Del phenda leke: Tu san phuro ta achen but phuvia kai si te len.

² Achel sa e phuv katar e filisteura ta e gesureura,

³ kai si katar o pai o Sijor ando este katar o Ejipto, llik ando Ekron kai phenen kai si e phuv katar e kananeura. Kote si panch gazda filisteura, katar o Gaza, katar o Asdod, katar o Askalon, katar o Gat, katar o Ekron, ta e aveura.

⁴ Ando sur ta sa e phuv katar e kananeura. E forura katar e sidoniura llik o Afek pasa e phuv katar e amorreura.

⁵ E phuv katar e giblitura ta sa o Libano pe rig kai likel o kham, katar o Baal Gad telal katar o burdo o Jermon llik o udar katar o Jamat.

⁶ Me ka chudav e sidionen angla e israelitura ta sa e llenen kai zivin pe burdura, katar o Libano llik o Misrefot Maim. Tu ka fulave e phuv maskar e israelitura te avel lengi phuv sar phendem le chuke.

⁷ Fulave akana gaia phuv e iniaeke viche ta e dopase vicha katar o Manases.

E phuvia katar o Manases o Ruben ta o Gad

⁸ E viche katar o Ruben, o Gad ta o dopas vicha katar o Manases lie lengi phuv kana o Moises dia len gala phuvia pe ogoia rig katar o Jordan,

⁹ katar o Aroer pasa o pai o Arnon ta o foro kai si po maskaral katar e bari umal, ta sa e phuv katar o Medeba llik o Dibon,

¹⁰ sa e forura katar o Sijon, o charo amorreo katar o Jesbon llik e phuv katar e amonitura.

¹¹ O Galaad ta e phuvia katar e gesureura e maakateura, sa o burdo o Jermon ta sa e phuv katar o Basan llik o Salka,

¹² e phuvia katar o charo o Og katar o Basan kai gazdarila ando Astarot ta o Edrei, ta kai saia o refaita kai achela, soke o Moises dobisardaia e refaitonen ta tradiaia len katar e phuv.

¹³ E llenen katar o Gesur ta o Maaka ni tradie len kotar ta sar kotar zivin maskar e israelitura llik akana.

¹⁴ E vichake katar o Levi o Moises ni dia len phuv, soke e kurbanura kai den e Devleke si so dia len, sar phendaia le o Del.

¹⁵ O Moises fulada e phuv e vichake katar o Ruben prema lengi familie.

¹⁶ Ta lengi phuv si katar o Aroer kai si pasa o pai o Arnon ta o foro kai si po maskaral katar e bari umal, ta sa o Medeba,

¹⁷ o Jesbon, sa e forura kai si ande bari umal, o Dibon, Bamot Baal, Bet Baal Meon,

¹⁸ O Jasa, Kademot, Mefaat,

¹⁹ Kiriataim, Sibma, Seret Sajar kai si po burdo katar e bari umal,

²⁰ Bet Peor, Bet Jesimot ta sa telal katar o burdo o Pisga,

²¹ sa e forura katar e bari umal ta sa e charoina katar o Sijon, o charo amorreo katar o Jesbon. O Moises dobisardaia e Sijone ta e gazda katar o Madian kai sea leke sluge, o Evi, o Rekem, o Sur, o Jur ta o Reba.

²² Ta i e israelitura mundarde e Balaame o lleno kai apogodila kai saia chavo katar o Beor, ta bute averen.

²³ Sa e phuv katar e vicha e Rubeneki saia fuladi prema e familie ta lenge sea sa e forura bare ta minone llik o Jordan.

²⁴ Ta e vichake katar o Gad o Moises fulada phuvien prema lenge familie,

²⁵ fulada lenge o Jaser ta sa e forura katar o Galaad, o dopas katar e phuv e amonitonengi llik o Aroer kai si angla o Raba,

²⁶ ta e phuv kai si maskar o Jesbon, Ramat Mispe ta o Majanaim pasa o Debir.

²⁷ Ande bari umal fulada lenge o Bet Aram, o Bet Nimra, o Sukot ta o Safon, o foro kai achela katar e charoina e Sijoneki, o charo katar o Jesbon. Leki phuv saia pe rig kai likel o kham katar o Jordan llik o sur katar o Kineret.

²⁸ Gala sea e forura bare ta minone kai o Moises fulada e vichake katar o Gad prema lenge familie.

²⁹ Ta i fulada e phuv e dopase vichake katar o Manases prema lenge familie.

³⁰ Fulada lenge sa e phuv kai omanglal saia katar o Og, charo katar o Basan, katar o Majanaim ta sovardes forura kai si katar o Jair,

³¹ o dopas katar o Galaad ta e forura o Astarot ta o Edrei. Sa gaia phuv saia e chavenge katar o Makir o chavo katar o Manases prema lenge familie.

³² Gala si e phuvia kai o Moises fulada lenge ande bari umal katar o Moab pe rig kai likel o kham angla o Jeriko.

³³ A e vichake katar o Levi o Moises ni fulada phuvien ande bari umal katar o Moab pe rig oriente katar o Jordan.