Jonas 4 - Biblia ande chib Romani

O Jonas joliaol e Devlea

¹ E Jonaseke ni avila drago so cherda o Del, ta jolailo but.

² Ta molisailo e Devleke, ta phenda leke: Asun Devla, me phenava kai ka avelpe gaia ezgoda sar kana sema ande mi phuv. Goleke mangava te nasav oma ando Tarsis, soke me llanav kai tu san iek Del kai volil, ta si chuke zalba, ta ni joliao oma, ta gia baro si cho volipe kai phene kai ka dukhave ta mapalal pharruve cho mislo, ta ni cherele.

³ Goleke Del, me moliv man chuke, mundar man. Soke mai preche si mange te merav neko te ziviu.

⁴ A o Del puchla le: ¿A so, sukar chere kai joliao?

⁵ O Jonas likisto katar o foro, ta loglo pe iek rig avri katar o foro katar likel o kham, kote chidia krangura kastenge ta cherda sargo iek cherorro ta thodape telal katar leko lado, ta aduricharela te dikhel so ka avelpe e foroia.

⁶ Ondaka o Del o Del cherda te bariol iek patrin katar e dudum upral po Jonas, ta te del o lado pe leko soro te sai avel leke mai sukar. Ta o Jonas veselisailo but katar e patrin e dudumaki.

⁷ A thiarinako kana pharrona e zore, o Del bichalda iek chermo te dandarel e dudum, ta e dudum sukili.

⁸ Ta kana likisto o kham, o Del cherda te phurdel iek balav tati katar e rig kai likel o kham, ta sar o kham dela orta pe leko soro, lela te baldilpe, ta mangela te merel. Ta phenela: Mai preche si mange te merav neko te ziviu.

⁹ A o Del phenda leke: ¿A so, sukar chere kai joliao gia pala e dudum kai sukili? ¡Ea, sukar cherav! ¡Merav jolinatar!

¹⁰ Ondaka o Del phenda leke: Tu ni thodan ande phuv e simicha katar e dudum, ta ni cherdan la te bariol, ande iek riat barili, ta ande ogoia sukili. A chuke si zalba latar.

¹¹ ¿A ni ka avel mange mai but zalba katar o Ninive, gua baro foro kai zivin mai but katar e stotina ta bis milie llene kai ni acharen savo si lengo va o chacho ta savo si lengo o stingo, ta kai zivin but zivirinie?