Josue 11 - Biblia ande chib Romani

O Josue dobil e Jabine

¹ Kana o Jabin charo katar o Jasor llangla sa gale ezgode, bichalda llenen kai o Jobab charo katar o Madon, kai o Simron charo katar o Aksaf,

² ta sa e charonenge katar e burdura kai si ando norte, ta ando Araba kai si ando sur katar o Kineret, ande bare umalia, ta pasa o Dor pe rig kai perel o kham.

³ Ta e llenenge katar o Kanaan kai sea truial katar e amorreura, e jititura, e ferezeura, e jebuseura katar e burdura ta e jeveura katar o burdo Jermon ande phuv katar e Mizpa.

⁴ Sa e charura likiste pe boñikonenchar, bute grastenchar ta bordonenchar marimake. Sea gachin sargo e chisai e moraki kai nasti llindol.

⁵ Sa achile pe orba te marenpe e Israelea, ta logle pasa e paia katar o Merom.

⁶ A o Del phenda e Josueeke: Na dara lendar, soke thiara isto ande gava saiato me ka cherav te meren sa angla tumende. Tu ka ikane e grasten katar lenge bordona marimake ta ka phabare e bordona.

⁷ Ondaka o Josue ta sa leke boñikura die pe lende pasa e paia katar o Merom kana von ni uzdinape.

⁸ O Del cherda te dobin e israelitura, ta rodie len llik kai o baro foro katar o Sidon ta o Misrefot Maim. Rodie len llik kai o Mizpa pe rig kai likel o kham ta mundarde saurren.

⁹ O Josue cherda prema sar phendaia leke o Del. Ikanda e grasten katar e bordona marimake ta phabarda len.

¹⁰ Mapalal o Josue irisailo ta lia peke o foro katar o Jasor kai saia o glamno foro katar gola charoine, ta mundarda leke charo,

¹¹ mundarde sa e llenen kai zivina kote ta phabarde e foro.

¹² Ta zatrisarda e foronen katar e charura kai achilea pe orba te marenpe e Israelea. Mundarda lenge charonen ta zatrisarda len sa, sar phendaia le o Moises, sluga e Devleko.

¹³ A e israelitura ni phabarde e foronen kai sea pasa e burdura, samo e foro katar o Jasor.

¹⁴ Mundarde sa e llenen kai zivina ande gola forura, ni mukle ni iekhe llene llundo. Ta lie e zivirinien ta e ezgode kai sea ande len.

O Josue kandel e Moisese

¹⁵ O Del phenda e Moiseke, ta o Moises e Josueke ta o Josue kandia ande sa.

¹⁶ O Josue dia ande sa e phuv. Ande burdura, ande sa o Negeb, ande sa e phuv katar o Gosen, ande bari umal katar o Jordan. Ande sa e burdura ta ande sa e bare umalia katar o Israel.

¹⁷ Katar o burdo o Jalak pasa o Seir llik o Baal Gad ande bari umal katar o Libano telal katar o burdo o Jermon. Phangla sa lenge charonen ta mundarda len.

¹⁸ But vreme o Josue mardape gale charonenchar.

¹⁹ Samo e jeveura kai zivina ando Gabaon achile pe orba e israelitonenchar. Sa ogola forura lie len ando maripe.

²⁰ Soke isto o Del cherela te zuriaol lengo lio te marenpe e israelitonenchar te sai e israelitura zatrin len saurren, sar diaia alav o Del e Moiseke te cheren le.

²¹ Ande gua vreme o Josue lia ta zatrisarda e foronen katar e anakitura kai zivina po burdo o Jebron, ando Debir, ando Anab, ande sa e burdura katar o Juda ta o Israel. O Josue mundarda len ta zatrisarda lenge foronen.

²² Ni iek chavo katar o baro lleno o Anak achilo llundo ande phuv katar o Israel. Samo achile chave katar o Anak ando Gaza, Gat ta Asdod.

²³ Ta o Josue lia sa e phuv sar phendaia le o Del e Moiseke. Mapalal o Josue fulada e phuv maskar e viche katar o Israel te avel lengi phuv. Kotar ni saia ios maripe ande phuv.