Jonas 3 - Biblia ande chib Romani

O Ninive keilpe

¹ O Del pale dia orba e Jonasea, ta phenda leke:

² Lla ando Ninive kai si iek baro foro, ta phen so me ka phenav chuke:

³ Ta o Jonas llelo karing o Ninive, gia sar phenda leke o Del. O Ninive saia gia baro kai te phire sa o foro saia te cherele ande trin llive.

⁴ O Jonas thoda te del ando foro, phirda iek llive ta phenela ando baro avazi: ¡Ande saranda llive o Ninive ka avel zatrime!

⁵ Sa e llene katar o foro, bare ta i minone, pachaie ando Del, cherde alluno, ta thode pe pete patave zalosne te achardol lengi duk.

⁶ Kana o charo katar o Ninive llangla gaia ezgoda, ustilo katar po trono, ikanda petar pe patave charoke, thoda pe pete patave zalosne ta beslo pe phuv.

⁷ Mapalal, o charo ta leke sudura inllarde e viasta kai sa o foro katar gava zakono: Sa e llene te na jan niso. Ta te na den te jan ni te pien e guruven ta e bakren.

⁸ Ta te thoven pe tumende ta i pe zivirinie patave zalosne te achardol e duk, ta molin tumen e Devleke sa tumare zoriaia. Ta na cheren ios o bilachipe, ta chuden tumendar o silnope kai cherden llik allive,

⁹ sai avelpe kai o Del ka pharruvel po mislo ta gia ni ka mera.

¹⁰ O Del dikhla so cherena e llene katar o Ninive ta sar mukena po bilachipe, ta ni kamla te cherel lenge e zatrania kai mangela te cherel.