Josue 1 - Biblia ande chib Romani

O Del ikharel e Josuee

¹ Mapalal kana mulo o Moises sluga e Devleko, o Del dia orba e Josueea, chavo katar o Nun sluga e Moiseseko, ta phenda leke:

² O Moises kai saia mo sluga mulo, ta akana tu ta sa o foro katar o Israel morabi te nakhen o pai katar o Jordan te llan ande phuv kai me ka dav tumen.

³ Gia sar jalem sovel e Moiseseke, me ka dav tumen sa e phuv kai tumen ka ustaven tumare porrnenchar.

⁴ Ka dav tumen e phuv kai si katar o pusto ta e burdura. Katar o Libano llik kai o baro pai o Eufrates, sa e phuvia katar e jititura llik kai e mora e bari kote kai perel o kham.

⁵ Niko ni ka dobil tut. Ta me ka avav tuia gia sar sema e Moisesea ta nikada ni ka mukav tut korkorre.

⁶ Trubul te le chuke zor ta te ave tromano, soke tu ka fulave gale foroke e phuv kai jalem sovel lenge dadenge kai ka dav len.

⁷ Samo le chuke zor te ave but tromano, ta cher sa so phenel o zakono kai mukla chuke mo sluga o Moises. Na duriv letar ni pe chachi ni po stingo te sai llal chuke sukar ande sa so ka chere.

⁸ Phen suako drom e alava kai si pisime ando lil katar o zakono e Devleko te sai chere prema so si pisime ande lete. Mislisao ollivesea ta orachaia ande so phenel o lil, soke gia ka llal chuke sukar ande sa so ka chere.

⁹ Dik, kai me phenav chuke te le chuke zor ta te ave tromano. Te na dara, te na jasare chi zor, soke me cho Del, ka avav tuia kaigo ka lla.

O Josue lacharelpe te lel e phuv

¹⁰ Ondaka o Josue phenda gia e sudonenge katar o foro so saia te cheren:

¹¹ Llan maskar o pero ta phenen saurrenge te guruven jape, soke trin llive ios ka nakhen o pai katar o Jordan te sai len e phuv kai o Gazda amaro Del ka del amen.

¹² O Josue dia orba e vichenge katar o Ruben ta o Gad ta dopas katar e vicha e Manaseseki, ta phenda lenge:

¹³ Den tumen golli so phenda tumenge o Moises sluga e Devleko, kana phenda kai o Gazda tumaro Del, ka del tumen gaia phuv te sai zivin ande pas ande la.

¹⁴ Muken kate tumare rromien, tumare minonen ta tumare zivirinien ande phuv kai dia tumen o Moises, pe gaia rig katar o Jordan. A sa e murusa kai sai llan po maripe, te len e ezgode marimake ta te llan tumare phlalenchar te sai pomozin len,

¹⁵ lligo ni ka del len o Del iek than te aven esmiro gia sar dia le tumenge. Llik kana von ka len e phuv kai ka del len o Del. Ondaka tumen sai ka irin tumen kai tumari phuv pe ogoia rig katar o Jordan, kote kai likel o kham, te sai avel gaia phuv, e phuv kai dia tumen o Moises, sluga e Devleko.

¹⁶ Ta von phende e Josueeke: Amen ka chera sa so phendan amenge, ta ka lla kaigo ka bichale amen.

¹⁷ Amen ka chera suako drom so ka phene amenge isto gia sar kandiam e Moisese. Samo manga te avel tuia o Gazda cho Del, gia sar saia e Moisesea.

¹⁸ A o lleno kai ni kandela tut ta ni ka cherel so ka phene, te merel. Samo manga te le chuke zor ta te ave tromano.